ازيكو يا حبايبى يا حلوين
انا كتبتلكو قبل كدا انى عايزة اخلع ضروس العقل الاتنين اللى تحت المدفونين وقولتلكو انى روحت لدكتور اسنان
بصراحة لما ناس كتير قالتلى جراحة احسن وهو نفسه قالى دى عملية وجراحة وقريت على النت كتير انى لازم اروح لجراح
قررت اروح لجراح او جراحة متخصصة فى الموضوع ده خصوصا ان الدكتور كان مخوفنى من موضوع العصب ده
المهم روحت للدكتورة وهى متخصصة فى جراحة الفم والفكين ودكتورة فى جامعه القاهرة كمان واخدت فى ايدى اشعه البانوراما وشافت الاشعه وقالتلى دى عملية وهيتخلع ضرس ورا ضرس والافضل يكون بعد العيد لانى مش هاكل لمدة يومين غير عصير وجيلى
وقالتلى الاشعه دى مش موضحة اذا كان الضرس واصل للعصب ولا لاء وقالتلى ان اى اشعه بانوراما بتخدع فى ان هى بتوضح ان الضرس لازق فى العصب لكن فى الغالب مش بيكون كده ورسمتلى رسمة كدا توضح ان الضرس ازاى مش بيكون لازق وفى الحقيقة بيكون مش لازق
وقالتلى لو عايزة اطمن ممكن اعمل اشعه ثلاثية الابعاد على ضروس العقل ودى بتوضح اذا كان لازق فعلا ولا لاء لان هى بتكون مقربة جدا من الضروس ودقيقة جدا
بس قالتلى مش هتفرق كدا كدا هتخلعهم سواء لازق ولا لاء وقالتلى عاوزة تعملى الاشعه اعمليها مش عايزة متعمليهاش بس انا خايفة من حاجة دلوقتى هى ليه مش مهتمة اذا كان الضرس قريب من العصب ولا لاء هو الضرس مش لو قريب من العصب هيأثر عليا انا ولا ايه
وبعدين لما سالتها هو ايه العصب ده بتقولى بيتحكم فى الفك اللى من تحت طيب افرضوا قريب منه مش ممكن يأثر على الفك السفلى ولا ايه انا نسيت اسالها فى الموضوع ده وخايفة اوى ولسه معادى بعد العيد
حد يطمنى من كتر المعلومات اللى قالتهالى نسيت اسالها
وقالتلى ان مش هاخد برشام قبل العملية هاخد 3 حقن قبل العملية مباشرة وقالتلى اهتم بنظافة سنانى وضروسى اوى فى شهر رمضان عشان ميحصليش التهابات والخيط الطبى ومضمضة اورالدين
انا هعمل الاشعه دى بعد رمضان ان شاء الله بس واحدة تكون دكتورة اسنان تطمنى الله يكرمكوا يارب فى الشهر الكريم ده ويحقق كل اللى بتتمنه تطمنى من موضوع ان الضرس المدفون لو قريب من العصب هيأثر عليا فى ايه
وقالتلى بين كل ضرس بيكون اما اسبوع اما اسبوعين قالتلى انا وشطرتى فى اخد الدوا والمواظبة عليه بس قالتلى يومين بعد العملية هكون تعبانة اوى ومخرجش من البيت ولا اتعرض لشمس ولا لحر ولا اعمل اى حاجة غير انى اكل جيلى وعصاير
مسلمة حسين يعقوب مسلمة حسين يعقوب images/avatars/whiteflower.jpg فتكات هايلة Fatakat 532989 القاهرة – مصر