السلام عليكم ورحمه الله وبركاته
مش عارفه ده مكان الموضوع ولا ايه
بس ما علينا بقى ….. بسم الله نبدأ
قبل ما ابدأ ربنا يعلم انا قرات كام موضوع وفى كام مدونة عشان افهم الموضوع ده وفى الاخر كشفت عند دكتور ب 55 جنيه الكشف وماطلعتش حتى بروشته لكن الله يستره فهمنى حجات كتيير هى اللى هشرحها ان شاء الله الوقتى بطريقه مبسطه زى ما شرحها لى
المشكله : المشكله انى فى 27 من عمرى وعندى سلس البول الاجهادى
كيف تفرق بين سلس البول الاجهادى وبين التهاب مجرى البول :
بصى يا ستى …. التهاب مجرى البول ده بيبقى مؤلم عموما يعنى ألم اثناء التبول او خروج دم مع البول او حتى تكرار البول بصوره صعبه
بيظهر بصوره واضحه صديد فى تحليل البول
وطبعا السكر والحمل وارتفاع الضغط عوامل مساعده جدا للحاله دى
لكن بقى حاله سلس البول الاجهادى بتكون مزعجه يعنى انتى بتتحكمى فى البول عادى لكن فى حاله الاجهاد بتفقدى السيطره
حاله الاجهاد دى مثل الكحه والعطس والقفز وهكذا
طيب سببه ايه , واذا عرف السبب بطل العجب ::
1. الوزن الزائد : لان من شأنه انه يزود سمنه البطن وبالتالى تضغط على المثانه فبالتالى المثانه تضغط على الصمام اللى قافل المثانه وهو ده اللى بيخلى البول يتسرب
الصوره اللى قبل دى شايفين اللى البول بيتسرب منها
لكن تمارين كيجل بتقوى العضله بالتالى تقلل الضغط عليها وما تسربش
2. لو عندك مشاكل فى ظهرك : يعنى انحناء العمود الفقرى بيؤثر على المثانه برده ونفس الحوار
3. لو انتى رياضيه : بالاخص القفز والجرى والحجات اللى فيها تنطيط كتيييير
4. اخيرا ودى الاهم : الولاده الطبيعى … وخصوصا المتعثره منها لانها بتفكك العضله وتضعفها ومع الحجات اللى فوق دى تلاقى الحياه بقت بمبى وما بتعرفيش تجمعى صلاتين بوضوء واحد
طيب والحل :
لو عندك التهاب مجرى البول يبقى على الدكتور طوالى ومعاكى تحليل البول عشان تاخدى مضاد حيوى وفقا لحالتك وان شاء الله تروح على طول لكن الاهمال بيودى الى ارتفاع الالتهاب الى المثانه ثم الى الكلى ربنا يعافينا جميعا
لكن بقى لو عندك حاله سلس البول الاجهادى زى حالتى كده يبقى مفيش الا حل واحد (( تمارين كيجل ))
فوائد تمارين كيجل للمرأه :-
1. تقويه عضلات المثانه : عشان تتخيلى الوضع , المثانه دى زى البالون اللى مليانه ميه ومقلوبه … لو ما قفلتيش البالونه كويس طبعا هتوقع اللى فيها
2. تحسين العلاقه الزوجيه … كنت هنسى والله يا جماعه العضله بتاعه البول هى العضله بتاعه الجماع هى العضله بتاعه فتحه الشرج
يعنى الحوار دى هيظبط لك الثلاث اماكن عشان الناس اللى عندهم بواسير ما
يزعلوش اهو
3.التخلص من الالتهابات المزعجه المقرفه الخنيقه الله لا يرجعها .. ليه ؟؟ حد بيقول ليه ؟؟ لان الالتهابات دى عباره عن بكتريا كويسه مش وحشه بس هى عايشه فى الامعاء وبالتالى بتخرج مع البراز وبما ان فتحه الرحم مفتوحه على السابع تقوم البكتريا دى تدخل المهبل وتروح للرحم واول بقى ما تدخل المكان ده يحصل المشاكل لان هى دلوقتى فى وسط غير اللى هى مخلوقه عشانه يقوم الجسم يقاومها ويعمل صديد والتهابات وحوارات كده كتييير … لكن انتى بقى لو ضيقتى لها فتحه الرحم دى نقدر نقول ان التهابات هتقل بنسبه كويسه
4. الفايده المهمه جدا ان جوزك هيدعى لى
**************************************************
نخش بقى على المفيد
مده التمرين : من 6 الى 8 اسابيع بالنسبه للى العضله عندهم متدهوره خالص لكن بفضل الله تجدى التحسن والفرق واضح جداااا من تانى اسبوع او فى اخره .. لكن يفضل ان انتى تستمرى عليه طول العمر … يعنى لو جوزك مش هنا او انتى معدتيش هتخلفى تانى يبقى انتى مش مضطره تعمليه لكن الجماع والولاده الطبيعى بيضعفوا العضله يبقى يفضل الاستمرار
