ازيكوا يا فتوكات ؟ يا رب تكونوا دافيانين وولادكم هاديين وتحت البطانيه قاعدين
واللى بيمتحنوا مبسوطين وعلى الاسئلة مجاوبين
ويا رب احفظ مصر واهلها من الناس والوحشين
حلوة والله انفع صح؟؟؟
ندخل فالجد بقى ، امبارح يا جماعه وانا قاعده ولابسة كومة هدوم والاستريتش وفوقيه البنطلون قولت القى نظرة على منظر امامى للبطن ،فرفعت الجاكيت وببص لقيت منظر ميسرش لا عدو ولا حبيب ، الاستريتش قاسم بطنى نصين والبنطلون قاسم نص منهم نصين وخاصة انه كان بنطلون من اللى وسطهم ساقط ، حسيت انى عامله زى وادى وفيه 3 تلال ورا بعض
بصراحة اتضايقت اوى من منظرى ، وقولت يا دى الحوسه الصيف هييجى وانا بالمنظر ده ازاى؟ والصيف يحب اللبس الضيق والاستريتشاااااااااااااااات والبديهاااااااااااااااااااات والشورتات وقمصان النوم ، قولت يا لهوى وانا هقعد للراجل والبطن دى موجودة ؟؟
اقولكوا بقى البطن دى من ايه ، انا والده من سنة وجيبت سلمى ربنا يحميها ويحفظها ومعايا غير سلمى، كريم ما شا ء الله عليه عنده 4 سنين ، طبعا كلكوا عارفين الحمل بيعمل ايه فالبطن ، كنت لعبت شوية رياضه بعد فترة من الولاده وكنت راضيه بعض الشيء عن منظر بطنى ، وبعدين جه الشتا واللبس بيدارى بقى اى منظر مش كويس فأهملت فى نفسى واكلت حلويااااااااااااااااات وضروسى باظت اه يا نى ووزنى زاد شويه صغيرين بس المشكله ان الزياده معظمها كان فى بطنى وهو ده بقى اللى زود بطنى
فانا عاوزة انزل بطنى بس لانى جسمى الحمد لله كويس اوى ممكن اخس 2 كيلو ولا حاجه لكن ازيد لا مش هيبقى شكلى كويس لانى قصيره شوية
مين بقى زيىى كده جسمها كويس بس عاوزة تنزل بطنها؟؟؟؟؟؟؟؟؟
يا ريت لو فى حد زيي ونشجع بعضينا ونكون قبل الصيف من غير كرش عشان يبقى جسمنا احلى
انا هقولكوا انا ناويه اعمل ايه
1- اول حاجه واهم حاجه اكيد تمارين البطن انا عارفه تمارين كانوا جابوا نتيجه معايا بعد الولاده بس هدور عليهم عالنت وانزلهم ان شاء الله ويا ريت لو فى حد جرب حاجه ونفعت معاه يقول
2- الجرى فالمحل او نط الحبل او اللى عنده مشايه يجرى عليها او اللى بينزل جيم يبقى كده تمام
3- نشرب مايه كتير
4- نخف السكريات شويه ونختم بزبادايه فالعشا
5- مشروب لحرق الدهون (جنزبيل+ قرفه+ ينسون) مرة على الاقل كل يوم
وان شاء الله ندخل كل يوم نقول عملنا ايه ومعملناش ايه وفالبدايه هنقيس محيط الخصر ونسجله عندنا مش هقول نكتبه هنا عشان الاحراج
وهنستمر على النظام بتاعنا لمدة شهرين (هنبدأ ان شاء الله يوم 1 فبراير وننتهى يوم 1 ابريل ان شاء الله) وبعدين نقيس محيط الخصر تانى
ونيجى نقول احنا نزلنا كام سم ولو وزنا برده جسمنا قبل وبعد يبقى كويس اوى وطبعا بعد كده نستمر على الرياضه ومنقفش ومنكسلش
عشان جسمنا ميرهلش
ويا ريت لو حد جرب دهان للترهلات وجاب نتيجه يقول عليه
مين هتشترك معايا فالجروب دى؟؟؟؟؟
الاشتراك مفتوح ليوم 31 يناير
والسلام عليكم ورحمة الله وبركاته
doctormo doctormo 116853_1.gif فتكات رائعة Fatakat 116853 البحيرة – مصر
سبحان الله و بحمده