السلام عليكم و رحمه الله
اكيد ده موضوع شاغل تفكير حوامل كتير و انا منهم . و كنت باكل اي حاجه في اي وقت و طبعا مع قله الحركه الواحد تقل و تخن غير انه مش بياكل حجات مفيده عاشان خاطر البيبي..
المهم انا قررت اني اغير الموضوع ده و فعلا ابتديت من شهرين تقريبا اخد بالي من اكلي و حاسه بفرق كبير جدا خصوصا اني مبقتش مدايقه نفسيا من اني بهمل في صحه البيبي.
فقلت انا لازم اجي اشارك الفتوكات باللي بعمله علشان نشجع بعض و كلنا نستفيد.
مبدئيا لازم اول مره تحضري حاجات علشان تريحك بعد كده و متكسليش في النص.
زي مثلا:
– مبقتش انزل من البيت الا لما اكل بيضه او 2 لان الدكتور نصحني بكده. في الاول حسيت انهم كتير بس بحثت كتير في مواقع اجنبيه كله بيتكلم عن الفوائد العظيمه لو الحامل كلت بيضتين في اليوم فقلت استحمل و اكلهم.
ازاي مكسلش؟ جبت كنكه لسلق البيض تكفي بيضتين. و مقلايه تيفال صغيره قوي (بتكون الوانها حلوه جدا) و خلتهم في مكان مش مستخبي تحت الحلل وبقيت بعد ما اصحى احط البيضتين يتسلقو لحد م اصلي و البس او اعملهم اومليت بنقطه زيت زيتون و احيانا بحط عليهم جبنه او سبانخ على حسب الموجود و على سبيل التغيير.
و اكلهم قبل ما انزل و اخد حبايه الحديد بربع كبايه اي عصير او ماء (بلاش لبن او حليب علشان بيمنع امتصاص الحديد)
https://t2.gstatic.com/images?q=tbn:A…cOBfN0tr_WcdKm
– اول ما بوصل الشغل كنت لازم اضرب مج النسكافيه المتين. و في اول حملي مكنتش قادره ابطله بصراحه بس كنت بخففه. و بعدين بقى شاي بلبن و دلوقتي بقيت مجهزه في درج الشغل علبه مقطعه فيها فاكهه مجففه (تين و مشمش و ممكن بلح او زبيب ودي حاجات مهمه جدا للحامل) وبحط معاهم رقائق شوفان (كويكر) كام معلقه كده بجد يا بنات مفيد جداااا و لذيذ جدا و بيشبع جدا و تحفه و احلى مافيه انه خلاني مشربش نسكافيه الصبح. المهم بحط معلقه او 2 صغار من الخليط ده في المج علشان يبقى خفيف و عليه لبن و نص معلقه سكر او حسب الرغبه و احطه في الميكروويف دقيقه (بس حاسبي يفور) بيبقى وهمي. و لو مفيش ميكروويف في الشغل حطي عليه ميه سخنه او لبن سخن و سبيه دقيقتين حيستوي برضو او ممكن تحطيه ياخله غلوه على النار. و طبعا ممكن فاكهه فرش بس حتضطري تقطعي كل يوم و في التلاجه و شغلانه. و طبعا ممكن بدال الشوفان كورن فليكس بس الشوفان افيد.
https://t3.gstatic.com/images?q=tbn:A…cvpi7P5uE1pSCz
– مجهزه في درج المكتب كيس صغير فيه لوز (حبقى اجيب سوداني و زبيب انشاء الله) و لما يجي على بالي الاكل باخدلي 3-5 وحدات احسن من البسكويت. و طبعا معروف مدى اهميه المكسرات للحامل و البيبي.
– طبعا لازم اكون جايبه معايا تفاحه و برتقاله او اي نوعين فاكهه علشان لو جعت اكل منهم بدل مالاقي نفسي جبت كيس شبسي او شيكولاته.
https://t0.gstatic.com/images?q=tbn:A…UYC5PCJbuHh-FQ
– و بما اني بقعد في الشغل 8 ساعات ونص غير الطريق فلازم اكل حاجه في النص. في الاول كنت باخد معيا سندويتش اي حاجه جبنه – بانيه او اي حاجه. دلوقتي بقيت بعمل حسابي في 5 دقايق الصبح اقطع في علبه حته خس او خيار و طماطم . و ممكن احلى حاجه اجيب البروكلي و اديلو سلقه خفيفه 5 دقائق او على البخار من قبلها بيوم او اكتر (ممكن تعملى كميه و تشيليها في علبه في التلاجه مع رشه ملح و خل و حتقعد حلوه ممكن اسبوع) و الصبح احط عليها طماطم. كده تبقى سلطه. و لو فيه فراخ او سمك او تونه او اي حاجه باقيه من اليوم اللي فات بقطعها عليها (انا بجهز بانيه مستوي او فراخ مسلوقه او اي حاجه في اكياس صغيره على قد المره في الفريزر و اطلع منها لما اعوز) و كتير بحط على الخيار بالطماطم جبنه قريش بتكون رائعه. و طبعا اديها وش زعتر و احلى حاجه المسطرده بتتبل السلطه و طبعا مفيده جدا. و والله بيبقى طبق تحفه. اهم حاجه جهزي العلبه اللي حتاخدي فيها الاكل علشان متكسليش و كل يوم امليها حاجه. و لو يوم خفيف امليها حتى سلطه فاكهه.
– جيبي علبه شاي الفواكه او ينسون او اي حاجه خفيفه تشربي منها بدل الشاي و القهوه و الحاجات دي. و لازم تبقي واثقه انك لو مش مجهزه حاجتك حتشربي نسكافيه و بيبسي و تعكي الدنيا.
– خلي دائما في شنطتك او درجك كام وحده بلح.. بقسماط..توست ناشف.. علبه جبنه مثلثات. علبه مربى. اي حاجه مش محتاجه تلاجه . علشان متطمعيش في شيتوس او شيكولاته وحجات بتضر اكتر ما بتنفع.
– ادينا قلنا انواع كتير علشان التغيير برضو و علشان كل واحد حسب اللي بيحبه و عشان منزهقش.
اللي عندها افكار تانيه تشاركنا بيها.. و يارب يعينا كلنا و نقوم بالسلامه و يبقى بيبي امور و بصحه و ربنا يباركلنا فيه يااارب
amatol amatol 198277_1.gif فتكات متميزة Fatakat 198277 Cairo – Egypt