إزيكم يا أحلى فتوكات
أنا بقى بحب قوى طاجن الخضار ومن يومين عملته بإفتكاسه جديده وطلعت تحفه
فقولت لازم أقولكم عليه
كوسه – جزر – بطاطس ( حسب افراد الأسره وطبعا ممكن تضيفى اى نوع خضار تانى )
بصل
فصين توم
طماطم معصوره
لحمه بتلو مكعبات متوسطه ( ممكن لحمه عاديه بس البتلو بتستوى بسرعه )
ملح وفلفل وبهارات وزعتر وريحان ونعناع ناشفين
نقطع بصله جوانح وعلى نار هاديه نشوحها بالزيت أو السمن شويه وبعدين نحط عليها مكعبات اللحم ونقلبهم شويه ونحط الملح والفلفل والبهارات
ونغطيها ونسيبها تستوى براحتها خالص
طبعا كل شويه نبص عليها ونزودها ميه كل ما تحتاج لحد ماتقرب تستوى خالص
أهم حاجه يبقى فيها سائل فى حدود كوبايه مثلا زى الصوره دى ونقفل عليها النار .
نيجى بقى لتانى حاجه هانقطع الخضار
ونقطع بصله صغيره ونشوحها فى زيت الزيتون ( طبعا اللى مابحبوش يستعمل زيت عادى او سمن )
ومعاها فصين التوم المفرومين ( ماتكتريش التوم احنا عايزين ريحته بس )
وأول ما يدبلوا ننزل عليهم الخضار ونقلبهم شويه لحد ما الخضار يدبل شويه
ننزل عليه عصير الطماطم ( أنا حطيت حبتين طماطم لإنى عايزه طعمها مش عايزه اسبكها )
ونقلبهم كويس ونتبلها بالملح والفلفل ( مش كتير إفتكرى ان اللحمه كمان متبله )
بس هانحط عليها الأعشاب ( الريحان والزعتر والنعناع ) بتديها ريحه وطعم جنان دا غير فوايدها
ونقلب ونحطلها شوية ميه صغيرين ونوطى النار عليها ونغطيها مع متابعتها وأول ما تبتدى تستوى
هانضيف عليها اللحمه اللى احنا عملناها فى الأول بالصوص بتاعها ونقلبهم لحد ما يمتزج الخضار باللحمه والصوص
وأول ما يغلو غلوتين نصب الخضار كلهم فى الطاجن وعلى الفرن عدل ما وشه يتحمر
و لو مستعجله خليه على النار لحد ما يستوى هو تقريبا مستوى بنسبة 90 % وبعدين حطيه فى الطاجن وافتحى عليه الشوايه علشان وشه يتحمر
ويتقدم وهو سخن
وبالهنا
أنا عملت معاه رز بالشعريه
ودى الصور
مواضيع هذا القسم برعاية
Princess Strawberry Princess Strawberry 141062_7.gif سوبر فتكات Fatakat 141062 الجيزه – مصر