ازيكم يا احلى عرايس
انا عملت الموضوع ده لانى فعلا بعد الجواز الفكر اتغير تماما وندمت على حاجات كتير اشتريتها ملهاش اى لازمة
قولت ادخل افيد اخواتى وحبايبى عشان ميغلطوش غلطتى وتوفروا الفلوس لحاجة تانية احسن
موضوعى ده بعد سنتين زواج يعنى هقولك على حاجات لم تستخدم منذ عامين هههههههههه حلوة اللغة العربية دى
الاول هنقسم الشقة غرف كل غرفة هنكتب محتواياتها وايه اهم الحاجات الى لازم نجيبها
الاساسيات بتاعتنا
اوضة النوم
اوضة الاطفال
الانتريه
السفرة
المطبخ
واخيرا الحمام
هنتكلم الاول عن اوضه النوم
حاولى وانتى بتختارى اوضة النوم تجيبى فيها اكبر عدد من الادراج
يعنى الكمودينو والتسريحة خلى فيهم ادراج كتير بجد هتحتاجى ادراج بالعبيط
وياريت يبقى كرسى التسريحة حاجة كده صغيرة بتدخل جوه التسريحة عشان مياخدش مكان لان اصلا ملهوش استخدام
نتكلم بقى عن المفروشات بتاعة الاوضة دى
2بطانية واحدة طبقتين وواحدة طبقة واحدة
مفرش قطيفة
مفرش عروسة
لحاف تقيل وينفع يكون مفرش
كوفرتة واحدة كبيرة اللى هيا منجدة فيبر دى
6 اطقم ملايات سادة
6 اطقم ملايات مشجرة
2طقم فوط وجه وبلاش الفوط القطيفة لو نفسك فيها هاتى وش قطيفة ووش قطن
طقم فوط يد
2 بشكير كبير
2برنس
انا والله يابنات اشتريت حاجات اكتر من كده والله والله ملهاش لازمة
التسريحة بقى
هاتى برفانات بالعبيط
2كريم مرطب للوجه كبار
2بدى كريم
2هاند كريم
2بدى لوشن واحد مضىء وواحد عادى
اقلام كحل جميع الالوان
2ماسكرا واحدة سوداء وواحدة زرقاء
الايشادو هاتى العلب الصغيرة بلاش علبة الميك اب الكبيرة لا تستخدم بالمرة
البلاشر هاتى 4 درجات مختلفين
الاي لاينر اسود وازرق
الالوان اللى بتحبيها من الروج
2ملمع روج
الوان مانكيير زى ماتحبى
اسيتون متنسيش
2كريم شعر
التوك بقى زى ماتحبى كترى براحتك ملهاش اكسبير
تاتو واكسسوارات
ومتنسيش جوزك هتيله
برفانات واسبراى للجسم
وكريم شعر او جيل
ومتنسيش فرش الشعر
نيجى بقى للدولاب
هنقسمه
لبس خروج صيفى وشتوى
لبس بيت صيفى وشتوى
لانجيرى وبيبى دول
لبس خروج صيفى للبيت
اولا لبس الخروج هيعتمد على
3 بنطولانات جينز اسود وازرق غامق وازرق فاتح
4 جيبات 2 جينز غامق وفاتح وجيبة بنى وجيبة سوداء
هاتيلك بقى 3تونيكات حلوين صيفى للبنطلونات
وباديهات للجيب حسب امكانياتك بس متكتريش عشان الجسم بيتغير بعد الجواز
ودريس صيفى حلو كده ويبقى الصيفى كده تمام
الشتوى على نفس البنطلونات والجيب
تجيبى بالطو شيك وتونكين شتوى
وكام بادى شتوى للجيب وبرضو متكتريش
والطرح هاتيها تليق على الصيفى والشتوى
الشوزات والشنط
الالون الاساسية
اسود وبنى وجينز
وممكن تجيبى لونين كده مطرقين مهو عروسة بقى ولازم تتشيكى
لبس البيت الشتوى
هاتى 6 ترنجات او بيجامات زى م تحبى
و3جلاليب كفاية اوىمش هتلبسيهم اصلا
واحد روب شتوى
الشتا قصير والحاجة مش بتتلبس انا عندى هدوم والله مش اتلبست لسه
اللبس الصيفى بقى
كترى على قد متقدرى
بيجامات قطن وليكرا
جلاليب تركى وكاش مايوه
ترنجات برمودا وبنطلون
بيجامات شورت
ابعدى خالص عن الستان مش بتلبسيه هتى واحدة منظر بس
