ازيكم يافتوكات
بقالي زمان معملتش مواضيع مفيده
ولانى فعلا كنت ميح من اول مابدانها نجهز اختي من حوالي 3 سنين وبفضل الله والفتاتيك اللي زي العسل عرفت ايه الحلو وايه الوحش.. وبعد ماجهزنا اختى وكنت بجيب معاها الحلل والتقايل… بقيت اتسلي في جهازي انا مع اني مكنتش مخطوبة اصلا ( ربنا يسعد كل بنت دعيتلي ويقر عينها بماتتمنى ويفرح قلب كل البنات ويرزقهم الازواج الصالحين )
المهم انا حبيت افيد اللى معلوماتها ميح زى منا كنت من 3 سنين
اول حاجة
حتى لو مش مخطوبة.. ابداي جهزي نفسك.. والسؤال البديهي تبداي بايه.. ابداي لو معاكي مبلغ بالحلل وتقايل ورفايع المطبخ وطبعا مش هوصيكي اجنده صغنونة نصها تكتبي اللى انتى عاوزاه ونصها التانى تقيدى اللى جبتيه باللون والسعر.. لو ممعكيش مبلغ بس كل شهر ولا حاجة بيبقى معاكى فلوس من مصروفك او مرتبك. بيجامة عجبتك بلوزة اى حاجة حتى لو بنطلون استرتش هاتيه وعينيه ( تجنبي الابيض واى حاجة فيها استك رخيص او طباعة وحشة ممكن تلزق في الهدوم التانية ) ومتنسيش تعيني الحاجة بحرص وتحطى معاها صابونة بورقتها مفتوحة من جنب واحد
انتى كده هتجيبي اللى على زوقك واللى يليق عليكي ويخليكي مزة في البيت وكمان هتلاقيكي خلصتي جزء كبير من لبس البيت ومش هتحسي ان انتى بتكعي مبلغ وقدره ساعة الجواز
تاني حاجة
طبعا هتكلم عن الاماكن اللى اعرفها وجبت منها
حاجات المطبخ
التقايل من درب سعاده صحيح بتفاصلي بردو بس الزحمة اقل ومبيضربوش السعر في العالي زى حمام التلات.. وبالله عليكي افرزي حاجتك قبل ماتدفعي الفلوس وتمشي وانتبهى ليكون خبطة في حلة او اي عيب.. وعينك على حاجتك لحد ماتاخديها وتمشي لان في بياعين ضميرهم ميت
الرفايع.. اوانى قدام مستشفى الهرم في المريوطية.. تيوليب شارع مصدق.. ذاكيتشن ستورز شارع مصدق.. واحسن المونيوم من النبراوي في سوق الخواجات في المنصورة متفرع من شارع بورسعيد .. وعوض الله في المنصورة جنب المجزر.. وكمان لايمكن انسى ايكيا حبيب قلبي ادوات المطبخ عنده اسعارها معقوله مش كلو غالي وهو في كايرو فيستيفال سيتي في التجمع الخامس.. وكمان الهايبرات بيبقى فيها رفايع مطبخ حلوة
الهدوم.. كنت بلقط من محلات بواقي التصدير زي شعبان وستوك زون وكده.. وفى ايام التخفيضات ( ربنا يكرمها مشمشة صاحبة موضوع التخفيضات ) بروح المحلات الغالية اجيب كام حاجة كده على حسب الميزانية.. ولما ربنا بيفرجها بجيب بيجامة نضيفة تركي وللا حاجة من على النت او فى المحلات هتلاقوها في محلات كتير بقت منتشرة وهتلاقوها في الغورية وسوق غزه
الملايات والمفروشات والفوط.. دول بصراحة جمعتلهم مبلغ وعالغورية علطول
ولما ربنا اذن بالخطوبة يارب يتم على خير وعقبال كل البنات ياااااااااارب.. كتبت اللى ناقص وبتسلى فيه
اللي عاوز يعرف اي معلومة عن الاعداد ويجيب ايه هيلاقي في توقيعي موضوع جهاز العروسة بالتفصيل الممل.. وللامانة هاااااتى الاعداد اللى على قد ميزانيتك واللى تحسي انه ميبقاش افترا
وامانة عليكو ادعولي يابنات ربنا ييسرلي امري عاجلا غير اجلا ويرزقه من حيث لا يحتسب رزق واسع طيب حلال مبارك فيه ويبعد عننا شر كل نفس تكرهلنا الخير ويشغلها بنفسها.. ويارب كل بنوته دعتلي في يوم ماتشوف شر ابداااااا غير السعادة ماتشوف.. ويرزق كل سنجلاية الزوج الصالح.. ويتمم لكل مخطوبة على خير.. ويرزق كل مشتاقة.. ويهدي لكل ام عيالها وجوزهة ( وحماتها )
fairouzelhendy fairouzelhendy 214025_2.gif فتكات رائعة Fatakat 214025 cairo – egypt