السلام عليكن يابنوتات وياستات ويا زهرات ويا كل الجميلات فى مدونة فتكات (ههههههههه القافية حكمت)
عاملين اية فى الايام الجميـــــــلة دى أحب أقول الأول أننا على مشارف شهر رمضان الكريم ربنا يبلغنا إياة
يااارب وعاوزين ندعى لمصر بصلاح الأحوال للجميع وربنا يولى الأصلح يااااااارب
حبيت أعمل الموضوع دة يافتوكاتى ياحبايبى لأنى كنت بعك كتير فى تتبيلة البانية وكل واحدة ليها طريقتها أنا
عارفة بس كنت بجرب خلطات كتيــــــــــرة لحد ماكنت معزومة عند واحدة قريبتنا فى يوم وأكلت عندها بانية
ومسبتهاش إلا لما عرفت طريقتة ومن يومها وأنا ما بحاولش إنى أجرب غيرها وبقت طريقتى المعتمدة واللى
كل اللى كلوها من إيدى عجبتهم وأحلى حاجة فيها إنها سهلة وسريعة وغير كدة طعمها رهييييييب
المقادير :
فراخ بانية الكمية حسب الرغبة
2 بصلة متوسطة
2 قرن فلفل أخضر
1 قرن فلفل حراق (واللى مايحبش مش مهم)
بيضة
2 ملعقة كبيرة دقيق
2 ملعقة كبيرة لبن
بهارات (ملح -فلفل-كمون-زعتر-بابريكا) أى بهارات عندك حطيها
عصير ليمونة
5 فصوص ثوم كبار
ملعقة خل كبيرة
الطريقة :
نقطع كل مكونات الخلطة ونحطهم مع بعض فى الكبة أو الخلاط لحد مانلاقى قوامهم شبة الطحينة كدة لو حسيتوا
ان الخلطة غليظة شوية ممكن تخففوها بشوية مية بس إن شاء الله هتطلع مظبوطة لو إلتزمتم بالمقادير بالظبط
وبعد كدة نحطها على البانية ونقلبهم حلو فى بعض ونحطهم فى علبة محكمة الغلق ونحطها فى التلاجة فى الرف
اللى تحت الفريزر من 3 :6 ساعات وممكن أكتر زى ماتحبى بعد كدة ياستى هتطلعيها من الخلطة وانتى
بتطلعى الفراخ حاولى توقعى من عليها الخلطة بس مش أوى يعنى تنفضيها كدة تنزلى الكميات الكبيرة لكن لو
فضل عليها جزء م الخلطة عادى وبعدين تكونى مجهزة خليط تانى عبارة عن بقسماط مطحون وياريت لو
خشن مع كيس فجيتار حار وتقلبيهم حلو تنزلى الفراخ فى البقسماط علطول من غير ماتحطيها فى حاجة تانية
هى عليها البيض والدقيق والخلطة هتخليها تمسك وبعدين ع الزيت الحامى والغزير علطوووووول وكلى بقى
أحلى وأطعم بانية والله بتبقى ريحتة قالبة البيت الخلطة دى بتديلة طعم خرافة ….جربوا مرة مش هتندموا واللى تجرب تدعيلى بالله عليكم بإن ربنا ييسرلى أمرى ويصلحلى حالى ويستجب دعائى ولكم بالمثل إن شاء الله
أستودعكم الله حبيباااااتى
مواضيع هذا القسم برعاية
حنين قلبى حنين قلبى 190316_15.gif سوبر فتكات Fatakat 190316 قلب حنين – مصر