السلام عليكم
ده اول موضوع ليا في منتدي الطبخ ونفسي اني افيد بيه اخواتي الفتوكات زيي مانا باستفيد منكم
ان شاء الله هاقولكم علي طريقتي الخاصة لعمل الشاورما وان شاء الله احلي من اي شاورما برا
كان نفسي اتعلمها لاني بحبها اوي وجوزي بيموت فيها
فمن يوم مابدأت اعملها وجوزي بطل والله انه يأكلها برا ويقولي بتاعتك احلي بكتير
هي شاورما اللحمة متعبة شوية لن شاورما الفراخ اسهل بكتير بس ماشاء الله جميله جدا جدا ووالله احلي من المحلات
اسالكم الدعاء لي بصدق بتيسير الولادة
للامانة الصورة منقوله انما الموضوع انا اللي كتباه وليس منقول
بسم الله
الشاروما تنقسم لجزءين الجزء الاولي شوي اللحمة للشاورما والجزء التاني عمل الشاورما
المقادير
اولا مقادير شوي اللحمة
عرق لحمة فلتو (باشتريه من منافذ بيع الامن الغذائي اللي تبع القوات المسلحة بيبقي سعرها كويس الكيلو تقريبا ب45 جنية بس عيبها انها بتخس فاشتري العرق يكون وزنه كيلو او كيلو وربع علشان ماتخسش اوي )
او ممكن تجيبيه من عند الجزار كل واحده وبراحتها
1بصلة مبشورة
1 طماطمة مبشورة
فلفل وملح وكمون
كوب ماء ويمكن زيادته علي حسب اللحمة
ثانيا مقادير الشاورما
1
بصله كبيرة مبشورة هناخد الماية بتاعتها ونرمي التفل بعد ماتبشري البصلة اعصريها بايدك او بقطعة شاش نضيفه وناخد ميتها والتفل يترمي
عصير 3 ليمونة كبيرة
1 بصلة وسط متقطعه مكعبات
5 معالق خل كبيرة
1 قرن فلفل رومي ولو بتحبيها حراءه هاتيه حراء
1 طماطمة كبيرة متقطعه قطع صغيره
حزمة بقدونس متقطعه قطع صغيره
ملح وفلفل وكمون
الطريقة
اولا طريقة شوي اللحمة بتجيبي العرق وتحطيه في الصينية ومعاه تتبيلته البصل والطماطم والملح والفلفل والكمون وندخله الفرن علي الرف اللي في النص علشان مايتحرقش ونقوم بشوية وكل شوية ابص عليه لو احتاج مايه اضيف لو ماحتجش يبقي خلاص لحد مايستوي للاسف لحمة القوات المسلحة بتاخد وقت علي ماتستوي ممكن تصل ل3 ساعات في الفرن انما لحمة الجزار مبتاخدش وقت
والهدف من شوي اللحمة لاننا ماعنديناش ماكينة الشوي اللي في المحلات فعلشان مذاق لحمتك انتي يبقي افضل هنشوي اللحمة الاول
ثم بعد ماتستوي هنقسمه انا علشان اسرتي لسه صوغيره فبقطع العرق شرائح زيي اللحمة البارده ثم اقطعها بالطول تبقي شبه البطاطس الصوابع بس ارفع واصغر شوية ثم باقسمه علي 3 مرات واحط كل تلت في كيس واشيله في الفريزر لحين استخدامه
المقادير اللي انا ذرتها الخاصه بالشاورما هيا لعمل كيس واحد وطبعا لو هتعملي العرق كله مرة واحده يبقي هتضاعفي الكميات
ثانيا بعد ماخد تلت عرق اللحمة وانتي هتلاقيه صوغير لكن بالاضافات هايعمل كميات كبيرة باذن الله
نجيب طاسه او حالة تيفال ونحط فيها حتة سممنة بلدي او زبده او زيت اللي متوافر عندك بس كمية بسيطه خالص علشان نشوح فيها اللحمة
ثم نحط اللحمة ونقلب لمدة دقيقتان ثم نوطي الشعله ونحط الخل ونقلب ونغطيها علشان اللحمة تشربه ومايتبخرش كله وبعد ماتشربه هو هياخد حوالي دقيقة نضع الليمون ونقلب ونغطي ومازالت الشعله منخفضة شوية مش عايزين نار عالية علي الفاضي
ثم نضع ماء البصلة المبشورة ونقلب ونغطي
بكده هتكون اللحمة شربت المونات ديت وشالت كل زفارتها واتغير طعمها وبقت تحفه
هنجيب البصله المتقطعه وقرن الفلفل الرومي المتقطع ونضعه ونقلب ونعلي بقي الشعله لمدة دقيقة
ثم نضع التوابل الملح والفلفل والكمون
ثم نضع الطماطم والبقدونس ونقلب ونطفي النار بسرعه علشان الطماطم ماتنزلش مايتها انا عاوزة الشاورما نشفه
ثم نكون مجهزين الفينو الطري وتعمليه سندوتشات وبالف هنا وشفا يارب
او ممكن نعملها عيش الشاورما وتعمليه طري وتلفي الشاورما جواه
ولعمل شاورما الفراخ نفس طريقة عمل شاورما اللحمة لكن بنجيب صدور الفراخ او قطع البانيه ونقطعها صوابع رفيعه ونسويها علي النار بوضع قليل من الزبده ونقلبها ثم قليل من الماء لحد مالونها يتغير وطبعا مابتاخدش وقت ثم نضيف الخل والليمون وماء البصل ونكمل الطريقة كما هي
وطريقه عيش الشاورما
2 كوب دقيق + كيس خميرة فورية + 3 معالق لبن بودرة + شوية ملح صوغيرين+ نص معلقه صغيره سكر + معلقتين خل + معلقتين زيت + نص كوب ماء ونضيف كله في العجانه ونشغلها هتلاقيها اتعجنت كويس ولو احتاجت ماء ضيفي الماء بالتدريج
ثم نضع العجينه في مكان دافئ لمدة ساعه ونغطيها كويس علشان تخمر
ثم نقسم العجين ونجيب النشابة ونفرد وعلشان تحصلي علي عيش الشاورما بشكل دائري بعد ماتفرديها هاتي طبق كبير وحطيه عليها وقطعي بالسكينه الزياده علشان يطلع رغيف مدور وشكله حلو
وهكذا لحد ماتخصلي العجينه كلها
ثم تجيبي طاسه تيفال بها قليل من الزيت علي البوتجاز وتحطي فيها الرغيف لحد مايحمر شوية ثم تقلبيه علي الوش التاني
خلي بالك الغريف بياخد حوالي دقيقتان او تلاته بالتير اوعي تسبيه يتحرق
وبعد ماتسويه غطيه بقطعه من القماش علشان ماينشفش
ثم تجيبي الغريف وتحطي الشاورما ف نصفه وتتنيه من تحت الاول ثم الجوانب
وتقدم مع البطاطس المحمرة
ونسالكم الدعاء لي بتيسير الولادة مواضيع هذا القسم برعاية
Dr Nora Dr Nora فتكات متميزة Fatakat 571561 6 اكتوبر – مصر