ازيكم يا احلى فتوكات
انا بحب السن بايتس اوي و خصوصا ان ليه طعم مميز عشان الاعشاب و البهارات اللي فيه بس مش بحب اكتر من الشيبسي و السن بايتس عشان المواد الحافظه اللي فيهم وطبعا دي بتسببلنا بلاوي
المهم انا قلت لازم اتعلم طريقته ولما نجحت الحمد لله قلت لازم اقولها لفتوكاتي حبايبي
هاقولكوا المقادير و الخطوات بس ماصورتهمش عشان ماكنتش اعرف اذا كانت هاتنجح وللا لاء بس هي سهله اوي
المقادير:
روزماري اخضر مجفف بييجي ورق وانتي تطحنيه و دا احلى من البودر الجاهزة
زعتر
بصل بودر
توم بودر
بهارات الشيبسي هاتلاقي بطعم الكاتشب و الكباب و الشطة والليمون و الجبنة والبابريكا حطي الطعم اللي بتحبيه وممكن تحطي من كل طعم شوية
وكل دا عند العطار
عيش توست او فينو المهم هاتقطعيه مكعبات صغيرة ورفيعة
زيت
الطريقة:
هانجيب العيش و ندهن كل مربع بالزيت بالفرشاه
وبعدين نحط الاعشاب والبهارات في كيس بعد ما نطحن الروزماري والزعتر طبعا و نحط مربعات العيش في الكيس و نهزه اوي هانلاقي كل قطعه اتغلفت بالبهارات والاعشاب
نرص العيش في صينيه ونفتح شوايه الفرن اللي هي فوق ونحمص العيش من الناحيتين
بس كده هايكون عندك احلى سن بايتس والله نفس طعم الجاهز بالظبط
يارب تعجبكم و لو عجبتكم ادعولي
بحبكم في الله
سلام
مواضيع هذا القسم برعاية
سمية&احمد سمية&احمد images/avatars/pacifier.jpg فتكات رائعة Fatakat 148819 القاهرة – مصر