الجروب ده لكتابة الوك لوك والتقيمات واعلان المنافسات ونتائجها ونصائح الرجيم ولو في حد جديد عاوز يشترك يكتب اسمه وطوله ووزنه هنا برده ويبدأ معانا على طول أما الشات فيكون في الشات الخاص بالجروب في الرابط ده https://fatakat.univanet.com/#1437669
الكلام بقلم the real one (مرمر)صاحبة الموضوع
اهلا اهلا بكل الفتوكات حبايبى
انا جمعتكم النهاردة عشان ……………..
لا مش عشان مش فاضية بكرة
انا فاضية علطول اساسا
وبما انى فاضية علطول يبقى باااااااااكل علطول
لحد مابقيت زى ايه؟
زى شوااااااااال القطن
"على فكرة فالبيت عندى بيقولولى كدة"
وعشان كدة جمعتكوا
انا مشكلتى مش انى مش بخس
لاااااااا
مشكلتى انى بحب الاكل
ومفيش عصايا سحرية هتخلينا ناكل ومنتخنش او ناكل ونخس
يبقى الحل ايه؟
الحل اننا نعمل جروب نشجع فيه بعض على الالتزام بالدايت و على الرياضةو على اننا مناكلش
بصوا بقا يا بنات
انا وانا خارجة من ثانوية عامة وداخلة الجامعة
كان وزنى بالظبط 102.4
تخيلوا بنت لسة مادخلتش الجامعة وزنها فوق ال100
المهم رحت لدكتورة وزنتنى وقاست طولى
وعملت حاجة عالكمبيوتر قالتلى بعدها
معدل الكتلة عندك 40.5
انا طبعا ولا فاهمة يعنى ايه معدل الكتلة ولا عارفة 40.5 دة كويس ولا وحش
انا اساسا كنت لسة مافوقتش من صدمة انى فوق ال 100
المهم فهمتنى ان معدل الكتلة او دليل الكتلة دة
حاجة بنعرف بيها وزننا طبيعى ولا لا واحنا فمرحلة ايه
الوزن الطبيعى معدل الكتلة بيكون من 20 ل 25
لو زايد عن الطبيعى بيكون من 25 ل 30
لو انتى بدينة هيكون من 30 ل 35
لو بدينة جدا هيكون من 35 ل 40
لو مفرطة البدانة هيكون فوق ال 40
ان ان ااااااااااااان
يعنى انا مفرطة البدانة
مرحلة مفرطة البدانة دى يا بنات مرحلة الخطر
اللى فيها بعد الشر علينا كلنا بتبتدى الامراض المرتبطة بالتخن تحصل
زى القلب السكر الكوليسترول الحاجات الحلوة دى
بعيدا عن كل الرغى العلمى الممل اللى انا قلته دة
والفتوكات حبايبى اكيد مستفادوش منه حاجة
انا نويت اعمل دايت هيـــــــــــــــة
وكل اللى ناوية تخس وتغير حياتها كلها وشكلها وصحتها
اهلا بيها معايا
بصوا يا بنات انا مايهمنيش العدد
يعنى لو واحدة بس اشتركت معايا فالجروب اوك
لو مفيش برضو اوك هكمل وحدى
لانى فالاخر انا المستفيدة
انا بدخل قسم الرشاقة من زمان
لو كنت من زمان اشتركت فجروب كان زمان وزنى اقل دلوقتى وكان زمان ليا اصحاب كتار فالمدونة
لكن انا كنت بالظبط عاملة زى كدة
عمالة اجمع فانواع دايت
واعرف معلومات
واشوف جروبات وبرضو باااااااااااكل
وطبعا كدة عمرى ما هخس
وانا معنديش استعداد اضيع عمرىكله وانا تخينة
عشان كدة انا هبدا من بكرة ان شاء الله
انا وزنى من 95 ل 94 هتاكد بكرة ان شاء الله
وطولى 158
وسنى 19.5
واسمى مرمر
انا عديت الحمدلله مرحلة البدانة المفرطة وفمرحلة بدينة جدا
والجروب ان شاء الله هيتقسم ليفلز من 1 ل5
5 هيكون مرحلة البدانة المفرطة
4 بدينة جدا
3 بدينة
2 زايدة عن الطبيعى
1 الوزن الطبيعى او المثالى ودة طبعا هدفنا كلنا
كل واحدة على حسب طولها ووزنها هتدخل على ليفل وهدفنا ان شاء الله طبعا
اننا كلنا نوصل لليفل 1
