السلام عليكم ورحمة الله وبركاته انا حامل في نص الرابع كنت بدور علي النت علي سعر ال 4D في مصر المهم لقيت بنوته مشكورة كاتبه في فتاكات انها عملتو فمركز الصفوة في شارع بورسعيد ب 90 جنيه المهم خدت رقم التليفون واتصلت بيهم رد عليا الدكتور وقاللي جهاز ال 4D باظ ودلوقتي عنده 3D ب 70 جنيه المهم رحت اولا المركز زباله ومستواه متدني جدا ثانيا الدكتور معندوش اي احترام للمرضي فضل مقعدنا اكتر من ساعة برا وواقف مع عمال عنده كانو بيعملوله يافطة في المكان مع ان المفروض لو انت دكتور وهتجيب عمال فعيادتك يبقي تجيبهم الصبح بدري او بالليل متأخر علشان راحة المرضي وطبعا العمال زعيق وشتيمة وسجاير وحاجة اخر قرف
كل ده مش مهم المهم بأه دخلنا وبعد عناء علشان اعمل ال 3D نيمني علي السرير وبدأ يشتغل والمفاجأه انه مش 3D ولا حاجة دا سونار عادي جدا زي اللي بنعمله عند دكتور النسا هتقولولي عرفتي ازاي اولا انا وجوزي دكاترة فطبعا عارفين فرق صورة ال 3D عن السونار العادي ثانيا مكتوب علي الشاشه بخط صغير 2D MODE يعني السونار العادي ثالثا لما اخدت الصور ورحت لدكتور النسا بتاعي هو كمان قاللي دا سونار عادي وسيادته حاططلي الصور اللي طابعها من الجهاز قدامي اللي الدكتور قال عليها دي صور سونار عادي وحاطط معاها صورتين جايبهم من علي الكمبيوتر بتاعه لعيل تاني اصلا مش ابني لطفل معموله 3D عشان اصدق انه عملي 3D
ماشي ما علينا من الجهاز وهو بيشوف عنده قاللي دي بنوته واكيد بنسبه 100 في ال100 ان شاء الله علي شويه كلام اهبل كده وشها مدور وشبهك وكلام متخلف ملهوش علاقة بالعلم في شئ رحت لدكتوري بتاع النسا اللي هو من اكبر الدكاترة في مصر واصريت انه يعملي سونار تاني عنده عملي السونار وقاللي دا ولد وبردو بنسبة 100 في 100 ولد ان شاء الله وواضح جدا والعضو بتاعه واضح جدا وانا شفته انا وجوزي
وطبعا مش هحكي علي الكمبيوتر بتاعه الخربان اللي قعد يفصل وذلنا جنبه ساعة علشان يرضي يفتح وينقلنا الصور اللي هي طبعا متفبركة
انا حكيت تجربتي وربنا يسترها عليا وعليكم ويرزقكم جميعا بالذريه الصالحة
dr heba dr heba فتكات حبوبة Fatakat 1095055 القاهرة – مصر
سبحان الله و بحمده