ربنا يبارك لكل عروسة ويتمملها بخير ويرزق باقي البنات يا رب
بالنسبة لجهاز العروسة في ناس بتشتري حاجات كتييير جدا وده مش حلو والله واسمه تبذير وربنا سبحانه وتعالي نهانا عن الاسراف ونصيحه لاي بنت بتجهز متهتميش بالعدد قد ما تهتمي بقيمة الحاجه يعني بدل ما تشتري حاجتين نوعهم ردئ اشتري حاجه واحده نوعها حلو
قبل ما ابدأ الموضوع اللي تعبت فيه جدااا والله عايزاكم تدعولي بالذرية الصالحة والتقييم طبعاااا
.
.
.
.
.
.
جهاز العروسة بيختلف من بلد للتانيه علي حسب العادات والتقاليد من حيث العدد والكمية والتقسيم علي العريس ولا العروسه وكده يعني بس معظم العرايس هما اللي بيجيبوا حاجة المطبخ والنيش والمفروشات واللبس ودي الحاجات اللي هكلم فيها
بالنسبة لاماكن شراء ادوات المطبخ كتيرة ممكن من الازهر او من منطقة ابو النمرس في المنيب او سوق الثلاثاء في المنيب برضه
بس انا مش بحب اشتري من المناطق دي عشان ملهومش اسعار ثابته يعني مثلا التاجر يديكي سعر عالي اووي و تقعدي انتي بقي تفاصلي معاه
انا اشتريت حاجتي كلها من :
معرض رنين بالهرم
سنتر المرشدي ب 6 اكتوبر
فروع كارفور واولاد رجب و المحمل
سلامة ستيل بالمنيل
وكام محل كده بتاع ادوات منزلية بيبيعوا حاجات ذوقها حلو مش موجوده في المحلات التانية
في محلين في جراند مول المعادي الدور الثالث مش فاكره اشمائهم بس هما الوحيدين في الدور الثالت بتوع ادوات منزلية اسعارهم معقوله وفي محل منهم بيبع حاجات تركي بسسس استيراده الخاص مره شوفت طقم جاتوه علي النت وريتله الصوره وسبتله رقمي اتصل بيا وقالي انه جابهولي مخصوص وبرضه مرة قلتله علي صنية خشب في فضه وراني صورتها علي اللاب وقالي هتصل بيكي اما اجيبها وفعلا عمل كده
[COLOR="rgb(75, 0, 130)"]
أولا مستلزمات المطبخ:
1-الحلل:
*حلل المونونيوم … احسن حاجه مودرن والشيف دهان . الالمونيوم عملي جدااااا بس مش صحي انك تخلي فيه الاكل مده طويله عشان بيتفاعل يعني ممكن تطبخي فيه بس ماتبيتهوش في التلاجه انقليه في حله تانيه
*حلل تيفال.. احسن نوع الزهران والتركي سافلون . لو مش عندك امكانيات ممكن تشتري حلتين بس
*حلل استانلس..احسن نوع برضه الزهران والتركي كركماز او اي نوع تاني عيار 18علي 10 بس خلي بالك عشان في مضروب بيبقي مكتوب عليه العيار بس بيبقي مش اصلي عشان كده خليكي في المضمون التركي او زهران
دول في نظري الاساس الزياده بقي
*حلل سيراميك .. غنيه عن التعريف والحله بتنطق اصلا
*حلة الضغط .. بس معرفش الانواع الكويسه ايه بس اللي تشتريها تعرف ازاي تستخدمها صح الاول عشان الاستخدام الغلط خطر جداااا
*حلل صاج… في رأيي ملهاش اي تلاتين لزمه ومش عمليه خاااالص بس ممكن تستخدميها في حفظ الاكل في التلاجه بس برضه مش لازم ممكن تحفزش في الاستالنس عادي مش بيتفاعل
*حلل من بره صاج ومن جوه تيفال ..برضه ملهاش اي تلاتين لزمة ومنظر بس علي الفاضي ومفيهاش ماركات كويسه
*حلي المكرونة
2-الطاسات:
في طاسات المونيوم وتيفال واستانلس نفس ماركات الحلل وكل المقاسات
ممكن تشتري 3 طاسات تيفال
*واحده ضغيرة للبيض مقاس 18 أو 20 أو 22
*واحده كبيرة للشاورمة او الكبده وكده
*وواحده وسط بين الاتنين
