السلام عليكم ورحمه الله وبركاته
انا جايلكو النهارده اقولكو على حاجه جميله اوى انا صحيح اتجوزت بقالى 8 شهور اهو الحمد لله
بس لسا بدخل القسم هنا بحب اشوف الجديد بصراحه
واستفاد من تجارب الناس اللى متجوزه
بس انا وانا بلف فى القسم من قبل ماتجوز لقيت بنات كتير ماشيين بمبدا انهم يجيبوا الضرورى والى هيحتاجوه بس
عشان الكركبه وعشان دى دماغهم بصراحه او حتا ظروفهم ودا مش عيب ولا حرام
او حتا واحده متجوزه وحابه تجدد مطبخها
وانا بصراحه مشيت بمبدا الضرورى فى المطبخ
ولقيت ان دا عين الصح بعد الجواز عشان الكركبه
وعشان ان الغالى منه فيه منا مش هروح اجيب خمستاشر طقم حلل
و تسعه اطقم صوانى
مش داخله حرب انا
دا ياربى هما حلتين او تلاته بالكتير بيبقوا على البتوجاز
والباقى لسا متعان
وخلينا المره دى نتكلم عن الحلل
فيه بنات دلوقتى بقت محتاره تجيب
الحلل السراميك ولا التيفال ولا التيفال التركى ولا الايطالى
ولا السيراميك التركى ولا الايطال
انا هقولكو عن تجربتى بصراحه
اولا دا لابد منه الاستانلس
يعنى عملى شويه
وتقدرى تعملى فيه شوربه مكرونه خضار
وبشوفه عملى اكتر من السيراميك والتيفال
وانا جبت الكوركماز التركى
دى نقطه
التيفال ظهر منه انواع كتير
تركى وايطالى والمانى
بصراحه عن تجربتى
حلل السافلون التيفال جميله جدا وتقيله وحلوه
وفيه كوركماز التيفال التركى برده جميل جدا انا عندى منها المكس جريل وخامتها ماشاءالله تحفه
بس مجربتش الحلل منها ومعرفش اذا اصلا فيه منها حلل فى السوق ولا لا
بس اكيد فيه انا كنت مركزه مع السافلون اكتر
كمان فيه التيفال الايطالى دا جميل جدا
وميزته ان الايد بتاعته منها فيها تيفال مش زى الايدين اللى ممكن لو النار عليت عليها تشيط
وعشان تتجنبى المشكله دى
كل حله بيبقى ليها مقاس العين بتاعه البوتجاز بتاعتها يعنى ماتحاوليش تحطى حله مقاسها صغير على عين كبير
وترجعى تقولى الايد شاطت
وفيه التيفال الارشا دا هنا فتوكات بصراحه بيشكروا فيه بس بصراحه مجربتوش
وانا من النوع الى بمشى ورا رايكو وانا مغمضه
طيب نيجى لى الحلل السيراميك
بصوا عن تجربه البدرينى الايطالى احسن من الفالز التركى عن تجربه
صحيح اغلى
بس بجد كخامه انضف واحسن
وانتو مش هتشتروا كل يوم حله
طيب نيجى للمقاسات بالنسبه للبنات اللى مش عاوزه تجيب حاجات كتيره
وفى نفس الوقت يبقى متوفر عندها كل المقاسات
انا هقولكوا فكره جميله اوى
طبعا المقاسات بتبدى من مقاس
20
22
24
26
28
30
32
ودول اكيد مش هتجبيهوهم لانهم كبار اوى
ممكن اخركوا يبقى 30 انما ال 32 دى صعبه
وكبيره اوى ماشاءالله
فانتوا ياعرايس هتعمو ايه
فرضا
هتجيبوا الاستانلس كامل زى ماتحبوا
واللى عاوزه توفق بين السيراميك والتيفال تعمل ايه
من اول مقاس 20 تجيبى مثلا المقااس دا تيفال
والى بعده يعنى 22 تجيبه سيراميك
يعنى واحده وواحده وهكذا عشان يبقى عندك كل المقاسات
وبالنسبه للى مش حابه السيراميك
ممكن تعمل الحركه دى مابين الااستانلس والتيفال
برده وبكدا برده يبقى عندك كل المقاسات
وربنا معاكو ياللى بتجهزوا
والصوانى يابنات
مش لازم تجيبوا كله تيفال
بجد يابنات الصوانى الالمونيا
جميله اوى انا مجبتش منها غير تلاته بس ندمت انى مكترتش منها لانها بتبقى حلوه فى الكيكات والحركات دى
ودا رايى
وربنا يسعدكوا يا عرايس وربنا يعينكوا على الجهاز وتجيبوا احسن حاجه
واللى مش مخطوبه تتخطب وتجهز ويطلع عينها بس براحه مش اوى هههههههه
ربنا يسعدكوا ويهنيكوا يارب
ويارب موضوعى يعجبكوا ولو عجبكوا
يبقى انا على الطريق الصح انى اكون ست بيت
سوبر مصريه سوبر مصريه 302986_44.gif فتكات ست الكل Fatakat 302986 المنصــــوره – مصر