السلام عليكم ورحمة الله وبركاته
ازيكم يا بنات ايه الاخبار عندكم يا رب تكونوا كلكم بخير
انا لقيت المدونة ده وانا محتارة اوى قبل الخطوبة والصراحة ساعدنى وانتوا ساعدتونى كتير
والحمد لله الخطوبة عدت على خير امبارح
وحبيت بس افيدكم بشوية اراء عن تجربه احسن من السمع برضه ويا رب كلامى يساعد اى واحدة من اسكندرية لسه بتبتدى الحيرة دى من الاول
اولا
قبل اى حاجة يا عروسة بعد تحديد ميعاد الخطوبة انشالله تنزلى تلفي على فستانك
وعشان مش تحتارى كل ما تسالى الناس حتقعد تقولك على اتيليهات كتير اوى في الشرق والغرب
ريحى نفسك ونقي كام اتيليه مشهورين على السمعة بس ولما ما تلاقيش حاجة عجباكى فيهم ابقي دورى بقي في حتت تانية يعنى انا حقولك مثلا انا لفيت فين ولقيت فساتين كويسة وبرضه البنات اللى هنا اللى عندها مكان زيادة تحطه واهه مساعدة يا بنات ربنا يدينا عليها ثواب
اول حته انصحك تنزليها مول وطنية في لوران لانه فيه اشيك فساتين ممكن تلاقيها وخاصه عند اتيليه مدام سميرة الفساتين بتاعتها رقيقة جدا وزوقها عالى وفريال الشاعر وفي واحد في الدور الارضي برضه على ايدك الشمال اول ما تدخلى
وبعد كده طبعا فيه وليد زهير والعسال وش ابو قير عامة زوقه عالى اوى
بالنسبة لمنال القاضي يا بنات فساتينها قديمة شوية
اما بقي احذرى بجد وعن تجربه من داليا البحيرى على الرغم من ان الفساتين اللى هناك شيك اوى بس التعامل وحش جدا مع العرايس انا روحت هناك واللهى ولقيت عروسة جت تستلم فستانها لقيته طالع واحدة تانية واخداه والحكاية دى اتكررت مرتين قدام عينى ده غير الوصولات اللى العرايس بيمضوا عليها على بياض دى من غير تمن معين والفساتين مش بتروح دراى بانتظام
يعنى باختصار بلاش منه عشان تبقي مطمنة على نفسك وانك حتلاقي فستانك انشالله كويس
ثانيا بقي الكوافيرات
اهم حاجة وانتى بتنقي انك تروحى تشوفي بنفسك وقت خروج العرايس بيبقي شكلهم عامل ازاى عند اى كوافير في دماغك
ومش تتكسفي تطلب منه صور او ميعاد تيجى تشوفي فيه اللى موجودين
وتسالى على البروجرام اللى حيعملهولك سواء كنتى محجبة او لا
والاسعار طبعا
انا عن نفسي كنت عند كوافير سكر في ش سوريا والحمد لله الراجل شغله تمام اوى ومريح واحسن حاجة هناك انهم بياخدوا رايك في نوع الميكب والطرح اللى عايزه تعمليها واحسن واحدة هناك بتعمل ميكب اسمها ندا وفيه كمان مدام جيهان وعن السعر بياخد 400 جنيه في الخطوبه و800 زفاف ده لو محجبة وبيعملك كل حاجة تقولى عليها
بعد كده وليد جيجي والمعاملة هناك مش لذيذة شوية عشان مش بياخدوا رايك في اى حاجة وكمان العرايس الزفاف عنده احلى بكتير من الخطوبة بالنسبة للسعر الخطوبة 500 والزفاف 700
وطارق الصغير كمان حلو اوى بس عن تجربه شخصيه خدى بالك يا عروسة بيسمر اوى
فيه واحد بقي اسمه احمد كلاسيك في شارع القاهرة في سيدى بشر شغله جميل اوى برضه وبياخد خطوبة 350 وزفاف 500
وفيه منعم ده في ش محرم بيه ومشهور جدا وخبرة فظيعه وده بياخد خطوبة 250 وزفاف 400
بعدين في ايه ؟؟ اه الاستديو
من الاخر يا بنات بجد استديو فرح اللى في شارع سوريا احسن استديو في اسكندرية دى مش فيها نقاش بجد الصور بتتظبط عنده جامد والمناظر جديدة مش تقليدية وبتبقي متدلعه على الاخر
ده غير انو مش بيفرض عليكى عدد مناظر بالعكس ده عامل تسعيره المنظر ب 65 جنيه وبتاخدى مرتين صورة تبقي عندك وصورة عند العريس وعلى حسب عدد المناظر اللى انتى عايزاها بقي بيحاسبك بس لو اختارتى 6 مناظر بتبقي فيه هدية اللى هيا ايه بقي
الست مناظر بتوعك مرتين 6 عندك و 6 عند اهل عريسك
وبتاخدى بوستر كبير لاى صورة تختاريها متبروزة
وكمان بتاخدى 12 صورة صغيرة توزعيها على صحابك وقرايبك للمناظر كلها وطبعا وسعر كل ده 400 جنيه
وفيه طبعا استديو غزال مش محتاج كلام برضه وسعره 300
وفيه كمان ركوادور تحفه ومتجدد مش عارفه السعر بالظبط
كده فاضل حاجات صغيره حبقي اكملها بعدين ويا ريت يا بنات اللى عندها اضافه تتفضل او تحكى عن تجربتها هيا عشان نتناقش كلنا ونساعد بعض ومبروك لكل العرايس
واللى عايزة تسال عن حاجة انا في الخدمة
اسكندرانية جدا اسكندرانية جدا 156321_1.gif فتكات متميزة Fatakat 156321 مدينة الحب – دولة الاحلام