صحيح انا شكلى مبقيش تحفة لما طلعت من ليفل 5 لليفل 4
بس عالاقل بعدت عن مرحلة الخطر
وصحتى بقت احسن شوية ونفسى بقى احسن بقيت بقدر امشى فترة اطول شوية من الاول
بس زى ماقلنا يا بنات الحكاية مش سحر
كل حاجة هتيجى ان شاء الله بس فمعادها
دلوقتى كل اللى عايزة تشترك تكتبلنا لوك لوك اليوم وبعدين هتكتب اسمها وطولها ووزنها
وانا هقولها معدل الكتلة عندها كام وهتكون فليفل كام وكدة تكون اشتركت
ولو حابة تروح تجيب مازورة
وتاخد مقاساتها وتكتبهم عندها
وكل شهر كدة قيسى تانى
بجد هتفرحى اوى لما تلاقى مقاسك بيتغير
كدة عرفنا الجروب هيتقسم ازاى ونشترك ازاى
مش فاضل غير الجروب هيمشى ازاى
اولا كل واحدة حرة تختار الدايت اللى هى عيزاه سواء تخفيف او كيميكال او هرم غذائى او تمر ولبن براحتكوا
ثانيا لازم يا بنات لو سمحتوا نكتب يومياتنا كل يوم مش غلاسة منى ولا بفرض عليكوا شروط لا بس هو دة اللى بيشجعنا لما اشوف كل اللى حواليا ملتزمين وماخرفوش فالدايت بتاعهم هلتزم انا كمان
واحنا مش هنسميها يوميات عشان ماتكونش غلسة هنسميها لوك لوك واحنا اساتذة فاللوك لوك
هنتعرف ونتصاحب على بعض هيكون وقت لذيذ
وطبعا لو مخرفة فالدايت عادى جدا انك تكتبى دة فاللوك لوك بتاعك
ثالثا اللوك لوك هتقولى فيه الفطار والغدا والعشا وكل وجبة تلتزمى بيها صح وماتخرفيش هيكون عليها نقطة فاخر الاسبوع هنجمع النقط اكتر واحدة جابت نقط هتكون المزة
واقل واحدة جابت نقط هتكون باكابوظة
رابعا الفتوكة الشاطرة اللى عاوزة تبقى مزة وتزود النقط بتاعتها كل يوم هتلعبى فيه رياضة هتاخدى نقطة زايدة اى نوع رياضة من اول ربع ساعة مشى متواصل ليكى نقطة نط حبل جرى تمارين اى حاجة المهم لو لعبتى رياضة فاليوم ليكى نقطة زيادة وحاجة تانى اللى هتشرب لتر ونص ماية او اكر ليها نقطة زيادة وبتهيالى دى حاجات سهلة كلنا نقدر نعملها
خامسا انا اول اسبوع اللى هحط النقط بعد كدة اللى هتطلع مزة هى اللى هتحط النقط فالاسبوع اللى هيا مزة فيه وهكذا لان الجروب بتاعنا كلنا مش بتاعى انا بس
سادسا بنتوزن الجمعه الصبح ياريت والجمعه بيكون الفرى انا بالنسبالى باخد الفرى وجبة واحدة اللى هيا الغدا لكن الفطار والعشا بيكونوا دايت عادى عشان متخنش فالفرى بس انتوا براحتكوا اللى عايزة وجبة ماشى اللى عايزة اليوم كله ماشى
اخيرا يا بنات لو التزمتى انتى اللى كسبانة مش انا انا مش هستفاد حاجة لما الجروب اللى انا عملاه يوصل 100 جزء ويبقوا كل الفتوكات اعضاء فيه لكن كل واحد هتلتزم وهتخس ان شالله حتى كيلو هى المستفيدة
الجروب ان شاء الله هيبدا من بكرة والاشتراك من دلوقتى وزى ما قلت يا بنات انا هبدا مع اى عدد ان شالله ابدا وحدى
بس هكون مبسوطة اكتر لو اشتركنا مع بعض وشجعنا بعض
بصوا بقى احنا عاوزين نبدأ الجزء ده بكل واحده تقول لينا كانت كام قبل ما تبدأ معانا وبقت كام دلوقتي وطبعا بما اننا النهارده يوم الخميس وكده كده الكل هيوزن يبقى الكل يكتب وزنه قبل وبعد متفقين ؟؟؟مطنشوش زي الجزء اللي فات
وكمان نكتب ايه العوائق اللي قبلتنا وازاي حلناها
أم الصالحيين أم الصالحيين سوبر فتكات Fatakat 404500 سرس الليان -منوفية – مصر