بسم الله الرحمن الرحيم
السلام عليكم و رحمة الله و بركاته
بداية هذا اول موضوع لي في منتداكم الحبيب الى قلبي و الذي اتابعه منذ فتره و لكن هذا هو اول ما سأكتب لكم اليوم
كلنا عارفين ان اجازة الصيف قربت و معاها المصايف و الخروج و كتير مننا عايز يخس و اكيد انا اول واحده فيكم نفسي اخس اوي
عشان كدا فكرت اعمل موضوع نشجع فيه بعض و نكون اكتر من بنت ماشين على نفس النظام و نخس مع بعض كلنا باذن الله و نوصل للوزن اللي احنا بنتمناه
هنكون جروب من البنات او السيدات و كلنا هنتبع نظام غذائي واحد ( موجود تحت )
و هو نظام قاسي و محتاج اراده و عزيمه و لازم نتعب عشان نخس بسرعه معلش كله يهون و برضه نشجع بعض و هنتشجع اكتر لما كل واحده تشوف وزنها بيقل كيلو بعد كيلو لحد ما توصل للي هي عايزاه
مش عايزه حد يقولي كدا مش صح او كدا مش صحي لان لو هيبقى في شوية انيميا او دوخه اكيد اهون الف مره من الحاله النفسيه اللي انا وصلت ليها انا حتى مبقتش بخرج من البيت حتى الدروس بقيت بلغيها لأني مش عارفه البس خالص و كل لبسي القديم داق و بقى مش نافع
و انا هنزل مصر كمان شهر تقريبا و بكره جدا و بتحرج لما حد يقولي ليه تخنتي كدا او حتى يقلولي وشك حلو و اموره بس ليه مش تخسي .
و الله حاسه اني بقيت معقده و اني كل ما اروح مكان الناس بتبصلي مع ان دا وهم طبعا
انا عارفه ان في بنات كتير عندهم الاحساس دا بس انا خلاص قولت ستوب انا مش هفضل كدا علطول من حقي اعيش سني
و عايزه بنات كتير تقول معايا ستوب لحياة اللخبطه و الجسم الوحش و العقد و تقول اهلا بالجسم الرشيق و الشياكه و الصحه و الاهم من دا كله الثقه بالنفس
شعار جروبنا هيكون ( هخس و أغير حياتي ) و اسم الجروب هيكون ( انا حلوه )
انا حاسه اني رغيت كتير بس انا حاسه اني محتاجه افضفض شويه لأني محتاجه تشجيعاتك
اول حاجه شروط الانضمام لجروب (انا حلوه )
1- انا بريئه امام الله من كل واحده تستخدم جسمها او شكلها ان شاء الله بعد ما يتحس في امور تغضب الله عزوجل .
2- الاشتراك في الجروب خاص بأعضاء مدونة فتكات و الاشتراك هيكون بأن تبدي رغبتك بالانضمام للجروب في الرد و تقولي طولك و وزنك التقريب و الوزن اللي انتي بتتمنيه
3- هتبدأ المشتركات في الجروب بالاشتراك في الفتره من 26-5 لحد تاريخ 1-6 و بعد كدا محدش يشترك الا بعد شهر لو نجح الموضوع هنفتح باب تاني للاشترك من جديد في اول سبعه لأ2-6 هنبدأ الرجيم مع بعض ان شاء الله
4- الرجيم هيكون صعب شويه لازم الاراده و الجديه في التعامل عشان ( مفيش حلاوه من غير نار ) و لا ايه
5- هيكون في يوم مفتوح كل اسبوع تقريبا هنحدده مع بعض تابعينا .
6- ضرورة كتبة اليوميات يوميا و اللي هتتأخر لمده 5 ايام هنعتبرها منسحبه من الجروب .
7- قياس الوزن هيكون كل اسبوع كلنا نقيش في نفس اليوم و هنتفق على اليوم المناسب مع بعض .
7- متنسونيش بالدعوات لو الفكره دي نجحت
تاني حاجه نيجي للنظام الغذائي و دا مجرب و اكيده نتيجته لو التزمتي صح اوي ممكن تخسي اكتر من كيلو في اليوم انا مره عمالته 3 ايام بس جد اوي و خسيت فيهم 5 كييلو تقريبا ( و الله حصل انا مش كدابه ) بس طبعا لاني لخبطت الدنيا بعدها زدت تاني بس انا اللي كنت غلطانه و مش هكرر الخظأ المرادي ان شاء الله
بالنسبة للفطار
الفطار ثابت كل يوم و هيكون 1.5 لتر ميه على الريق اول حاجه ممكن تعصري عليهم ليمون يكون افضل و دا يكون الفجر و بعدين تدخلي تنامي عادي
و لما تصحي و متتأخريش في الصحيان لأن الحرق الصبح بيكون عالي عايزين نستغل الموضوع دا اعملي سبورت خفيف ممكن ايروبيك او رقص ( يا رتني بعرف ) لمده لاتقل عن ربع ساعه او مشي سريع لمده نصف ساعه او اي رياضه تختاريها بس متكتريش عشان متجوعيش و جسمك يهلك اكتر رياضه خفيفة بس
الفطار بقى كوباية نسكافيه او شاي من غير حليب او حليب خالي الدسم مع معلقه صغيره عسل طبيعي ( اجباري عشان ننشط الحرق بقيت اليوم )
و بالنسبة للغدا
اول حاجه تاكلي سلطه خضرا عاديه من بتاعتنا اي خضار بأي كمية بس الدريسنج ( التتبيله ) يكون عبارة عن ( خل – ليمون -كمون – ملح – فلفل – قليل جدا من زيت الزيتون – ممكن شطه او ماسترد اختياري )
و تاكلي صدر فرخه من غير جلد طبعا أو شريحة لحمه متوسطة الحجم بدون دهن مسلوق او مشوي طبعا ممنوع المحمر او ممكن بيضتين مسلوقين او فول او علبة تونه بالميه او سمك مقلي او مشوي مش تفرق نص كيلو تقريبا اتوقع الاختيارات كتيره شوفي انتو عاملين ايه و كلي المناسب ليكي من بين الاختيارات
و هو دا الغدا
و بالنسبه للعشا
هو ثابت عباره عن زبادي قليل او خالي الدسم مع تفاح بأي كمية
و* لو جعنتي بين الوجبات ممكن تكلي ( خيار – خس – تفاح – كيوي – اناناس – بطيخ – شاي او نسكافيه بدون سكر و بدون حليب ) و يكون بأي كميه براحتك وفي اي وقت
و نصيحة صغيره لو حسيتي انك جعانه اعملي شاي و يكون تقيل اوي زي الشاي الصعيدي و بدون سكر هيكون مر خالص و هيسد نفسك انا مجرباه
*
احنا هنعمل الرجيم دا لمدة اسبوع و الهدف نخس سبعة كيلو ( يا رب ) و بعدين نقيس وزننا تاني
يلا مستنيه المشتركات و التشجيعات و اي استفسار او اعتراض على اي حاجه انا معاكم يا حبايبي
و يا ريت الجديه في الرجيم المرادي عشان انا وانتي حلوين و هنبقى احلى لو خسينا
لولي الحلوه لولي الحلوه فتكات رائعة Fatakat 276314 العاشر من رمضان – مصر