ازيكم يا كل الفتوكات
انا هاكتب تجربتي مع الاورام الليفة لان لاحظت ان الموضوع دا اقل موضوع في مواضيع فتكات او حتي في المنتديات الخارجية اغلبهم بيكلم عن تعريف الورم وشكله واماكن وجوده وطرق استئصاله بس قليل لما تلاقي حد ليه تجربة شخصية .
وتجربتي الاتي ان متزوجة من 3 سنوات وقبل فرحي باسبوع عرفت ان الدورة هتيجي يوم الفرح فقررت اروح لدكتور يديني اي اقراص تأجلها 4 ايام او اسبوع بالكتير المهم الدكتور كشف علي بسونار خارجي من باب الاطمئنان وغاب في الكشف فقالي ياريت تشربي لتر مياه و تيحي اكشف عليكي تاني قلقني فسألته في حاجة قالللي شاكك يكون في ورم ليفي انا اتخضيت لان دي أول مرة اسمع الكلمة دي قالي متتخضيش دي اورام عادية
رجعت له بعد ساعة وكشف سونار تاني قاللي فعلا في ورم ليفي بس صغير جدا اقل من السم 0مهتمتش ووعدي الفرح وعدي 6 شهور وانا في انتظار الحمل محصلش كشفت عشان اشوف في ايه الدكتورة قالت لي عادي كل حاجة كويسة وعادية وزي الفل وفي ورم صغير بس ميأُثرش وادتني منشطات وقالت لي ارجعي الشهر اللي جاي
محصلش حمل برده رحت طلبت تحليل الزوج طلع في ضعف حركة بسيط . قالتي جوزك ياخد العلاج ولما تكملي سنة ارجعي .بعد كدا كشفت عند ناس كتتتتير جدا وكلهم يقولوا عادي معنديش حاجة لغاية ما قررت اعمل حقن مجهري واريح دماغي رحت لدكتور الله يكرمه قالي اسف مش هاقدر لازم الاورام اللي في الرحم تتشال لانهم 5 اورام صغيرة وقابلين للزيادة في العدد والحجم هما صحيح خارج تجويف الرحم لكنهم يأثروا علي الحمل وممكن يكونوا سبب في انتفاض الرحم فلا يحدث حمل
قالي لازم عملية استصال الاول
زعلت واتنكدت وقريت علي النت انها عمليه صعبة فيها مجازفة بالرحم ككل خفت جدا وقتها .فقررت انا وجوزي نروح لدكاترة تانية منهم اللي قال عادي داا ناس كتير عايشين بيهم وبيحملوا وناس تقول لازم يتشالوا لغاية ما رحت لدكتور كبير في اسكندية اسمه هشام صالح اعمل حقن وقالي لازم يتشالوا فعلا وقالي علي دكتور محترف في العملية دي دكتور اسامة الاشقر فقررت اعملها وعملتها فعلا هي زي القيصري بالظبط فيها فتح جراحي للرحم
وللبطن دخلت العملية ببنج كلي وبعد ساعتين فقت لقيت الدكتور جانبي بيقولي الحمد لله العملية نجحت والرحم سليم ومفيش اي التصاقات وربنا يكرمك وتقومي بالسلامة خدت 15 يوم نقاهة نايمة في السرير زي الولادة بالظبط
وشوية شوية بدأت اتحرك بس طبعا في فك السلك الدكتور اعطاني حبوب منع الحمل لمدة اربع شهور لغاية ما الرحم يرجع لوضعه الطبيعي لان اي حمل مع الجرح ممكن يسبب مشكلة كبيرة في الرحم
انا طولت عليكوا بس انا حبيت اذكر التجربة لان قابلت بنات كتير في المنتديات خايفين من العملية يارب يستفادوا من التجربة بتاعتي واهم حاجة في التجربة ان الدكتور اللي هيعمل العملية يكون شاطر جداااااااااااعشان يحافظ علي الرحم وعلي المبايض والقنوات
ادعولي بالذرية الصالحة عاجلا لا اجلا
واللي عايزة تستفسر عن اي حاجة انا موجودة
bacfa bacfa ممنوعة من المشاركة Fatakat 634522 الفجيرة – الامارات
سبحان الله و بحمده