السلام عليكم ورحمة الله وبركاته
ازيكم يابنات حابة اقولكم ع اللي حصل معايا وانكم ماتقعوش ف الللي حصل
حجزت اتوبيس من الموقف انا وبابا وماما ورحنا دمياط وصلنا ع الساعة 11 اتوبيس بطيء بقى نعمل ايه
وخطيبي برضه وصل من القاهرة على دمياط ف نفس التوقيت بالعربية ومعاه اهله
وقالنا ان اهله يعرفو ناس بتوع معارض وبيشتروا ديما من عندهم وكده رحنا 4 معارض لا انا ولا احمد مقتنعين بحاجة ولاننا عايزين مودرن ومش مقتنعين كان الاول اهلي واهله بيلفو معانا شوية وتعبو وقالوا روحو انتم الاتنين لفو براحتكم ولما تخلصو تعالو نروح نتفرج
عايزة اقولكم اللف بياكل وقت رهيب احنا قعدنا نلف اكتر من 10 معارض وكل معرض لا يقل عن 5 ادوار وعايشو بقى اطلعي وانزلي كل شوية
المهم عجبنا اوضة نوم وسفرة واطفال من معرض ولقيت اهلي بيتصلو الساعة 4 انتي فين يللا بسرعة عشان نلحق نروح
مبدئيا كده لو هتاخدي حد من اهلك لازم يكون عنده طول بال ف اللف وبلاش استعجال خالص
دول ماصدقو قولت عجبتني حاجة بس مكنتش مقتنعة بيها خالص
المهم اتفقو ودفعو العربون وروحنا
وانا بقيت بعيط لاني حاسة اني استعجلت بسبب اهلي واهله اللي من الاساس محدش لف معانا واستعجلونا بعدها بيوم اتصلت باحمد قولتله مش عايزة اوضة النوم غيرها
قالي يعني نرجع تاني دمياط وفعلا
رحنا تاني مرة دمياط انا واحمد وماما ورحنا معارض بجد وهم وزعلت اوي اوي لاني اتسرعت ف اختيار العفش
والمرة التانية لقينا حاجات عجبتنا اكتر بكتير بس نقول ايه النصيب
واشتريت اوضة النوم بالرغم ان المعرض الاولاني اللي اشتريت منه اوضة النوم اللي مش مقتنعة بيها خشرنا فيها 500 جنية لكلام عبيط قعد يقوله يقول انا اتفقت مع النجار ع التعديلات ووديتها الورشة وكلام اهبل كده قولنا مش مشكلة المهم ناخد فلوسنا
والمعرض التاني اللي كان عاجبنا الاوضة حجزنا معاه
بصو النصايح
1- بلاش تاخدي حد يقولك رجلي بتوجعني ولا مش قادر يلف لانك بجد هتحسي باحباط ولا كانك عروسة وده اللي فعلا حصل معايا
2- بلاش تستعجلي ف الشرا ان شاء الله تروحي دمياط مرة واتنين وتلاتة عشان متحسيش انك ادبستي
3- فاصلي ع اد ما تقدري اللي يقولك 15 قوليله لا 10
4- ماتدلئيش اوي لما تلاقي اوضة عجباكي الراجل لما بيشوف كده بيبقى رخم اوي اوي ف الفصال
5- حاولي تروحي بدري واركبي اتوبيس الساعة 7 انا من غبائي قولت 8 كويس ووصلت متاخر
6- يوم الجمعة اجازة عشان كنت هتهور واروح يوم جمعة
7- متخليش حد يفرض عليكي حاجة يعني الاوضة الاولانية الكل اجمع انها رائعة وانا قولت لا وبعدين لو حسيتي من الاول انها لا متاوحيش وتقولي اه
8- حاولي تتفرجي وتاخدي فكرة سريعة وتاخدي كارت المحل وتكتبي اللي عجبك فيه مش تعملي زيي عجبني بس مش فاكرة انهي محل
9- بصي ع الخشب كويس وامسكيه بمعنى لازم تفلي الاوضة اللي ادامك ولا كانك اجدعها نجار
10- قبل ما تدفعي الفلوس قولي الحاجات اللي عايزة تعديلها لان لو دفعتي الفلوس وجيتي تقولي لا انا عايزة اغير ده ولا ده الراجل بتاع المعرض بيتنفخ عليكي
11- لازم تكوني عارفة كويس مساحة الاوضة عندك انا واحمد كنا ماشيين برسم للاوض كلها
وربنا يوفقني ويوفقكم
ويجمعني مع احمد على خير
وديه صورة اوضة النوم اللي غيرتها
صور لبعض الاوض
Chef Abeer Hosny Chef Abeer Hosny 152334_33.gif برنسيسة فتكات Fatakat 152334 اسكندرانية وعايشة ف القاهرة عشان جوزي – مصر