نقول بسم الله كده ونشمر
يافتوكاتي عزيزاتي انا النهاردة جيبالكم ديك رومي تحفة وسهل ومش محتاج توديه يستوي برا ولا حاجة وبيسعف جدا لما بتبقي محتارة في عزومة وعايزة حاجة تشرف وشكله عل السفرة جميل جدا ومابياخدش وقت كبير زي التسوية الكاملة في الفرن
وانا فكرت في الطريقة دي لان فرني علي ومافيهوش شواية
هانعمله وهانقدم معاه رزبسمتي وصنية بطاطس بالصنوبر و البيبي كاروت اللي هو الجزر الصغير وممكن طبعا بالجزر العادي بس الصغير بيبقي مسكر وشكله جميل
مقاديرنا لديك رومي وزنه3 كيلو ونص
ملح فلفل ببريكا عشان تحمر اللون السبع بهارات ولو مش موجودين هانبدلهم بقرفة ناعمة وحبهان مطحون وجوزة الطيب وذرة كسبرة
ربع كباية زيت 3 معالق خل كبار عصير ليمونتين كبار بصلة كبيرة 5 فصوص ثوم
الاول هانجيب المرحوم ونغسلة كويس جدا ونصفيه من ميته
ونفرم البصلة والتوم ناعم في الكبة وبعدين نضيف عليهم التوابل ونفرمهم ونحط عليهم المكونات السايلة وناخدهم لفة
نيجي بقي لمرحلة التتبيل ومحتاجة خفة يد شوية لاننا هانفصل الجلد من علي اللحم عشان نحط التتبيلة بينهم ومش عايزين في الجلد اي قطع عشان في التسوية مايتحرقش
بعد ماسلكتي بايدك بين الجلد واللحم وخاصة من عند منطقة الصدر لانها فيها اللحم كله هاتبدي تحطي التتبيلة وتوزعيها كويس وبالتساوي تحت جلد الديك كله وهاتدهنيه بالتتبيلة من برا كله تحت الجناحات والفخاد ماتنسيش هاتحطي جواه 4 فصوص حبهان وزيهم قرنفل وتكتفي الفخاد في بعض زي الصورة ومعاهم الكبد والقوانص والرقبة
هاتغطيه وتسبيه في التلاجة اقل حاجة 12 ساعة
بعد كده هاتلفيه بخيط تخين شوية زي بتاع اللحمة الباردة وده ل3 اسباب اولا عشان يبقي شكله ملموم كده وحلو بعد ماييستوي ثانيا عشان تعرفي تتحكمي فيه وهو بيتحمر ثالثا عشان مايدخلش فيه ميه وانتي بتغسليه …………ايوه بتغسليه هاتاخديه بعد ماتلفيه بالخيط وتقفليه بالخله كمان لو احتاج الامر وتاخديه علي الحوض وتحسسيه بحنان الام وتنزلي من عليه كل التتبيلة عشان ماتتحرقش في التحمير بس طبعا خليكي حريصة وبلاش بلبطة مش عايزين مية تدخل جواة ولو حسيتي ان الموضوع هايوسع منك مممكن ببخاخة فيها ميه تعملي نفس المهمة
خلاص خد الدش التمام بمنديل نضيف كده ونشفيه خالص
التسوية بقي
هاتجيبي اكبر حلة عندك ويفضل تكون تيفال وتحطي فيها حوالي تلت كيلو من سمنتك الحلوة اللي ريحتها هاتملي البيت حالا بلاش سمنة سيكو سيكو عشان ده ديك بقي ومابيزورناش كل يوم
هاتقدحي السمنة كويس وبشويش هاتحطي فيها الديك
وهاتبدئي تحمري كل وش من الديك كويس جدا وبالراحة وطبعا وانتي بتقلبيه يبقي بمعلقة وشوكة كبار اوي اي حاجتين عشان تعرفي تقلبيه
هايتحمر الديك كويس خالص يعني توصليه للون اللي يعجبك
هاتشليه من الحلة عشان تصفي السمن اللي نزلت منه مع التوابل لاننا هانحتاجها كمان شوية
وبعدين هاترجعيه تاني الحلة وتزودي عليه ميه مغلية وشوية ملح وورق لورا وتسبيه يتسلق تمام بس مايتهريش لحد ماتلاقي ناقص علي ان يخلص 5 دقايق وبعدين تقفلي النار
في الوقت ده هاتكوني محضره صنية كبيرة ياريت يكون جوانبها عاليه وتحطي فيها البصل والبطاطس وشوية تتبيلة من اللي تبلنا بيها الديك في الاول
وبعدين هاتصبي شوية السمن اللي نزل من الديك كمان وتدخليها الفرن في الوقت اللي الديك فيه بيتسلق
كده الديك ناقصله 5 دقايق سوا والبطاطس كمان هاتوسعيله مكان في نص الصنية وتحطيه مع البطاطس في الفرن يكملو سوا وينشف شوية
بعد 5 او 10 دقايق خرجيه وبالف هنا
وطبعا نست اصوره لان الضيوف وصلوا
مواضيع هذا القسم برعاية
زعيمة الطققان زعيمة الطققان فتكات نشيطة Fatakat 199680 الدوحة – قطر