السلام عليكم
يارب تكونوا بخير يا كل الفتوكات
أولاً أنا بشكر المدونة جداً ، لإني متبعاه من فترة واستفدت منه كتير ، بس ماسجلتش لإنه ماكنش عندي إضافة أقدر أفيد بيها.
لكن دلوقتي حسيت اني مريت بتجربة مفيدة جداً ، و كنت بتمنى نجاحها عشان انشرها وكل البنات تعمل كدا ، بدل الفلوس الكتير أوي اللي بندفعها على حجات نقدر نجيب أحسن منها وبأسعار أقل كتير أوي ، وفرق الفلوس ده البنت أولى بيه تعمل بيه أي حاجة تانية.
ثانياً نبدأ كلام عن تجربة شراء الفستان ..
بداية أنا بدأت البحث عن الفستان قبل الفرح ب 6 شهور
ولقيت حجات كان عيوبها
1- السعر فوق 7 آلاف اللي كان بيعجبني شوية كمان مش اوي !
2- الموديلات شكلها مش راقي ، خرز فضي كتير وتانتيل كتير !
3- الموديلات لازم جيبونة سلك تتلبس تحت ودي بحس انها عروسة مولد كدا !
فلقيت إعلان لموقع tidebuy على النت ، وفكرت اني ممكن اخد صورر لفساتين وافصلها ، لكني كان في مشكلتين
1- مش ضامنة يبقى مظبوط عليا او يطلع حلو زي الصورة لو خياطين عاديين
2- التفصيل بردو هيتكلف 5 آلاف على الأقل لو حد متخصص وفاهم اوي
ففكرت ليه ماشتريش من الموقع
فكان قدامي تحديات
1- الموقع ممكن يكون مش موثوق فيه
وحليت ده عن طريق : بحثت عن الموقع ولقيت تجارب شراء منه كتير وأغلبها ناجح ، ولقيت إن الموقع واخد مركز عالي في تقييم بيقيم المواقع اللي بتاخد فلوس في مصداقيتها.
2- ممكن اختار موديل مايلقش عليا ، شكله حلو على الموديل بس لما اجيبه مش هيكون كويس عليا
فأنا وانا بلف قيست كذا فستان وعرفت ايه بيليق عليا وايه حباه
3- ممكن يتأخر الفستان
فطلبته بدري كتير على الفرح
4- ممكن الخامة ماتكونش حلوة
وده اصلا مش مهم لانه كدا كدا بيتلبس يوم وبس مش حاجة تعيش ، فعادي مش هيفرق معايا، المهم شكله وسعره يبقى كويس.
هنبدأ التجربة وبعدين اقولهم مميزات الموقع
-1-
بتدخلي على الموقع وتختار الفستان اللي انتي عايزاه وتفكري كويس وتشوفي كل الفساتين مش من اول فستان.
-2-
بتجيبي متر للقيلس اسمه مازورة ودي وسيلة قياس الجسم من عند اي محل ادوات خياطة ، وتقيسي مقاساتك زي الفيديو ده
اذا لم يعمل المقطع فاضغطي هنا
وفي على الموقع كمان خريطة للقياس ، وفي مقاس الموديل اللي لابسة الفستان عشان تعرفي تقارني بين مقاسك ومقاسها وتعرفي الفستان هيكبر أو يصغر اد إيه تقريباً
-3-
بتدخلي الموقع تعمليى اكونت ثم تعملي اوردر بالفستان اللي انتي عايزاه ومقاساته والوانه ، هتلاقي كل الالوان لاي موديل حتى فساتين الفرح
وفيه ivory ده اللي بيقولو عليه الاوف وايت ، وفيه ال white العادي
-4-
في كذا طريقة للدفع ، عن طريق البنك او الفيزا ، وده بتعمليه تاني يوم مثلا لما تبعتي الاوردر ، أنا دفعت عن طريق الفيزا ، واقروا اللي موجود وكل واحدة تختار اللي يناسبها ، ولو الانجليزي ضعيف ، بلاش ترجمة جوجل ، خلي حد من اصحابك او اقاربك يساعدك.
والدفع هتدفعي تمن الفستان وتمن الشحن بيبقى على حسب وزن الفستان – انا دفعت 31 دولار حوالي 210 ج شحن + تمن الفستان حوالي 1200
ده شحن عادي بالبريد بيبقى بطئ شوية في شحن تاني اسرع واغلي 20 دولار بس مالهوش لازمة الفرق حوال 5 ايام .
