جبت حلل السيراميك انهاردة تعالوا شوفوا الاسعار
انا جبت السيراميك بتاعى
وقلت اجى ااقول للبنات الاسعار علشان يبقوا عارفين اخر الاسعار ايه
وياريت كل واحدة تشترى تبقى تدخل تقول علشان نعرف التطورات اول باول
بسم الله الرحمن الرحيم
بسم الله ما شاء الله
الحمد لله الذى رزقنى هذا من غير حول منى ولا قوة
تبلى ويخلف الله تعالى
اولا من قرايتى هنا ف المدونة استقريت على السيراميك الكورى النيوفلام
ولما رحت المحل كان اكتر نوع بيتباع هو نوع تركى اسمه كوين
بس انا معرفوش فمردتش اخد منه
والست حاولت تقنعنى بيه وقالتلى ان هو انضف حاجة بس انا مرضتش
انا كنت رايحة ناوية اشترى 3 حلل بس
بس لما رحت البنت قالتلى ان المقاسات الكبيرة بس اللى بتتباع الواحدة بواحدتها والمقاسات الصغيرة بتتباع بالطقم على بعضه
قلتلها ورينى
جابتلى طقم 5 حلل مقاس 18 و20 و22و24و26
وقالتلى الطقم على بعضه عامل 1350
فانا اصلا كنت لما بقرا الاسعار كنت عاملة حسابى ان ال3 حلل بالف وشوية
فانا انبهرت الحقيقة
ومش عارفة بقى انضحك عليا ولا ايه…انتو قولولى
المهم جبتهم هم لونهم الاصفر زى دول
[IMG]https://files2.fatakat.com/2015/3/13940010354560.jpg[/IMG]
كنت عاوزة اغير اللون بس مكنش فيه غير اللون دة بس ما شاء الله تحفة جداااااااااااا
وتقال ومطبوع عليهم نيوفلام بحروف بارزة زى ما فتوكة علمتنى هنا
المهم طلبت منها طاسات نيوفلام قالتلى مش بينزل منها طاسات
معندهاش غير كوين
سيبتها ورحت لفيت عند محلات تانية
ملقتش خالص نيوفلام حاجة غير الحلل
دورت على فالز التركى ملقتش برضه
بس لقيت السافلون التركى
جبت منه علشان ناس كتير هنا برضه شكرت فيه
جبت صينية مدورة مقاس 26 ب170
وجبت طاجن مستطيل ب240
وجبت لبانة ب196
وجبت مقلاية 18 ب126
وجبت بقى الباقى تيفال زهران علشان ماما كانت مصممة انوع
جبت مقلاية 26 ب190
وجبت صينية قلب ب 130
والراجل حسبهم 1052 وعمل خصم بتاعه بقو 945 وحاولنا نفاصل معاه مرضاش ينزل 2 جنية حتى
مش عارفة بقى احنا انضحك علينا ولا كدة كويس
ياريت حد يقولنا علشان انا وماما معندناش خبرة خالص وانا لسة مبتدية الجهاز وكل معلوماتى من عندكم هنا ربنا يكرم كل حد بيفيد الناس
roomoory roomoory فتكات نشيطة Fatakat 909029 الاسكندرية – مصر