السلام عليكم
ازيكم يا فتاتيك يا قمرات
جيبالكم النهارده طريقة لعمل الشاورما وعيش الصاج والتوميه كمان ومن غير رغى كتير هندخل فى الموضوع
اول حاجة هنعملها طريقة العيش
المقادير : نصف كيلو دقيق _ 3ملاعق زيت _ 2/1م كبيرة ملح _250 ملى ماء او مج كبير
ندخل بقى على الطريقة بعد لما نعجن العجينة بتاعتنا نسيبها ترتاح نصف ساعة
انا قطعتها على عشرة ارغفة بيطلع الرغيف متوسط او حسب ماتحبى
وبعدين بنفرد العجينة ونسخن طاسة او جريلة كويس وننزل بالعيش عليها مش بياخد وقت اقل من نصف دقيقة على كل ناحية والمهم ماتسيبيهوش لما ينشف واول لما تشيليه من على النار تغطيه بفوطة او اى حاجة علشان ماينشفش ودى اول حاجة خلصت
وادى اول رغيف
وده التانى بعد لما ارتاح وهو بيبتدى يقب
وواحد كمان علشان محدش يزعل فى ناس بتمسك فوطة او اى حاجة وتهبطه علشان ما يعملش فقاقيع بس انا بحبه يقب علشان ما يبقاش عجين من جوه
ندخل بقى على التوميه
المقادير :2ابيض بيض _نصف كوب ماء _ 5فصوص ثوم _50جم ملح _عصير ليمون_ 1ثمرة بطاطس _كوب زيت
الطريقة: هنحط نصف كوباية المايه على النار واول لما تغلى ننزل عليها ببياض البيضتين ونقلب ونطفى النار ونسيبهم يهدوا شويه وكده نضمن البيض استوى ومعدش فيه مشكلة علشان انا عن نفسى مش بحب اى حاجة فيها بيض نى بعد كده هنحطهم فى الخلاط مع الثوم والملح وعصير الليمون او شوية خل لو مفيش ليمون ونضربهم وننزل عليهم بالزيت هنلاحظ ان القوام بقى غليظ هنحط البطاطس بعد لما نسلقها كويس ونضربهم مع بعض ولو حابينا نخففها شويه ممكن بمايه سلق البطاطس لحد لما نحصل على القوام المطلوب وكده خلصنا تانى حاجة وده كان شكلها
ندخل بقى على التقيل طريقة عمل الشاورما
المقادير : فرخة مخلية او بانيه _ 2 بصلة _ 2طماطم _ 2 فلفل اخضر _ البهارات ( ملح _فلفل_ كسبرة ناشفة_ كمون_ ثوم بودر_ بصل بودر_ بابريكا _ جنزبيل _ قرفة_كركم ) تقريبا ملعقة من كل حاجة ولو ماعندكيش اى بهار من دول مش مشكلة _2م خل _2م ليمون _مستردة كاتشب.
نيجى بقى على الطريقة انا هنا استخدمت فرخة كاملة وخلتها بس ممكن تستخدمى بانيه عادى خالص
ودى صورة العضم مش هنرميه هنحطه فى الشوربة ماحنا فتاتيك بقى
تقطعى البصل شرائح وتدعكيه بشويه ملح وفلفل وتدعكى بيهم الفرخة كويس بعد لما تقطعيها شرائح وتسيبيها شوية
تحطى كل باقى البهارات والمستردة والكاتشب والخل والليمون مع بعض وتتبلى بيهم الفراخ كويس وتسيبيها فى التتبيلة دى مش اقل من خمس ساعات ويفضل تعمليها من بالليل
تجيبى طاسة تحطى فيها ملعقتين زيت وملعقتين سمنة او زبدة وتنزلى بالفراخ والطاسة ساخنة وتقلبى وقرب لما تدخل فى السوى تحطى عليهم شرائح الطماطم والفلفل وبس خلاص
هنا هنجيب العيش ونحط عليه كاتشب على توميه وخيار مخلل وطبعا الشاورما اوعى تنسيها وتلفى
اخر خطوة بقى عارفه انكم زهقتوا منى هنبصم العيش زى ما بيقولوا على الجريلة واستمتعى باحلى شاورما اوفر وألذ وانضف ميت مرة من بتاعت برده
وده الشكل النهائى
وصورة كمان علشان الحبايب
واخر حاجة بقى ومن غير ما حد يزوق طريقة كمان للشاورما عملتها قبل كده بعد لما خليت الفرخة وتبلتها بنفس الخطوات اللى فاتت لفتها رول وربطها بخيط قوى زى عرق الفلتو كده وحطيتها فى سيخ الشوايه بتاعت الفرن وحطيتها تستوى وسيبتها لما استوت وقطعتها شرائح وخدتها بلانشيه فى الطاسة مع الطماطم والفلفل بس بجد كان طعمها تحفة زى المشوية على الفحم ودى صورة للتشويق
وفى الاخر مش طالبة منكم غير دعوة حلوة ان ربنا يباركلى فى زوجى واولادى واوعوا تنسوا التقييم وبالهنا والشفا مواضيع هذا القسم برعاية
توتى تاتو توتى تاتو 1239286_1.gif فتكات هايلة Fatakat 1239286 القاهرة – eygpt
سبحان الله و بحمده