كمان اشتري طاسات غويطة للقلي بس مش لازم تيفال ممكن المونيوم عشان كده كده الحاجه مش بتلزق في القلي مش لازم تيفال
*واحده متوسطه للبطاطس والبانيه وكده
*واحده كبيرة للسمك او لو هتقلي كميات كتير
3- الصواني:
برضه نفس ماركات الحلل في الالمونيوم والاستانلس والتيفال وكل المقاسات واشكالها مدور ومستطيل
*3 صواني مدور النوع اللي انتي عايزاه انا اشتريت 2 تيفال وواحده المونيوم
*3 صواني مستطيل برضه زي المدور
ده في نظري الاساس الزياده بقي
*الصواني البيركس الفرنسي احسن نوع
*صواني الكب كيك
*قالب كيك مستطيل
*صواني البيتزا
*صنية البسبوسة
*قوالب السيلكون
4-الاطباق:
*طقم الصيني للنيش
*طقم العشاء للمطبقية ..بيكون صيني برضه احسن ماركه لومينارك الفرنسي غني عن التعريف بس خلي بالك عشان في منه ماركات كتير اوي احسن حاجه الفرنسي طبعاا بيبقي مكتوب عليه Made inFrance بس هو غالي شويه
*طقم الاركوبال .. معرفش ايه الماركات الكويسه وبكرهه عشان مش شيك خالص
*طقم الاركوبيركس في ناس بتجيبه للنيش وناس للمطبقيه أو ممكن تنصصيه خلي مثلا الكوبايات للنيش والاطباق للمطبقيه علي حسب رغبتك احسن الانواع برضه لومينارك الفرنسي و جيميا مش حلو واحده كانت كاتبه هنا في الجروب انها اشترته وقالت انه بيقشر
*طقم الميلامين .. عملي جداااا بش للاسف معرفش ايه النواع الكويسه بس اشتري نوع نضيف عشان النواع الرديئه بتقشر
*طقم الجاتوه .. للنيش أو للمطبخ
*2طقم خشاف .. للنيش أو للمطبخ الماركات نفس ماركات الكوبايات تحت
*اطباق فردانية للمطبقية 3 مسطح و3 غويط وسرافيس انا عن نفسي ماشترتش فرداني جبت طقمين عشاء للمطبقية بس جبت اطباق شاي
*بولات كبيرة .. للسلطه وواحده كبيره عشان لو هتقلبي فيها الكيكه وللفشار وكده ممكن تجيبيهم بلاستيك تركي تحفه او زجاج لومينارك
*بولات صغيره .. للعسل وهتستخدميها في بداية الجواز عشان هتبقي انتي وجوزك بس يعني هتغرفي فيها علي قدكم المخللات والسلطه وممكن تستغني بيها عن طقم الشوربة
ده الاساس ,, الزياده بقي
* طقم الزجاج .. اطباق زجاج شفاف وعسلي
*طقم الشوربه ..
*طقم السمك..
5-الكوبايات والكاسات:
احسن ماركات الكوبايات والكاسات لومينارك الفرنسي_ RCR الايطالي _بوهيما Bohema في ناس مش بتحبه عشان الزجاج رقيق اوووي وبيتكسر من اول وقعة مع ان الزجاج اما يكون رقيق اووي كده ورفيع بيدل علي جودته _ التشيكي بيبقي مكتوب عليه made in Zcech_ والتركي cristar بس الاصلي بيبقي محفور عليه حرف R من تحت
*2 طقم كاسات للمطبخ عشان الضيوف وممكن تجيبيهم زي بعض عشان لو جالك ضيوف كتير مع بعض
*كاسات للنيش علي حسب حجم النيش بتاعك لو كبير هتحتاجي 6 اطقم لو نيش متوسط هتحتاجي 4 اطقم لو نيش صغير ممكن طقمين او 3
*2 طقم مج زجاج بأيد للمطبقية
*2 طقم كوبايات للشاي الساده للمطبقيه
*2 طقم كزبايات للعصير والبيبسي للمطبقية
*2 طقم كوبايات ميه ..للنيش او المطبقيه وممكن طقم واحد
*2 طقم كوبايات قهوه .. للنيش او المطبقيه وبرضة ممكن طقم واحد
*طقم شربات .. للنيش بس انا مجبتوش عشان مش عامله نيش اصلا
* كوبايات مياه للاستعمال اليومي بلاستيك او استانلس ومجات صيني للنسكافية والكابتشينو
*طقم شاي صيني ..
