لبنات الجامعة وبس … اللى عايزين يتغيروا بجد
لو نفسك تكونى من الصالحات وابنة بارة وزوجة صالحة وأم مثالية وإنسانة يعتمد عليها
يبقى لا بد من الإعداد وده هيجى من خلال خطوات فى مجالات كتير هنعملها سوا عشان نبقى أفضل
وده كل هيكون من خلال جروبنا
الصحبة الصالحة … لبنات الجامعة وبس
هنعمل جروب نشجع بعض فيه
إننا نحب الحياة ونحب الناس ونتقرب لربنا ونصلى ونقرأ قرآن
وكمان نزود ثقتنا بنفسنا ونخلى نفسنا حاجة مميزة عند الناس
ونهتم بشكلنا اللى وزنها زايد تعمل دايت واللى مش بتهتم بنضافتها وشعرها وبشرتها تهتم
وكما نهتم بثقافتنا ونقرأ كتب كتير ونشجع بعض على كده
ونشجع بعض كمان على الاهتمام بدراستنا خصوصاً إن امتحانات الترم قربت خالص وفيه ناس بدأت كمان
وبإذن الرحمن هيكون برنامجنا كالآتى :
كل يوم :
نقوم الفجر نصلى ونقرأ صفحتين من المصحف ونقول الأذكار ونستغفر ربنا عشان يباركلنا فى يومنا
وبعد كده نفطر بس نحاول نخلى أكلنا صحى يعنى بلاش نبدأ يومنا بالمقليات الكتير والأكل اللى يوخمنا طول اليوم
ونقعد نذاكر شوية أو نحل أى تكليفات أو أبحاث مطلوبة مننا فى الكلية
بعد كده نقوم نلبس ونجهز حاجتنا للكلية بس بلاش المكياج الأوفر ده على الصبح بالله عليكم ونتوكل على الله نروح الكلية
واحنا فى الكلية بقى بلاش طول المحاضرات الكلام الجانبى والدخول على الفيس وصب واى والكلام اللى أنا بشوفه ده ياريت نركز مع الدكتور ونكتب ملاحظتنا وتكون عندنا جراءة إننا نسأل ونتناقش عادى ومحدش يخاف زى ما كنت بعمل فى الأول وميتكلمش لأ لو الدكتور سأل وانتى تقدرى تجاوبى اتكلمى ومتخافيش من حاجة
والأوقات الفاضية فى الكلية بين المحاضرات أو المحاضرات اتلغت ياريت نقعد نذاكر فيها أو نراجع حاجة وممكن ندخل مكتبة الكلية نقرأ
هنرجع من الكلية بعد ما نخلص وياريت منفوتش محاضرات ولو قدرتى تيجى مشى عشان تبقى عملتى رياضة ماشى أنا عن نفسى كليتى بعيدة جداً عن البيت فبركب نص المسافة وبكمل مشى ولو ما أمكنش ممكن الصبح قبل الفطار تلعبى شوية رياضة
لو يوم خارجة من الكلية بدرى ياريت تعدى على المكتبة اللى فى مدينتك أنا فيه فى طريقى المكتبة بدخل أقرأ وأستعير كتب للقراءة العامة أو لأبحاث الكلية ويفضل تعملى اشتراك سنوى
لما توصلى البيت بالسلامة تغيرى هدومك وتتشطفى وتتوضى وتصلى وتتغدى ومش عايزة أوصى يكون غداكى أكل صحى برضه
وبعد الغدا هناخد فاصل تقدرى تريحى شوية بس مش تنامى عشان مينفعش بعد الأكل أو تدخلى على النت أو تتفرجى على التليفزيون أو تعملى شات مع حد من صحابك وخلى صحابك دايماًً الناس الكويسة اللى تعينك على الخير
بعد كده يا عسل هتقعدى تذاكرى وتشوفى المحاضرات اللى أخدتيها وغالباً الأيام دى معظمنا خلص مواد كتير وبنتبدى نستعد للامتحانات فناخد المنهج من أوله ونحاول نلخصه ونذاكره بعناية وتركيز
هنصلى المغرب وبعدين ممكن نخرج شوية أو نزور حد أو يجيلنا ضيوف يعنى اعتبروه وقت مفتوح
وبعدين نصلى العشاء ونتعشى عشاء خفيف عشان نعرف ننام كويس
بعد كده لو فيه مذاكرة أو تحضير للكلية بكرة نعمله ونتفرج على التليفزيون شوية وممكن الكمبيوتر ولو معاكى كتاب جايباه من المكتبة اقرأى شوية أو حتى حملى كتب من النت
