السلام عليكم يا افتوكات
انا من زمان نفسي اكتب هنا لاني بحب الطبخ قوي بس كنت عاوزة لما اكتب وصفة متبقاش متكررة ومفهاش فايده المهم في طريقة فراخ انا بعملها لجوزي قلت اقولكم عليه انا اخدتها من فكرة لمنال العالم بس انا زودت عليها حجات يعني اختراع وربنا يستر عليكم بقي بس بجد للي عايش في السعودية حماتي كلت من مطعم البيك وهو مطعم مشهور هنا في السعودية وبعدها عملتلها الفراخ دي قالتلي احلي من بتاعت البيك شفتو بقي اي خدمة
من غير لت وعجن
المقادير
فراخ فيليه
بصلة متوسطة فلفل اسود
بهارات الكاري
كيس فيجيتار
شوية دقيق وبيضة
الطريقة :
انا بجيب الفراخ وافرمها في الخلاط وبفرم البصلة وبعدين بخلطهم مع بعض واجيب شوية بقسماط صغيرين قوي واحطهم عليهم عشان الفراخ هتحسي انها لينة شوية معاكي
ولو حبيتي بردو شوية دقيق صغيرين قوي حتي لوحسيتي انها طرية شوية مش مشكلة المهم نحط شوية فلفل اسود بس منحطش ملح خالص تمام بعد كده نعجنها كويس وتجيبي صينية وتفردي الخليط ده فيها وتحطيها في التلاجة شوية يعني نص ساعة لغاية ماتمسك نفسها شوية بعدين نطلعها انا بقطعها مربعات صغيرة وبعدين احطها في دقيق وبعدين في البيض وبعدين في الفيجيتار او هنا في السعودية في خلطة البروست حلوة قوي اسمها اسرار
بعدها تتحمر بقي في شوية زيت ونطلعها بعد مايبقي لونها دهبي وبس كده بقي بالهنا والشفا
معلش انا مش بعرف انزل صور ازاي هنا عشان كده محطيتش صور ليها ان شاء الله اتعلم وابقي انزلكم صور مواضيع هذا القسم برعاية
مدام فنفن مدام فنفن فتكات رائعة Fatakat 189344 مكة المكرمة – السعودية