ده الاساس الزياده بقي
*طقم الايس كريم : ينفع للايس كريم والجيلي والفروت سلاد هو عباره عن كاس بس قصير اوي ومبطط كده وهو مش زياده وهو اساسي بس انا بعتبره زياده عشان اللي معهاش امكانية ممكن تستغني عنه بالخشاف
*طقم النسكافية بيبقي كاس زجاج بس ليه ايد صغيرة
6- البراريد والبانات:
*هاتي 2 براد بس كفايه لانك هتغلي في البويلر مش هتستعملي البراد كتير.. اانا اشتريت 6 برادات ماتستغربوش اصل انا نوبية ومن عادتنا في النوبة اننا نقدم الشاي بالبراد ونصبه في الكوبايات يعني لو الشاي اتصب في المطبخ منشربوش لازم يتصب بره عاده غريبة جدا انا عارفه وماتستغربوش برضه من العدد عشان من عادتنا بنشرب شاي باللبن 3 مرات في اليوم
* اللبانات : واحده او 2 كبار للغلي هاتي مثلا واحده لتر وواحده لتر ونص
وهاتي طقم لبانات صغير للتقديم بيبقي فيه 3 لبانات مقاسات مختلفة .. انا اشتريت 3 اطقم استانلس انتو عرفتو بقي حوار الشاي ده
*طقم كنك للقهوه
ملحوظه : اللبانات والبراريد والكنك في منهم تيفال والمونيوم واستانلس انا بفضل الالمونيوم عشان عملي الاستانلس بيشيط اللبن وبيسود بس انا جبت استانلس للتقديم بش مش هحطه علي النار والماركات هي هي ماركات الحلل بس مش عارفه في تيفال تركي ولا لأ
7-الملاعق والسكاكين:
في ماركات سكاكين كتييييير حلوه انا عن نفسي جبت ميتال تكس والمقصات برضه جبتها ميتال تكس
*شنطة ملاعق للنيش انا مجبتهاش عشان مش عامله نيش
* دستة ملاعق كبير ودسته صغير ودسته شوك كبير ودسته صغير . انا جبت دستتين عشان العزومات
*طقم سكاكين بالمسن
ده الاساس الزياده بقي
*عليقة معالق للسفرة
*طقم سكاكين للحوض في منه اشكال كتير في اللي بيترشق فيه السكاكين وفي اللي بالمغناطيس
8- صواني التقديم:
*طقم صواني ميلامين للاستخدام اليومي
*طقم صواني استانلس للضيوف .. انا جبت طقمين وجبت صنيه تقديم خشب في فضه
*صنية او 2 متوسطه للفطار
*صنية اكل كبيرة بس معتقدش ان في ناس لسه بتشتريها
9-رفااااااايع المطبخ:
سكريات
مبشرة
صفاية استانلس او المونيوم لغسل الخضار
صفايه سلك لغسل الارز
شياطة للرز
مخرطة
بورد تقطيع
قاعدة للحلل اسمها قاعدة تسخين
مانع للطرطشة عبارة عن حاجة سلك ضيق اووووي بيتحط فوق الطاسة عشان الطرطشة وممكن تسخني عليه كرواسون او باتيه بدل ما تحطيه في المايكروويف
مساكات طعام
توزيع تيفال او خشب و توزيع استانلس عادي
مقشرة بطاطس
قطاعة تفاح
قطاعة بيض
قطاعة بيتزا
فتاحة مياة غازية
فتاحة علب سمن
عصارة ليمون
بولة ايس كريم
منخل
مقوار
مضرب بيض
فرشاة زيت
دايرة بيض عيون
مصفاة سلك للعصير وواحدة صغيرة للشاي
قمع
قمع كريم شانتي
هراسة ثوم وهون
سلة ذكية لقلي البطاطس
شفاشق للعصير بلاستيك او زجاج
علب ثلاجة بلاستيك او زجاج
عياشة
مريلة مطبخ وماسك جوانتي
فوط مطبخ
برطمانات للتخزين
طقم التوابل
10-رفايع مش للمطبخ:
بونبونيرة
شيالة كحك
مشابك
سبت وحبل غسيل
طفايات سجائر
مصليات
فرش شعر وامشاط
شنط للمكياج هاتي كذا واحده لبكر الخيط و للمونيكير وتوك الشعر والشرابات عشان تتجنبي الفوضي بتاعت الادراج
فرش اسنان
مقصات وواحد كبير للسمك
قصافة اظافر وملقاط
بيرفيومز ممكن تجيبي 8 وزودي علي حسب المقدرة
شباشب للبيت والحمام
لكاليك للشتاء
ميزان مش ضروري اوي بس انا مقدرش استغني عنه هشان بحب اتابع وزني
شماعات
رول مفارش
كفرات للغسالة والانبوبة
منفضة
مقشة ناعمة وواحدة خشنة
مساحة
اطباق للغسيل
فرشة حمام و فرشاة للبلاط والسجاد
سلاكة حوض
بخاخ بلاستيك
سلات زبالة
لوف للمواعين
لوف للاستحمام
وكده المطبخ الحمد لله خلص انتظروني بقي هعمل ان شاء الله موضوع للمفروشات واللبس
بس نصيحه مني بلاش تكتري في الحاجة وبلاش تبذير انا الحمدلله اشتريت حاجتي كلها مش كتيرة اووي في حدود المعقول واشتريتها كلها ماركات نضيفة وحاجات غالية .. والحاجة اللي مش هستعملها مشترتهاش
وبلاش حوار النيش الكبير اووي ده بلدي جداااا بجد وقديييم اوي ممكن تعملي نيش ضغنون بيبقي اشيك
انا عن نفسي معملتش نيش اصلا عملت بوفيه
ومعلومة : النيش اصلا بيتحط فيه الكاسات واطقم الشاي والسرافيس بسسسسسسس وممكن ديكورات لكن بينرفزني اوي الاطباق والكوبايات واطقم الشربات وشنط المعالق اللي في النيش دي , المفروض الاطباف بتتحط في البوفية النيش بيتحط في سرفيس واحد او اتنين او تلاتة بالكتير اوي
يلا بقي التقييم تحت اهو والله تعبت في الموضوع ده جدااا وكله من مجهودي وتجميعي الشخضي [/color]
.marmaletta .marmaletta 1055421_1.gif فتكات حبوبة Fatakat 1055421 cairo – egypt