بدايه العلاج : ان شاء الله اول ما تخلص العاده الشهريه تبدأى على طول وده لانى جربت قبلها ولما جت حسيت ان الرحم مفتوح ومش كنت عارفه اعملها فيفضل اول ما تخلص على ما يفوت الشهر تكونى خلصتى
نشوف بقى ازاى تعرفى العضله دى :…. اصل ساعه ما بقول تمارين كيجل تلاقى الناس شدت عضله المؤخره زى ما يكون هيأخدوا حقنه ..هههههه لالالا مش دى خالص يا معلمين احنا مش هنعطى حقن
بصى انا افضل يعنى مع الاحترام الشديد افضل انها تكون وانتى فى بيت الراحه اعزكم الله وخصوصا الافرنجى مش القعده البلدى
جربى كده تحكمى البول هتلاقى العضله اللى فى الامام بس هى اللى بتتشد وهى دى بالظبط اللى احنا عاوزينها
معلش حاجه كمان قبل ما تطلعى من الحمام
جربى تشوفى اتساع منطقه المهبل وخدى بالك قوى من الحته دى عشان هنشوفها تانى كمان اسبوعين
خلاص عرفنا العضله زى الفل … نبتدى الشغل
الاسبوع الاول :
اليوم الاول : بما اننا فى الاول اول ما تيجى تشدى العضله هتحسى انها بترتعش ما تقلقيش ويفضل انك تشديها جامد وما ترجيهاش
يعنى لما تقبضى العضله يبقى تقبضى بضمير ولما تسيبيها يبقى برده بضمير
وابتدى شدى العضله اقبضيها يعنى زى ما يكون عاوزه تحبسى البول هتحبسى كده تقريبا من 3 الى خمس ثوان
يا دوب على ما تقولى سبحان الله وبحمده سبحان الله العظيم 4 مرات
بعد كده ارخى العضله خااااالص وبرده من 3 الى خمس ثوان على ما تقولى سبحان الله وبحمده سبحان الله العظيم 4 مرات تانين
اعملى الحوار ده 10 مرات … يعنى انقباضه + انبساطه يبقى كده واحد
الموضوع ده بقى 3 مرات يوميا فى اى وقتى ولو خلتيهم واحده الصبح وانتى لسه صاحيه والتانيه وانتى بتيمى البنت الظهر والتالته قبل ما تنامى بالليل هيبقى روتين وكويس زى الفل
نراجع بقى سوا
انقباضه 4 مرات تسبيح بعدها انبساطه 4 تانين
نكررهم 10 مرات يبقى كده مجموعه الصبح مثلا
كمان 10 مرات الظهر وكمان 10 بالليل
خلصتى العشره … برافوا عليكى
حجات مهمه جدا
1. مهم جداا انهم يبقوا 10 متواصلين على الاقل اول اسبوع لان ارهاق العضله هو اللى بيجيب نتيجه مش تعملى الوقتى مره وكمان شويه مره
لا مش هينفع هما ال 10 وراء بعض
2. اتنفسى كويس شهيق وزفير يعنى خدى نفس من الانف براحه وبعد كده طلعيه من الفم براحه
3. ما تشديش اى عضله تانيه الا دى .. يعنى لا تشدى عضله المؤخره ولا عضله الحوض اللى هى بين الركبتين دى ولا حتى بطنك عشان العقل يركز فى العضله دى بس
4. مهم كمان ان طول فتره العلاج مفيش اجهاد نوهائى … يعنى لو انتى بتعطسى او بتكحى يبقى تقفلى رجلك عشان ما تحمليش ضغط على العضله وممنوع طبعا القفز والجرى المجهد
اليوم التانى والتالت والرابع و …. : نفس الحوار بس انتى بقى بقيتى متمرسه مش مهم خالص الوضع ده ممكن اى وضع تحبيه
بس مثلا لو نفس الوضع ده بس تتقلبى على جنبك انا بحس انه وضع كويس جدا ومركز اكتر على المنطقه اللى احنا عاوزينها
لان احنا قلنا ان العضله واحده بس فى اوضاع بتركز على مبطقه واوضاع تانيه على منطقه لكن كله هيمشى برده ما تشغليش بالك
الاسبوع الثانى: انتى بقى متمرسه طولى المده وخليها 10 سبحان الله وبحمده سبحان الله العظيم
كملى بقى الى الاسبوع ال6 والثامن لكن فى اخر الاسبوع التانى من فضلك ادخلى الحمام تانى وتحسسى فتحه المهبل وشوفى الفرق فى الاتساع بنفسك وشكرا
اسالكم الدعاء واسفه على الكلام الخارج
en_swety en_swety فتكات رائعة Fatakat 424924 المنصوره – مصر