اولا / السلام عليكم
ثانيا / انا مبسوطه اوى انى انضميت للمدونة وده اول موضوع ليه يارب بجد يعجبكوا ومستنيه الردود الجامده
نبتدى بسم الله
المقادير : ربع كيلو لحمه مفرومه – بصله متوسطه – كوب سمن سايح – علبة جلاش – بيضه – كوب متوسط لبن – ملح – فلفل اسود – بهارات مشكله – كوب ماء
الطريقه : اولا طريقة عمل العصاج (اللى هو اللحمه المفرومه )
نجيب حله صغيره وبعدين نحط فيها 3 ملاعق كبيره سمنه من اللى سايحناها بعد كده نقطع البصله قطع صغيره ونحطها على السمنه ونقلب لحد ما البصله تتدبل او يعنى تبقى صفره شويه اوعى لا تتحرق اصل انا عارفاكى هههههههه المهم بعد كده تحطى اللحمه المفرومه وتقلبى وبعدين تحطى توابلك بقى يا جميله يعنى معلقه صغيره ملح وزيها فلفل وزيها بهارات وقلبى كويس حطى كوب الماء و وطى النار وسيبيها شويه لما تشرب كل الميه لو لقيتيها لسه نيه زودى ميه بس ان شاء الله مش هتحتاجى ميه تانى بعد ما تستوى شيليها من على النار واركنيها على جنب
نيجى بقى للمهم الجلاش
جيبى ورق الجلاش وافرديه على الرخامه بعد كده هاتى الصينيه المتوسطه اللى هتعمليه فيها واقلبيها على الورق وظبطيها عشان متبقاش طالعه من حته وحته لا حددى بالسكينه الورق على شكل الدائره بتاعة الصينيه وشيلى الصينيه قطعى بقى الزيادات وهتلاقيها زى الصوره دى
وبعدين يا ست الكل نجيب الصينيه وندهنها سمنه بالفرشاه لو مفيش فرشه يبقى بايديكى الحلوين دول بلاش دلع ايوه اديكى وادهنى الصينيه كويس يعنى معلقتين سمنه سايحه كفايه اوى وتبتدى تخدى ورقتين جلاش وتحطيهم فى الصينيه وتدهنى وشهم شويه سمنه صغنونه وبعدين ورقتين كما وتدهنى وورقتين وتدهنى لحد ما تيجى لنص الورق بعد كده تجيبى اللحمه المتعصجه وتفرديها على الورق كويس زى كده
وبعدين ياتوته نجيب ورقتين جلاش ونغطى بيهم اللحمه وندهن سمنه ونحط ورقتين وندهن وهكذا لحد باقى الورق ما يخلص وبعدين تقطعى الجلاش بالسكينه فى الصينيه سمبوكسات مربعات مثلثات زى ما تحبى وتجيبى كوب اللبن وتحطى فيه بيضه وذرة ملح ورشة فلفل اسود وتقلبيهم كويس اوى وتروحى ساقيه بيهم صينية الجلاش وتحركيها كويس عشان تتشرب كده اهووووو
ندخله الفرن بقى اكيد طبعا امال هنسويه فى التلاجه هههههههههه المهم درجه الحراره متوسطه لاهى عاليه ولا هى واطيه عشان يستوى على مهله لمده 15 دقيقه وبصى عليه لقيتى وشه لسه ابيض سيبيه شويه تانى المهم تابعيه لحد ما لونه يبقى كده
طلعيه من الفرن وسيبيه يهدى وبعدين قدميه وده الشكل النهائى
بالهنا والشفا وياريت اشوف الردووووووود مواضيع هذا القسم برعاية
الشمعه البيضاء الشمعه البيضاء فتكات هايلة Fatakat 501627 الدوحه – قطر