توضيح للشحن ، دلوقتي في كل بلد بريد خاص بيها وفي هيئة عالمية بتجمع كل البريد في كل البلاد ، وبيسلموا لبعض الطرود ، فالطرد بتاعك الشركة هتسلمه للبريد الصيني ، وهو هيسلمه للبريد المصري والبريد المصري هيسلمهولك.
-5-
الموقع بيحدث الاوردر بتاعك هتلاقي جنبه انه اتدفع وراح المصنع يبدأوا فيه
التصنيع بياخد حوالي 15 يوم .
-6-
كل مابيحصل حاجة بيتكب على الموقع ، انه مثلا اتعبت الاوردر للمصنع ثم خلص ثم انه اتبعت للبريد ، وصل مصر وهكذا
-7-
لما بيخلص وبيتبعت لشركة الشحن ، الموقع هيبعتلك رسالة فيها كود الطرد بتاعك ، وتقدري تتابعي الطرد يوميا على الموقعين دول
ممنوع وضع لينكات عالعام
الاداره
هتعرفي هو فين الظبط مثلا في الطيارة او وصل الجمرك او اتسلم للبريد المصري وهكذا لغاية مايوصلك البيت
** ملحوظة : ممكن الموقع يتحدث كل يومين ، فممكن تلاقيه في مكان وبعدين تلافيه عدى على 3 اماكن مرة واحدة مش مهم.
-8-
الفستان هيوصلك البيت مع مندوب من البريد المصري وهتدفعي الجمارك تقريباً 40% من تمن الفستان تقريبا انا دفعت 400 ج
مميزات الشراء من الموقع :
1- في موديلات كتير جداً ، وتناسب كل الأذواق
2- أسعار طبعاً أقل بكتير أوي من المحلات ، أنا جيبت فستاني كله ب 1800 ج
3- الخامات حلوة أوي – أفصل مما كنت متصورة ، وافضل من الفساتين الموجودة في السوق المصري .
4- التقفيل حلو بنبسة 95% هو متبطن من جوا كويس اوي ، ومن برا التانتيل بتاعه كويس والقماش حلو ، والخرز متخيط وثابت.
لقيت بس خيوط كتير مكان الخياطة هاقصها بالمقص.
5- السرعة في التسليم ، يعني شهر يعتبر كويس اوي
6- المغامرة فعلاً دي حاجة لها طعم تاني
7- ممكن تطلبي حاجة معينة تتظبط في الفستان عن الصورة مثلا تطويل الديل او ازالته او كدا ،
بس ده مشكلته لازم تبقى اللغة بتاعتك كويسة اوي عشان توصل اللي انتي عايزاه بالظبط
فالافضل ماتعملهوش ، اختاري المقاس وبس .
8- في فساتين وتيجان وطرح وكل حاجة لو حبيتي تجيبي حجات مع بعض .
دلوقتي هاوريكم الصور للفستان :
قولوا ماشاء الله
ده الفستان من الموقع – ده لونه ivory و انا بتاعي white
وده الفستان بتاعي
وده الكيس اللي وصل فيه بعد ما فتحته
ملحوظة :
1 – الموقع عليه 4 صور للفستان من قدام ومن الجنب ومن ورا ومن قريب وبعيد ، انا نزلت صورة واحدة كمثال.
2 – دي خريطة تساعدك في تحديد شكل الفستان اللي يليق عليكي لو مانزلتيش وقيستي حاجة ممكن تستخدميها
3- لو قررتي تطلبي من الموقع ، اطلبي قبل فرحك بفترة كافية عشان لو هتعملي بوليرو او حاجة تلحقي غير الاكسسوارت التانية بتاعة الفرح.
– بالنسبة لي طلبت الفستان 17-4 ووصل 13-5 وممكن يزيد الوقت لو الفستان فيه شغل أكتر –
4- أي أسئلة على الخاص مش هأجاوب عليها لأن المدونة عام ، والإستفادة لازم تكون عامة.
5- خدمة العملاء للموقع جيدة و بيردوا غالباً يعد يوم او يومين على سؤال بذوق وبكل التفاصيل
ادعولي بحياة جديدة مستقرة وسعيدة
شكراً وعقبال كل البنات
Bright Woman Bright Woman فتكات حبوبة Fatakat 916986 Beautiful – Beautiful