بعد كده يا قمر هتصلى ركعتين قيام الليل وياريت لو تاخدى دش دافى يهدى أعصابك ويرخى جسمك عشان تنامى وحاولى تنامى بدرى
نقاط مهمة :
استغلى وقتك فى المواصلات وانتى ماشية فى الطريق بإنك تستخدمى الهاند فرى وتسمعى قرآن أو الرقية الشرعية أو محاضرات التنمية البشرية لدكتور إبراهيم الفقى أو تفسير القرآن للشعراوى
حاولى تنظرى دايماً لنص الكوباية المليان
ارضى بقضاء ربنا وقدره واعرفى دايماً إن ربنا كاتبلك الخير حتى لو انتى مش عاجبك الحاجة دى
صفى قلبك وبلاش تكرهى حد حتى لو آذاكى
خليكى مبتسمة دايماً لأن ده هيرفع من روحك المعنوية وكمان هيحبب الناس فيكى
حاولى تساعدى الناس على قد ما تقدرى واسعديهم ولو بكلمة
لو قدرتى تحفظى كل يوم حاجة بسيطة من القرآن ولو آية هتبقى حاجة جميلة أوى
بلاش تضيعى وقتك فى حاجات ملهاش لازمة يعنى مثلاً أنا كنت بدخل على الفيس أقرأ بوستات مش ليها أى لازمة فى الدنيا ولا تنشرى أى حاجات ملهاش لازمة
خلى دايماً قدامك هدف كبير وتحته هدف أصغر وتحت الأصغر هدف أصغر ويكون هدفك الأكبر هو رضا ربك
ثقى فى نفسك دايماً وميهمكيش كلام الناس ما دمتى مش بتعملى حاجة تغضب ربنا
اهتمى بنفسك يعنى لو جسمك مليان زيادة عن اللزوم اعملى دايت عشان تبقى أجمل وصحتك أحسن واهتمى ببشرتك وشعرك
اهتمى بنضافة بيتك وأوضتك وتنظيم دولابك ومكتبك
كل حاجة جديدة تعمليها واستفدتى منها ولو كانت بسيطة قوليلنا عليها عشان الاستفادة تعم حتى لو عملتى حاجة ضرتك حذرينا منها
يوم الجمعة :
هنبتدى يومنا بنفس البداية
ولو عندنا أى مذاكرة متأخرة هنعملها
ونحاول نعمل حاجة جديدة مفيش مانع لو احنا اللى عملنا الأكل النهاردة أو حتى حاجة حلوة آخر النهار ونفرح أسرتنا بيها
هيبقى عندك وقت مفتوح أكتر تكلمى صحابك فى التليفون أو على النت تسلمى عليهم وتطمنى عليهم بس مش تتكلموا فى كلام هايف لكن برضه الإنسان الاجتماعى بيخف عن نفسه أحمال كتير
حاولى تزورى حد من قرايبك كنوع من صلة الرحم
تقدرى تزودى قراءتك أكتر أو تقرأى رواية مثلاً تسليكى وتغير مودك
لو ليكى اخوات صغيرين أو ولاد اخواتك أو أى أطفال فى العيلة العبى معاهم وهتيلهم حاجة حلوة وفرحيهم صدقينى هتتبسطى كتير
ومتنسيش قراءة سورة الكهف فى وقت العصر هتضئ لكى ما بين الجمعتين
ولو قدرتى يوم الجمعة الصبح أو أى يوم تانى عندك أجازة تنزلى السوق تساعدى مامتك وتشترى شوية خضار هتبقى حاجة جميلة
وكمان هاتى معاكى الجرايد فى السكة واقرأى شوية عن أخبار الدنيا وفى أى يوم ممكن تقرأى الأخبار لو عندك وقت من مواقع الصحف
بس كده
ده اللى عندى دلوقتى
ولو افتكرت حاجة تانية هقولكم عليها
واللى عندها أى اقتراحات ياريت تقولها
بس ياريت فعلاً تلتزموا بالنظام ده وتدخلوا كل يوم تبلغونا عملتوا ايه ومدى استفادتكم من البرنامج ده
وعايزة التقارير مفصلة
وده شعار الجروب ياريت تحطوه مع لينك الموضوع فى توقيعكم
وبإذن الله هنعمل ملحق للجروب فى معظم أقسام المدونة
واللى عايزة تتولى الإشراف على واحد منهم ياريت تبلغنى
لأنى مش هقدر أمسك الكل
يعنى أنا هحط النظام وهى عليها تتابع تقارير الأعضاء
والسلام ختام
sokra_hanem sokra_hanem فتكات متميزة Fatakat 1097437 مدينة جميلة – مصر