بسم الله الرحمن الرحيم
السلام عليكم ورحمة الله وبركاته
ازيكم يا اخواتي عامليه ايه , انا قرات من شوية موضوع لاخت في الاعشاب والطب البديل عن وصفات لعلاج التهابات المرارة وحصواتها ربنا يجازيها خير ويكرمها بس حبيت برده ااكد علي شئ مهم اوووووي هنا في موضوعي واتمني اللي يقراه يستفاد ويفيد غيره علي قدر الامكان لان دي تجربتي من اول وجع حسيت بيه لحد عمليه المرارة اللي عملتها
من سنين وانا بيجيلي وجع في المعده , بيكون بالظبط في الجزء العلوي من المعده ,كان ممكن يجيلي بليل او الفجر او قبل الفجر , طبعا مكنش وجع طبيعي فكانت ماما بتاخدني لاي مستشفي في الاستقبال والدكتور يديني حقنة مسكنه واعد يوم او بالكتير يومين علي المسلوق وخلاص الوجع والترجيع يروحوا لحالهم
الاعراض دي كانت بتجيلي تقريبا تلات مرات في الشهر ولما روحت لدكتور اكشف اطمن علي نفسي قالي مفكيش حاجه دول شوية برد في المعده ربنا يسامحه مهنش عليه يقولي اعملي اشعه واداني <فلاجيل اقراص > وفعلا لما كانت بطني بتوجعني بسيط كده كنت باخده من نفسي وكان بيريحني
اعدت يمكن اربع سنين كده لحد السنة اللي فاتت كنت حامل ومن بداية حملي وكلل شوية الوجع يجيني والترجيع معاه
لحد التاسع وكانت الدكتورة كتبالي سبازمومين اقراص كنت باخده تقريبا كل يوم وحقنة بوسكوبان لما الوجع يكون جامد وكنت بخلص علب منها
جيت بقي ودلت وابني انوس متوفي ربنا يرحمه , في اليوم العشرين من النفاس جالي يا بنات الوجع بس مضاعف اضعاف
ولا نفع معاه حقن ولا برشام وفي نفس اليوم العصر روحت مستشفي المبرة ومن كتر الوجع دخلت الطوارئ وبيتناوب عليا من دكتور للتاني وعملولي اشعه صوتية وقالوا عندها< ورم دموي عند الكبد> اعوذ بالله ,وطلبوا اشعه مقطعيه علشان يتاكدوا بس المشكله كنت اشرب الماية ولحد ما اطلع عند الاشعه ارجعها وارجع مادة صفرا من بطني وبعدين مادة خضرا ,
المهم بعد الاشعه عرفوا ان عندي <التهاب حاد في البنكرياس> في دكاترة قالوا تدخل العناية المركزة بس دكتوري اللي مشيت معاه بعدها بقي جراح اسمه دكتور رمضان قال لا تتحجز حجز عادي بس تحت العناية والمتابعه طبعا واتحجزت بالمرض ده اسبوع من غير اكل طبعا ولا شرب مجرد محاليل فيها ادوية ومنها الفلاجيل لانه مطهر وبوتاسيوم وحاجات كده
مرض التهاب البنكرياس الحاد
مرض خطير نوعا ما واخطر ما فيه ان ملوش علاج مجرد بيبعدوا عني الاكل وهو بامر الله يخف مع نفسه كده
وجعه ربنا ما يوريه لحد كنت قاعده في المستشفي علي المخدرات علشان تسكن لي الالم
اعراضه وجع غريب اعلي البطن بيمتد للضهر
اسبابه
اول سبب واهم سبب تناول الخمور <علشان كده المرض مش مشهور في مصر ومفيش اساتذه فيه لان اللهم لك الحمد الخمور مش منتشرة طبعا في مصر> ودخت لحد ما لاقيت اللي فاهم فيه
تاني سبب الحوادث اللي بتبقي في البطن ودي فيها موت فوري ربنا يعافينا
تالت سبب <ده اللي انا كاتبه الموضوع علشانه> حصوات المرارة ..
بصوا يا بنات انا اعدت في المستشفي اسبوع وبعديها طلعت واستنيت شهر قبل ما ينفع اعمل عمليه المرارة بسبب ان المرارة كانت ملتهبة فمينفعش تتشال , ومعدتي التهبت , بجانب التهاب البنكرياس طبعا وده االهم والاخطر
ليه مينفعش اشيل الحصوات واخلي المرارة
لان الحصوات كانت صغيره وهي اللي سببت لي التهاب البنكرياس في حصوة انزلقت وسدت قناة البنكرياس بدل ما انزيمات البنكرياس تنزل علي المعده وتهضم الاكل بقت ترجع للبنكرياس تاني فبقي يهضم نفسه, يعني حاجه الي حد ما صغيرة قلبت الدنيا عليا بسبب تشخيص غلط ودخلت علي التهاب بنكرياس وهو مرض موت واللهم لك الحمد انه نجاني
يعني نستخلص من الكلام ده ان حصوات المرارة الكبيرة مش مضرة زي الصغيرة لان الكبيرة مش بتتحرك من مكانها لكن طبعا وجعها ونوبات الوجع والمغص والترجيع كفيله بانك تعالجي المرارة
نستخلص كمان ان حصوات المرارة الصغيرة ملهاش علاج الا ان المرارة كلها تتشال وفي علاج مهم اسمه <رواكول> ده خاص بالمرارة ايااااكم ان تاخدوه وانتوا عندكم حصوات صغيرة لانه بيساعد في تحريكها
متهملوش ابداااا وجع في المعده ده لازم يتعملوا علي الاقل سونار ومتصدقيش كلام الدكتور هما مبيعرفوش الجسم فيه ايه الا بالاشعه خاصة المعده
لو هتعملي المرارة<لا قدر الله > متبخليش علي نفسك علي اد ما تقدري انك تعمليها <منظار> مش جراحه لان الجراحه اصعب وفيه عضل جرحه بيتلم بصعوبة ومينفعش تعملي العملية الا لما تتاكدي ان المراره مش ملتهبه
حصوات المرارة مش زي حصوات الكلي بتدوب وتروح في البول لا مش ممكن يا تتعالج لو كبيرة او تشيليها , ياما تشيلي المرارة لو الحصوات صغيرة وباسرع وقت ممكن
المغص المراري .. اللي كان بيجيني ده بيتشابه مع اعراض القولون والتهاب المعده ولازم يتشخص صح لان علاجهم مختلف وطريقة تعاطيكي معاهم مختلفه طبعاا
يااااارب اكون عرفت افيدكم شوية ومكنش طولت عليكم
وربنا يشفيني وامي وابويا وكل مريض ويرد لنا صحتنا ردا جميلا ويااارب ما يكتب اي حاجه وحشة علي اي حد ابداااااا
ويحفظنا من كل سوء
ام انس ورقيية ام انس ورقيية 403027_2.gif سوبر فتكات Fatakat 403027 اسكندرية – مصر