3جلابية صيفى واحدة نص كم و2 كم
اسدال صلاة
روب ستان طويل
عبايات العرايس لو تعرفى حد قريب منك مشتريهم استلفيهم احسن انا جبت 3 والله كل واحدة لبستها مرتين والتالتة بورقتها
الانجيرى بقى نجم النجوم
هاتى جميع الالوان اوعى تقولى فى لون مش حلو عليا لبس الخروج حاجة والانجيرى حاجة تالتة خالص
هاتى قصير وطويل كترى شوية من القصير
اوعى تجيبى قميص بروبه والحركات دى مش هتخرجى بيه من الاوضة اصلا
لو ضرورى هاتى واحد او اتنين كفاية اوى
الاندرات هاتى كتييييييييييير ونوعى بين قطن وليكرا وشيفون وتل وكده
البراهات هاتى 2 غاليين للخروج وهاتى 6 عديين للبيت لو لبستيهم
لبس الخروج بقى بتاع البيت
هتجيبى ياحلوة
2هوت شورت جينز
جيبة جينز قصيرة
جيبة قماش عادية قصيرة
برمودا جينز وبرمودا قماش
باديهات حمالة وكات وكب
وايها يامعلم
على فكرة انزلوا الوكالة فيها حاجات تحفة ورخيصة مووووووووت بس دورى كويس
ومحلات الاستوك برضو جميلة فى الحاجات دى
وهاتى كمان 2 بنطلون كرينا والبديهات الكرينا الالوان الى تحتاجيها
اوضة الاطفال
اهم حاجة لو هتجيبى اوضة اطفال يبقى مش سريرين وخلاص لازم لازم الدولاب انا معنديش دولاب وبصوت دلوقتى واقول ياريتنى
المفروشات
6 اطقم ملايات لكل سرير
2كوفرتة صيفى
2بطانيةو 2 مفرش قطيفة او 2 لحاف
هاتى حاجة واحدة منهم كلهم ملهمش لازمة هو انتى هتقعدى طول العمر متجبيش
هاتى الباقى لما ربنا يرزقك بأطفال
انا جبت 2مفرش قطيفة بيمشوا مفارش وبطاطين فى نفس الوقت
بالنسبة للمفروشات انا اكتر ماركة حبتها المجد بجد تحفة تحفة تحفة
الانتريه
قبل متختارى الانتريه قيسى المكان كويس عشان متجبيش حاجة تبقى كبيرة اوى ومضيقة المكان
هاتى شمعدانين حلوين كده للتربيزات بتاعة الاركان
بونبونيرة شيك للتربيزة
والمفارش هاتيها شبه مفرش السفرة لو عندك رسبشن لكن لو كل حاجة فى مكان اختارى براحتك
السفرة
طبعا بالنسبة لتربيزة السفرة هتجيبى طبق فاكهة شيك تحطيه فى النص
ومفرش حلو زيك ولو هتفرشى مودرن هتندمى لو جبتى مفرش التربيزة شكلها اشيك كتيييييييييييير بدون مفرش
يادوب حاطة عليها مفرشين من بتوع النيش
النيش بقى المشكلة الكبرى
اشترى كاسات واطقم كريستالات وصينى و…….ئءو………….ء……………….
وفى الاخر حاجات ولا ليها استخدم
سنعاكى ياللى بتقولى انا هستخدم واعمل واحط كنت بقول زيك يا حلوة بعد الجواز بشهر بالضبط
كل حاجةرجعت مكانها ومبقاش يتفتح
طيب ايه الحل وايه الى هنجيبه
نجيب نيش صغير قد متقدرى المودرن دلوقتى حل مشكلة المقاسات هاتى نيش ضلفتين بس
هاتى طقمين كاسات حلوين وطقمين كوبايات
وطقم الشربات الى مش بيخرج من النيش
وطقم جاتوه
وطقم اركوبيركس غالى وشيك
لو بجد عاوزة توفرى متجبيش صينى والله والله والله مطلعش من النيش غير كام طبق مرتين بس
لو نفسك فيه اوى حاولى تجمعى من كل مقاس 6اطباق محدش هيفتح النيش ويدور على باقى الطقم
الحاجات اللى هتستخدميها هكتبهالك مع تجهيزات المطبخ
معلش يابنات ابنى عاوز ينام هنيمه وارجعلكم مع المطبخ العظيم
mshmsh24 mshmsh24 418701_3.gif فتكات ست الكل Fatakat 418701 الجيزة – مصر