اللهم صلى وسلم وبارك على سيدنا محمد وعلى اله وصحبه وسلم
فتوكاتى الحلوين طبعا انا اتعلمت منكم كتير اوى اوى
وبقيت شاطرة فى المطبخ بفضلكم وفضل منتدانا الجميل
المهم بقى انا عملت حمام محشى وطلع اكتر من ررررررررائع الحمد لله
وقلت اصوره بقى بالتفصيل الممل علشان اوريكم شطارتى
ندخل على المقادير علطول ونقول بسم الله
حمام حسب عدد افراد اسرتك
كبد وقوانص الحمام متقطعه صغير
بصلة متوسطة مبشورة
ملح وفلفل ورشة قرفة
ملعقة سمن بلدى
كوب ارز
نصف كوب ماء
نقول بقى الخطوات
اول حاجة طبعا الحمام يكون مغسول ومتنظف كويس
بعدين حنحط السمن فى طاسة ونشوح البصلة شوية
بعدين نضيف الكبد والقوانص والملح والفلفل ونحمرهم شوية
بعدين نحط الرز ورشة القرفه ونقلبهم
ونحط عليهم نصف كوب الميه ونغطيهم
ونوطى عليهم النار علشان يستوى نصف سوى
بعدين وهما بيستوى احنا نجيب الحمام
ونتبله بملح وفلفل خفيف كده من بره وجوه
وهنا بعد ما الرز استوى وده كان شكله
بعدين حنجيب الحمام ونحشية كويس من جوه ومن عند الرقبة
ونقفله بخله الاسنان كويس من فوق ومن تحت
وده شكله بعد ما اتحشى
بعدين حنسلقه عادى فى الحلة ومعاه ملح وفلفل وبصله صغيرة ومستكه وحبهان
ونسيبه حوالى ساعه الا ربع علشان بستوى كويس
بعدين حنطلعه ونفك منخ الخله الخشب
بعدين حنحمره فى الزيت وده شكله
وتاكلوه بالهنا والشفا
وطبعا انا مش حطلب منكم ردود حلوة وتقييم
انا عارفة انتكوا شاطرين ومن نفسكوا حتعملوا كده
انا حطلب منكم دعوة حلوة من قلبكوا الطيب
لخطيبى ربنا يكمل شفاه على خير ويهون عليه الغربة ويتمملنا على خير ان شاء الله
سبحان الله وبحمده
سبحان الله العظيم مواضيع هذا القسم برعاية
ساره الاسكندرانيه ساره الاسكندرانيه 100189_9.gif Fatakat 100189 الاسكندرية – مصر ام الدنـــــيــا