السلام عليكم احبتي
يا تري وحشتكم ؟ الله اعلم بس انتوا فعلا وحشتوني
ندخل في الموضوع لما بطبخ لحمه بزود قطعتين جالنا ضيف يبقي بالف هنا فضلوا يبقي تاني يوم نعدي بيهم اليوم بوصفه سهله زي الرز بالبسله واللحمه موضوعي السابق(الريزي ايزي) وده الرابط بتاعه https://fatakat.univanet.com/#4304139
وزي وصفتنا النهارده الباميه باللحمه بطريقتي
دي قطعتين لحمه مسلوقه فتفتهم مع بصله كبيره مقطعه صغير ومعلقه توم مفروم ومعلقتين زيت ذره او عباد شمس ونروح بيهم ع النار
وتقلبتين حلوين وبعدين ننزل بالباميه تاخد لفتين معاهم انا الباميه بتاعتي اكياس مجمده فبغسلها الاول بميه سخنه عشان لو في مواد حفظه واصفيها وبعدين ننزل بالطماطم المضروبه في الخلاط عليهم انا مخزنه الطماطم حب زي ما هي في الفريز اطلعها تفك شويه واضربها في الخلاط عااااااااادي كانها طااااازه
ودي بعد مابدأت تتسبك وضيفنا معلقه توابل شطه ع خفيف وظبطي ملح وانا بحب اهرسها ع خفيف بالشوكه وانا باقلب عشان تبقي ملفوفه وقوامه حلو ونضيف معلقه صلصه صغيره تظبط اللون
طيب اتسبكت تمام نجيب بايركس جميل ونكون مشغلين الشوايه ونصبها في الباريكس ونقطتين سمنه بلدي ع الوش للطعم والريحه واللون
ايوه كده تمام وندخلها تحت الشوايه خمس دقايق بس ودي النتيجه
ومن زاويه تانيه
طيب وكمان زوووووووووم
وطبق ملوخيه كمان
انا المرادي ضيفت حفنه عدس اصفرمجروش للشوربه وخليتهم يغلوا مع بعض شويه وبعدين عملت بيها الملوخيه عادي ليه بقي عشان العدس بيدي قوام وطعم جميل للملوخيه يعني تغيير
اتفضلوا معانا وماتنسوش طبق السلطه
طبعا اكلنا بخبز طري سخن مفيش احلي من كده الحمد لله فاكرين بنوتي الليي لازم تاكل رز كل يوم هههه النهارده بقي ربنا هداها واكلت معانا بخبز ع فكره ده غدانا النهارده النهارده بجد يعني لسه فاضل شويه باميه اللي نفسها تقول وان ابعتلها طبق قبل ما تخلص ع العشا بإذن الله
بحبكم في الله
اسالكم الدعاء لي بالشفاء العاجل وربنا يحفظلي عيالي ويهديلي زوجي مواضيع هذا القسم برعاية
sabrein sabrein 399849_15.gif برنسيسة فتكات Fatakat 399849 في ارض الله – في ارض الله