السلام عليكم ورحمه الله وبركاته
حبيباتى واخواتى القمرات
النهارده جبت لكم طريقه الحمام المحشى بالفريك علشان كل البنوتات تعمله وتاكل صوابعها وراه
اولا يابنات لازم الفريك يتنقع فى ميه قبل ما نبدء نعمل الخلطه على الاقل ساعه منقوع قبلها لانه بياخد سوى كتير وممكن الحمامه تستوى وهوا لسه مستواش
ثانيا : هنجيب الحمام ونغسله كويس بالميه والملح والدقيق وننضفه من الريش الصغنون ونركنه على جنب ونجيب الكبد والقوانص بتاعت الحمام ونغسلها كويس ونقطعها قطع صغيره
ثالثا : هنعمل الخلطه وهيا سهله جدا
* هنجيب الحله على النار ونحط فيها حته سمنه ونقطع بصلتين صغيرين ونحمرهم لحد ما يصفروا
* هنجيب الكبد والقوانص اللى قطعناهم ونضيفهم على البصل ونقلب شويه لحد ما ينشف من الميه ويتحمر
* هنجيب الفريك اللى احنا ناقعينه فى الميه من ساعه تقريبا ونصفيه كويس من الميه ونحطه على البصل والكبد والقوانص ونقعد نقلبهم كلهم مع بعض لحد ما نلاقيهم بقوا مندمجين مع بعض
* هنحط الملح والفلفل والبهارات والشطه وشويه قرفه ونقلب تقليبتين ونطفى النار وممكن نضيف مكسرات وزبيب اختيارى
ملحوظه : فيه ناس بتحب تضيف خضره على الخلطه بس انا بحب احطها على الارز لكن مش بحب احطها على الفريك ودا طبعا اختيارى .. وناخد بالنا ان الفريك بيزيد فمنعملش كتير
كدا نكون خلصنا الخلطه والحمام جاهز للحشى
هنجيب الحمامه ونحشيها من جوا بس هننبه تانى منحطش فريك كتير لانه بيزيد
وبعدين هنحشيها من عند الرقبه
وبعدين هنحشيها فى الجزء اللى بين الصدر والجلد
وطبعا طريقه الحشو على حسب رغبه كل واحد
رابعا : هنحط حله وفيها ميه وبصله وطمطمايه وملح وفلفل ونستنى لما تغلى وبعدين نحط فيها الحمام بالراحه وناخد بالنا منه فى التسويه علشان ميتهريش
وبعد مالحمام يستوى هنطلعه بالراحه من الشوربه ونحطه فى صينيه وحته سمنه ونحمره وبالهنا والشفا
طبعا النت طلع عينى على ماخلص الموضوع مش طالبه منكم غير دعوه طيبه بظهر الغيب ليا ولزوجى وابنى ربنا يحفظهملى يارب وانا بحط المواضيع دى بنيه الصدقه الجاريه يمكن لما اموت حد يقراها ويتعلم شئ وابقى انا السبب وربنا يرزقنا ثواب النيه يارب
ومتنسوش التقييم لحسن هاكل الحمام لوحدى ومش هدى لحد اى حاجه خالص وهاخد موقف كمان مواضيع هذا القسم برعاية
mama nonia mama nonia images/avatars/orangeflower.gif فتكات رائعة Fatakat 803827 مصر – مصر