اخواتى رواد المطبخ
ازيكم يا قمرات
النهارده جبتلكو أكله جديده
من يوم ما اتعلمنا الطبخ واحنا بنعمل السمك الفليه مقلى او مشوى
بس انا قولت اغير فيه شويه واشوف النتيجه
لأتاكلت لا اضربت
الحمد الله عجبت اعضاء بيتى
ونالت اعجابهم
وطبعا مش معقول هدوق اهل البيت بس قررت اصورها وانزلها ليكم
عشان تشوفوها انتم كمان
متهيئلى كفايه رغى وادخل فى الموضوع
المقادير
سمك هامور فليه
2 بطاطس
2 بصل
1 فلفل رومى اخضر
ثوم
ليمونه
كرفس
1 طماطم
معلقتين صلصه كبار
وملح وكمون وفلفل اسود
جبت الفليه وغسلته كويس جدا
وحضرت المقادير كلها
ضربت الثوم مع الكمون والملح
ووعصرت عليهم الليمونه
وانا عندى الكرفس بجيبه واقطعه واصفيه واشيله فى الفريزر
خلط تتبيله الثوم والكرفس والليمون بالسمك
وحضرت الصنيه اللى هعمل فيها الاكله
نزلت فيها الخضار اللى مقطعاه مكعبات
والسمك بعد ما تبلته
خلطهم كويس مع بعض
وجبت معلقتين الصلصه عليهم شويه مايه
والملح والفلفل والكمون
ونزلتهم على الصنيه وقلبت كله مع بعضه
ولفتها بالقصدير
وشغلت عليها النار لمده ربع ساعه
وبعدين دخلتها الفرن حوالى تلت ساعه كمان
وديه كانت النتيجه
بعد الغرف فى الطبق
وطبعا عملت معاها رز صياديه وسلطه طحينه وسلطه خضرا
بجد كانت طعمها تحفه والريحه كمان واااااااااااو
عشان الكرفس اللى فيها
والحمد الله نالت اعجاب
الاخوه الاعداء اللى عندى
ويارب تعجبكم انتم كمان
وتحياتى ليكم جميعا
مواضيع هذا القسم برعاية
* مرجانة * * مرجانة * 98580_9.gif فتكات غالية قوي Fatakat 98580 الرياض – السعوديه