السلام عليكم يا بنات
يلا يا بنات نبتدى ايدنا ف ايد بعض وربنا معانا كلنا عاوزة كل واحده توعدنى انها هتكون صريحه معايا جدا فوزنها وانها هتحاول بقدر الامكان مش تلخبط ولو لخبطت تدون هيا لخبطت فى ايه عشان ابقى فاهمه واقدر اساعدها وانا هحاول بقدر الامكان اديكوا بدايل زى ما الدكتوره قالتلى تمام يلا بقى نبتدى
بسم الله الرحمن الرحيم
(ريجيم منخفض السعرات) …………. اول ريجيم ادتهونى الدكتوره من 5 سنين وخسيت فيه 6 كيلو ودا فالبدايه بينزل وزن الزائد حديثا والمايه (يعنى مش الدهون التقيله )فدى اول خطوه وهتلاقوا اكله حلو وكتير وانا هديكوا نصايح الدكتوره والخطوات الى انا كنت بعملها وساعدتنى والريجيم دا ممكن تحذفى منه لو مش قادره تاكلى الاكل كله لكن متضفيش اى حاجه خارجيه ووجبه الافطار ضرووريه هيا والغداء لكن العشاء يمكن حذفه .
الافطار : بعد الصحو من النوم ويفضل من الفتره (7 :11 ص ) ممنوع حذف الافطار
1_ كوب شاى او كوب قهوه او كوب ينسون …. يمكن اضافه نصف ملعقه سكر او ملعقه او كوب حليب خالى الدسم او واحده كوفى ميكس الى بدون سكر دى ( لمحبين النسكافيه ) ويبنات خدوا بالكوا مشروب المغات والحلبه الحصاه ممنوعه ممكن لو اتزنقتى ونفسك فحلبه تبقى كوبايه واحده بس فالاسبوع كله من الحلبه الحصاه .
2_ بيضه مسلوقه او شريحه صغننه من الجبن الرومى او 3 ملاعق جبنه قريش بدووون زيت يا بنات ممكن تحطى شويه شطه عليها بيبقى طعمها تحفه او 3 ملاعق فول مدمس بدون زيت او سمنه او علبه زبادى منزوع الدسم ( للى مش عاوز يشترى جهينه خالى الدسم يجيب زبادى اللبان ويشيل وشه كله القشطه يعنى )او مثلث نستو او قطعه جبنه بيضاء فى حجم مثلث النستو…… ملحوظه مسموح بتناول عنصرين
معا فالافطار بس بشرط يكون بنفس الحجم الى انا كتباه ناو .
3_نصف رغيف بلدى او رغيف سن صغنن او 2 توست ريجيم او 4 بقسماط ساده ولو اشتريتى ام سمسم هاتى سكينه واكحطى وشيلى السمسم كله يا بطوطه .
بعد الفطار ب 3 ساعات : ثمره فاكهه او كوب شاى بحليب منزوع الدسم او خيار او عصير طبيعى بدوون سكر .
الغداء: بعد الفطار (6_7) ساعات يعنى لو فطرتى 7 تتغدى 1 او 2 … تناولى الطعام بالترتيب اذا استطعتى
1_سلطه ( خياره +طماطمايه +خسه او جزره +فجل وجرجير)=نص كيلو خضار
2_ قطعتين لحم احمر ( مسلوقه او مشويه ) او ربع دجاجه بدون جلد( مسلوقه او مشويه وشيلى الجلد ) او 2 سمكه مشويه او علبه تونه
متصافه من الزيت ومغسوله بالخل ( بصى بتفتحى العلبه بس مش قوى عشان تعرفى تنزلى الزيت كله وبتضغطى عالغطا لحد ما الزيت ينزل كله وبعدها تقومى حاطه الخل من الفتحه وترجيها شويه بعدها تقومى ضاغطه ومنزله الخل بعدها تفتحيها كلها وتحطيها فالطبق … انا كنت بحب ازود حبه شطه ونص لمونه وكنت بقطع سلطه عليها ) او تونه دايت والى مش قادر يجبها او مش لاقيها عنده يعمل زى ما انا شرحت فطريقه تصفيه التونه او 2 بيضه مسلوقه او 5 ملاعق فول او جبنه قريش او طبق صغير شوربه عدس .
