اذيكم يا أحلى فتوكات يارب تكونو بخير
انا عملت انهارده فضلة خيركم ممبار هو متعب شويه فى نضافته لكن طعمه يستاهل تعبه
تعالوا معايا شوفو الخطوات بالصور
أول خطوه هى خلطة الأرز هانجيب بصله كبيره نقطعها مكعبات ونشوحها ع النار مع مكعب زبده وشوية زيت بالشكل ده
وهانقلبها لغاية ما لونها يغمق يبقى ما بين الدهبى والبنى بالشكل ده
وهانجيب الطماطم نغسلها كويس ونضربها فى الخلاط ومعاها فصين توم
ونضيفها ع التقليه كده
ونسيبها تتسبك شويه ونضيف عليها ملح وفلفل اسود وبهارات وشطه لو تحبوا وذرة قرفه وذرة نعناع بالشكل ده
ونجهز الخضره شبت وبقدونس نقطعهم كده
ونحطهم ع الصلصه ومعاهم الأرز بعد ما نغسله كويس ودى شكل الخلطه بعد ما خلصت
نيجى بقى للممبار نفسه نغسله كويس بخل وملح وبظهر السكينه نزيل كل الدهون اللى عليه وننقعه فى خل وملح مرة تانيه وده شكله بعد ما نضف طبعا ما ينفعش اصوره قبل النظافه وتشوفوا هاتكرهوا الممبار وتقيموا لى سىء
وفى فكره كويسه عشان تتأكدوا من نضافته وهى انك تمسكى طرف الممبار بأيدك وتمليه مياه وتمسكى الطرف التانى بايدك التانيه لما تلاقى الممبار شفاف وانتى شايفه المياه اللى جوا ومفيش دهون ع الممبار هاتتأكدى انه نضف بالشكل ده
ودى صورة الممبار أثناء الحشو ويفضل استخدام فوهة زجاجه بلاستيك تقطعيها من الزجاجه وخليها عندك فى البيت للحشو بديل القمع
وندخل بقى ع السلق فى ناس بتربط طرفى الممبار وهو بيتسلق بس بلاش من غير ما تربطى انتى ممكن تمسكى طرفى الممبار من الناحيتين وتسقطى الممبار بالراحه خالص فى مياه السلق وياسلام بقى لو تحطى فى الميه وانتى بتسلقى الممبار بصله صغيره وحبة طماطم صغيره ومكعب مرقة دجاج وورقة لورى هايديكى طعم جناااان
ودى صورته وهو بيتسلق
أخر خطوه هى القلى بس دى ما صورتهاش بس يفضل انك ما تقليهوش بعد السلق مباشرة لازم تسيبيه يبرد شويه وبعدين تقليه ودى صورته بعد ما جهز للأكل
وطبعا مع التزويق ببقدونس أو جرجير
يارب يعجبكم وبالهنا
انا ماعرفتش افتح الصور حاولت بس كانت بتنزل متلخبطه ياريت حد يفتحهالى ويعرفنى ازاى انزل صور كتير فى موضوع عشان انا فرحى بعد شهرين ومش عارفه انزل صور شقتى ازاى ومعلش انا رغيت كتتييير
واوعى تنسى التقييم يا فتوكه منك ليها
مواضيع هذا القسم برعاية
هبه الخياط هبه الخياط فتكات نشيطة Fatakat 1036754 مدينة المنيا – مصر