السلام عليكم ورحمة الله وبركاته
جبتلكم النهاردة وصفة صحية تانية للسمك بعد موضوع صينية السمك والشوربة البيضا
طريقة النهاردة بقى اختها بس من افريقيا هههههههههه شوربة بنى وارز بنى ههههههههههههه الصيادية
هاكتب وصفة الصينية السنجارى الاول علشان مش الخبطكو
المقادير لصينية السنجارى
سمك بورى
توم كتيييييييييييير
ليمون برضه كتييير
خل
ملح فلفل
شطةكمونكارىزنجبيل طازة مبشور
معلقتين زيت
الطريقة
تغسلى السمك كويس اوى بملح ودقيق زى ما تكونى بتعمليله سكرب للبشرة هههههههههههه
تقطعيه حسب الرغبة ممكن تفتحى السمكة بالنص وتسيبيها بطولها بس انا باحب اقطعه زى الصورة اجزاء وكل جزء بافتحه نصين
وحطى التوابل والخل ولكل كيلو سمك 3 لمونات وتقريبا معلقة كبيرة توم مفروم ومعلقتين زيت وتغطيه لنصه بالمية وتدخليه الفرن وتطلعيه بقى زى ما تحبى لو بتحبى الصوص طلعيه كده
ولو بتحبيه ناشف ومحمر شغلى عليه الشواية لحد ما يبقى كده
وبالهنا والشفا
الوصفة التانية
سمك صيادية وارز صيادية
المقادير
كيلو سمك بورى
4بصلات
ارز
ملح فلفل
زيت لتحمير البصل
ارز
الطريقة
تبشرى البصل وتحطيه فى الحلة اللى مجهزاها للرز وترشى عليه شوية ملح علشان ميطلعش ريحة وحشة وعلشان ميشربش زيت كتير فى التقلية مش تحطى زيت من الاول سيبى البصل لوحده بالملح ينزل ميته ويشربها وبعدين لما ينشف حطى الزيت و نص معلقة صغيرة سكر علشان تساعد توصلى للون البنى بسرعة من غير استهلاك زيت كتير ولما توصل البصلة للون البنى ده
لو مش باين اللون فى الصورة البصلة المفروض توصل للون البصلة بتاعت الكشرى بعد الدهبى بشوية وقبل ما تتحرق طبعا ههههههههههههههه وممكن درجة اللون حسب رغبتك افتح شوية او اغنق شوية حسب الطعم اللى تحبيه بس نصيحة لو اول مرة خليها فاتحة شوية علشان تختبرى الطعم بس ان شاء الله الطعم يعجبكم لانه بيبقى تحفة
المهم بعد ما البصلة تاخد اللون تشيلى منها شوية فى طبق للشوربة وتسيبى الباقى فى حلة الرز وتحطى عليهم الرز المغسول والملح والفلفل الاسود وممكن شطة وتقلبيه تقليبه علشان يفلفل وبعدين تضيفى المية وطبعا لما يغلى توطى النار وبكده خلص الرز وده بيبقى شكله فى الاخر
نيجى بقى للبصل اللى شلناه على جنب للشوربة تفرديه فى طبق مسطح وترشى عليه فلفل اسود وتسيبيه لحد ما يبرد ويقرمش وتطحنيه اما بالشوكة او بالهون بتاع جداتنا او بالمفرمة براحتك انا باستسهل الشوكة لغاية لما يبقى بودرة
وفى هذه الاثناء هههههههههههههههه تكونى مجهزة حلة مالية نصها مية على اما تطحنى البصل ولما المية تغلى حطى فيها حبهان والبصل اللى طحنتيه ولما تغلى غلوة حطى السمك المغسول وسيبى النار عالية والغطا مكشوف علشان السمك يستوى بسرعة من غير ما يتهرى وكمان الشوربة تتسبك وتبقى لذيذة واهم حاجة اختارى حلة طويلة علشان تعرفى تحطى السمك جواها ويبقى متغطى بالمية وفى نفس الوقت متكونش واسعة علشان المية ما تبقاش كتيرة والشوربة تطلع خفيفة
ودى صورة للسمك بعد ما استوى
وده لون الشوربة مش باقولكم من افريقيا ههههههههههههه من بوكينا فاسو بس طعمها تحفة وان شاء الله تعجبكم
اشوفكم فى اكلات تانية صحية ومفيدة
ومتنسوش طبق السلطة الصحى والمفيد علشان تبقى وجبة صحية ومغذية
بالف هنا وشفا
رايحة فين يا حاجة منك ليها
التقييم يا قمامير
مواضيع هذا القسم برعاية
همسة بس دوشة همسة بس دوشة 467531_12.gif فتكات غالية قوي Fatakat 467531 بورسعيد – مصر