3_ طبق خضار متوسط (جميع الخضروات مسموح بيها ما عدا القلقاس ) مسموح باستخدام سمنه او زيت خفيف ( خفيف يعنى متدلقيش ازازه الزيت يعنى حجم ملعقه صغننه كدا بتاعه الشا ىوانا عن نفسى كنت بحبها فالمايه وسعات كنت بحط حته اللحمه او الفراخ جواها وهيا بتتسلق غفبتدى طعم وماما كانت بتزود لى بقى ورق اللورى والريحان بتبقى تحفه ) مع بصل وثوم طماطم وتوابل بشوربه بدون دسم (شيلى وش الشوربه لو عندك )
4_نصف رغيف بلدى او رغيف سن صغنن او توست ريجيم او 8 ملاعق رز ومكرونه او 10 صوابع محشى لمحبين المحشى او خرطه واحده بس ها يبنات بسسسسس مكرونه فرن او خرطه رقاق او جلاش .
ممنوووووع المخللاااااااااااااااااااااااااااااااااااااااااات .
5_ فاكهه بعد الغداء بساعتين(2 ثمره برتقال او تفاح او يوستفاندى او كومثرى او جوافه او 2 موزة صغيره او 2 شريحه بطيخ او شمام او واحده مانجو صغيره قوى او 6 حبات خوخ او 6 حبات مشمش او 6 حبات برقوق او 10 حبات فراوله او نصف كنتالوب ماعدا العنب والبلح والتين دولا ممنوعين )
العشاء: قبل النوم بساعتين متكليش وتنامى ابدا خديها من المحرمات عندك وعودى نفسك عليها لانها دى المصيبه خاصه فالشتا ناكل وننام وحاجات تانيه تكبر وانتوا فاهمنى بقى بلاش احراج ههههههههههههههه(يمكن حذف العشاء)
1_زبادى منزوع الدسم او اى بديل من بدائل الافطار
2_ 1 طماطم او خياره + كوب شاى بحليب منزوع الدسم …………. يمكن استبدال العشا بطبق سلطه كبير (دا اخف عشا) او 3 ثمرات فاكهه او كوب زبادى او شاى بحليب منزوع االدسم + 2 ثمره فاكهه.
مسموح ب 3 ملاعق سكر طبيعى فاليوم والباقى داااايت .
تعليمات مهمه للريجيم :
1_ شرب الماء 8 كوبايات مايه فاليوم . انا مش بشرب مايه كتير بس كنت كل ما اروح المطبخ املا كوبايه واشرب لحد ما اوصل ل8.
2_2 كوب ماء بارد قبل كل وجبه ب نص ساعه
3_ الشرب اثناء الاكل ممنوع يا بنات .
4_ بعد الاكل مباشره كوب ماء واحد.
5_ بعد الاكل ب 3 ساعات نبدا نشرب اكبر كميه ماء ممكنه وسوايل ماعدا المحظورات حتى الوجبه التاليه .
6_ المشى مده نصف ساعه يوميا تتدرج الى ساعه كامله بعد كده فالريجيمات التانيه خطوه سريعه شدى ضهرك واستقيمى واشفطى بطنك وهوب هوب 1 2 1 2 ولو انتى زى حالاتى مبتنزليش كتير ( حطى ايدك فوسطك واشفطى بطنك واستقيمى فضهرك وهوب هوب امشى فمكانك وانا كان بيساعدنى انى كنت بشغل اغانى حماسيه تشجعنى كدا وتخلينى عاوزة انط فمكانى ) والمشى لازم يكون قبل اى وجبع عشان المعده تكون فاضيه او بعد الاكل ب 3 ساعات .
ربنا معانا كلنا ويلا اقروه وتواصلوا معى عاوزة تقرير يومى لو قدرتوا
zekryate zekryate 817828_2.gif فتكات هايلة Fatakat 817828 القاهره – مصر