السلام عليكم و رحمة الله و بركاته
أنا هدى متزوجة من سنة بالظبط و لم أرزق بحمل حتى الآن الحمد لله و عندي 21 سنة و في قمة إحباطي و قلقي قعدت أفكر شوية لقيت إني المفروض مازعلش مادام ربنا مقدرلي كده يبقى ده الخير ليا و ربنا أعلم بالخير ليا و أشهد الله أني راضية بقدره تماما
من ست شهور روحت للدكتورة علشان البريود عندي مش مظبوطة و الدكتورة طلبت تحليلي الغدة الدرقية و الحمد لله طلع كويس و بعدين كتبتلي كده دوا علشان ينزل البريود و أخدته و كتبتلي على دوا اللي هوا دايرة دا نصه بني و التاني أبيض و قالتلي العلاج من 3 إلى 6 شهور و مش هيحصل فيهم حمل و ده علشان البريود تنتظم المهم أنا خفت من الدوا علشان هرمونات جسمي ماتبوظش و قولت هسيبها على الله و من ساعتها و الحمد لله البريود بدأت تنتظم قولت أصبر كام شهر و ربنا يسهل و فعلا بقالي 3 شهور البريود منتظمة و الحمد لله قولت طيب أروح لدكتورة تانية فجوزي قالي لأ خلينا شوية نستنى البريود تنتظم و إن شاء الله خير بس قولت إيه بقى ؟؟؟ ما أنا مش هقعد ماعملش حاجة قعدت أدور في المدونة على وصفات و خبرات تساعد على الحمل و لقيت إن الحجامة بتساعد على الحمل لأنها بتطلع البرد و الرطوبة من الضهر و اللي ليهم سبب رئيسي في تأخر الحمل و الموضوع ده برضه يعتبر قفل للضهر علشان لو حصل حمل يتثبت كلمت ماما علشان كانت بتعملها عند أخت متخصصة و قولتلها أنا عايزة أعمل الحجامة علشان ضهري بيوجعني و مارضيتش أقولها علشان الحمل علشان ماتحسش إني بفكر في الموضوع و تزعل عليا …. أخدت نمرة الأخت و كلمتها و قالتلي تعالي بعد البريود ما تخلص …. قولت طيب أنا هقعد لحد ما البريود تخلص ما عملش حاجة ؟؟؟ لأ طبعا فضلت أقلب في المدونة و أدور لقيت الأخت ريمونتي ربنا يباركلها كاتبة و صفة الدكتور سعيد حساسين لتنشيط المبايض و هتلاقوها في اللينك ده
https://fatakat.univanet.com/#1637040
و الوصفة بتتاخد برضه أيام البريود قولت الواحد يتوكل على الله و ياخد الوصفة أخدتها امبارح و هاخدها بكره و بعده إن شاء الله و ربنا يكرم ………. في حاجة تانية برضه اقيتها في المدونة و جابت نتيجة مع ناس كتير اللي هي وصفة ام مروان و هتلاقوها في الموضوع ده المشاركة 39
https://fatakat.univanet.com/#1074996-4
و هي وصفة طبيعية لتطهير الرحم من أي إلتهابات و مايكروبات و دي برضه بتتعمل بعد البريود على طول ………
المهم دي كل الحاجات اللي أنا ناوية أعملها و كل الحاجات اللي أنا توصلتلها في بحث دام أكتر من 6 شهور و الهدف من الموضوع إننا نلاقي حد نتكلم معاه بصراحة و من غير إحراج لأن ماحدش هيحس بينا غير اللي مر بظروف زينا و مش هنعرف نتكلم في الموضوع ده بالذات مع العيلة أو إخوتنا علشان هيشيلوا همنا …….. كمان أنا عملت الموضوع ده علشان كل اللي عندها خبرة في المجال ده تفيدنا لعل يكون سبب في حمل واحدة فينا و يكون في ميزان حسناتها ….. و كمان علشان كلنا نتعرف على بعض و نكون صحبة صالحة و نتعاون على الخير دايما إن شاء الله و ندعي لبعض بظاهر الغيب إن ربنا يرزقنا جميعا الذرية الصالحة و الأهم من كل ده الحرص على الصدقة يا بنات و الله فتوكات كتير حملوا بعد إنتظار طويل ببركة الصدقة و عايزين يبقى عندنا يقين في الله تعالى و إرادة قوية و ضد أي بصة مش كويسة من حد نفسيته مريضه …… و ربنا يرزقنا جميعا الذرية الصالحة …. يا ريت أي واحدة ليها أي تجربة تكتبها يمكن حد يستفيد منها
و السلام عليكم و رحمة الله و بركاته
دلوعة قلب حبيبي دلوعة قلب حبيبي فتكات ست الكل Fatakat 290062 cairo – egypt