السلام عليكم ورحمة الله وبركاته
ازيكم يابنات ويامدامات
بصوا بقي انا مشكلتي كانت اني لسة والده من شهرين وبما ان بطني كان شكلها مريييييب جدا في الحمل والله مابابالغ كانت مدورة كده وطالعلها بوز غريب هههههههه كنت منفوخة نفخة صعبة اوي وبعيد عنكم رجلي كانت ورمة وده كان سبب من اسباب قلة الحركة وزني زاد كتير في الحمل انا كنت 67 تقريبا بقيت 83 المهم ماطولش عليكم يعني من هنا لهنا يابنات بعد الولاده بقيت 77 وزحزحناهم شوية بقوا 74 ايوة 74 ده بالظبط كان اول بداية ليا في رحلة الريجيم .. طيب قولولي بقي ايه المشكلة دلوقتي؟؟ المشكلة طبعا لو تتذكروا كنت قولت اني بطني كانت كبيرة في الحمل واذ بي يابنات طلعت من العملية القيصرية وما ادراكم مالقيصرية كما لو لم اكن قد ولدت بتيتا نوهااائي خالص المهم دورت علي بنتي ولقيتها موجوده ماشاء الله وزي القمر قلت الله امال مين بقي اللي جوا ؟؟؟ وقمت مزعقة بصوت عالي اوي اطلع بره وبرده مفيش حاجه عايزة تطلع … طبعا بقي كل اللي يشوفني يقولي هو الدكتور نسي حد جوه ولا ايه ؟؟ هههههههههههه طبعا خفة اوي لا ياختي مانساش حاجه
المهم نعود لمرجوعنا الاساسي ان مثل هذه البطن المدلدلة استمرت بالشكل دون حوالي شهر ونص عن جدارة قلت بقي مابدهاش انا بسمع عن الدايت طول عمري وبصراحة كان نفسي اجربه من زمان اهو تغير …
بس ماقدرتش اقاوم اوي بس طلعت بحاجه مهمة جدا ابتعدت تماما عن المحظورات وانتوا عارفين السمنه والمحاشي والمقليات والبلاوي ديه وكمان قللت خالص في الوجبة بتاعتي واهم شيء مشروب الطاقة اللي هو الجنزبيل بالليمون
نيجي بقي لاهم شيء خلاني افقد جزء كبير من مثل هذه البطن المدلدلة كااااااااااااااااانت المشي ات هوم دوت كوم
اه والله ياختي انتي وهي اصل احنا حدانا ريسبشن كبيييير اوم ايه بقي انا اطلع اجري فيه رايحة جاية وكل يوم اكتر من 500 مشية بنطه وجوزي كان بيشجعني من داخل سريرة قلبه ويقول لي استمري يا اعتدال مش قادرة اقولكم معنوياتي كانت مرتفعة اد ايه
بس جت عليا فترة كنت ابتديت اياس وازهق وانا بقي داخلة عاليأس وخلاص اهو هيأس اكتشفت اكتشافا خطيرا اه والله وحياة بنتي لقيت الدلاديل والرهاليت الفظيعة اللي كانت في بطني اتشدت خالص وطلعت لفوق يعني بطني بقت مشدوده خالص قلت يااااااااااااااه بجد يابنات الحركة بركه وطبعا ده كان دافع شديد اني استمر واستمريت اسبوعين كمان مع تكثيف الجرعة ودخلت كمان حاجه حلوة اوي هي نط الحبل بقيت باتمشي في البيت طبعا مش مشيه البطه ياختي لا امشي وانتي بتمدي ونطي الحبل علي اد ماتقدري او تظاهري انك بتنطي الحبل ده بالنسبة للزملا الي ماعندهمش حبل او عندهم وهما مايعرفوش ينطوا طبعا لما بطني اتشدت لفوق بقت مشدوده وشكلها حلو بس بقي اللي اكتشفته اني عندي كرش للاسف والكرش اللي اقصده يابنات اللي هو المعده يعني بطن مشدوده ولكنها منفوخه قوم نعمل ايه بقي طبعا استمريت الاسبوعين دول لقيت اكتشاف اخر وخطييييييييييييييير ايه هو بقي عشان بجد ده حسسني ان المشي والرياضه بيجيبوا نتيجه حلوة بصوا يابنات امبارح والنهارده حاسة ان بطني بقت طرية شوية والرهاريت والدلاديل اللي فوق الخياطه رجعت تاني بجد اتصدمت في الاول بس لما ركزت اكتشفت حاجه ان الدلاديل ديه نتيجة نزول الكرش اقسم بالله منطقة الكرش او المعده بقت مسطحة جدا عندي ومابقتش بارزة زي الاول وعشان الكرش نزل فلازم البطن تبقي مترهلة شوية من تحت وبعدين مع الاستمرار عالرياضه حاسة بتحسن وان كل شيء بيختفي تمام وباذن الله بطني هتبقي مشدوده من غير ترهلات ولا كرش ولا اي اثر للحمل والولاده ونسيت اقولكم انا كنت بادئة من شهر ب 74 دلوقتي بقيت 69 الحمد لله وده انجاز لان بعد الولاده الحرق بيكون قليل بس اللي نفعني بجد المشي والرياضه …
ملحوظة الكلام ده بقوله للي مابترضعش طبيعي يابنات زيي انما لو بترضعي بلاش احسن وشوفي مع الدكتور هيقولك ايه ..
وعلي فكرة يابنات نسيت اقولكم شيء مهم وخطير جدا تخيلوا وانا ماشية في الشارع اذ فجاة بالاقي الناس بتناديني وتقولي يا انسة وانا مش فاهمة هما يقصدوا ايه مش معقول اكاد لا اسدق نفسي من الذهول !!!! بقيت الانسة اعتدال اشكرك ياربي حققتلي كل احلامي انا اتحرمت من الكلمة سنين طويلة كانوا الله يمسيهم بالخير يشوفوني يقولولي ياست الحجة
بنات حبيت انقلكم تجربتي عشان تستفيدو وبقول لكل اللي بيعملوا نظام غذائي اهم شيئ الرياضة واسهل شيء طبعا المشي ادعولي اكمل باراده قوية يابنات وبالله عليكم اللي حست انها استفادت من الموضوع تدعي لبنتي ريماس ربنا يخليهالي ويحفظهالي يارب
سلامووووووووز
remooo123 remooo123 488390_1.gif سوبر فتكات Fatakat 488390 اسكندرية – lمصر