ازيكم يابنات .. انا هكتب موضوع خاص عن خطوات الحقن المجهري وياريت يكون سبب فايدة
انا متزوجة من خمس سنوات وطبعا زي اي بنت كنت كنت متصورة اني هحمل على طول واول بريود كنت فاكراها سقاطة وعملت هوسة هههههههه كل ماافتكر اقعد اضحك على نفسي
المهم مدورتش على سبب التاخير لمدة سنة زي ماالدكاترة بيقولوا بس طبعا ندمت اني استنيت سنة هو طبعا مبدئيا صح انك ماتدوريش على الاقل بتاخدي وقتك وتتعودي على بيتك وزوجك بس الاحسن انك تدوري بدري بس يكون بالعقل متاخديش الموضوع على اعصابك وياريت ياريت يكون الموضوع بينك وبين زوجك بعيد عن الاهل
المهم بعد سنة ابتديت اتابع تبويض ودخلت في موضوع احسب الجماع ومرضتش اخد اي تنشيط لان التبويض كان كويس .. بعدها بسنتين ابتديت اتابع مع د. هشام صالح وكتبتلي تنشيط واخذته لمدة 6 شهور ومحصلش حمل وكان زوجي عامل التحليل وانا عملت اشعة بالصبغة وكانت كويسة وعملت تحاليل كتير وطلع موضوع factor five العامل الخماس ومعناه عندي سرعة تجلط بس علاجة اسبرين اطفال وبعدها بسنة عملت تلقيح صناعي وفشل .. واستنيت سنة كمان وحصل حمل اتاخرت البريود 10 ايام وبعدين نزل دم وعملت تحليل رقمي كانت النتيجة 72 ف روحت لهشام صالح تاني وقررت اكمل معاه فعملي تلقيح صناعي 3 مرات ورى بعض وكلهم فشلو فقالي خلاص نعمل حقن والحمد لله ربنا كرمني …
روحت شهر 2 الي فات وكتبلي على ابر تحت الجلد اسمها لوكرين العلبة ب 600 اخذتها من اليوم الخامس للبريود واستمريت لحد لما نزلت البريود الي بعدها موقفتهاش ومكنتش باخد حاجة غيرها والشهر الي بعده اخذتها تاني من خامس يوم البريود بس جرعة اقل وكنت باخد تنشيط ابر ميرونال 2 بدرة مع وحدة مية بالعضل الابرة الوحدة ب 33 جنيه اخذتها من اليوم الخامس للبيرويد لحد اليوم ال 20 وكنت باخد برشام فوليك اسيد وفيتامين نيروفيت وجوسبرين وابر كلكسان تحت الجلد للسيولة وطلب مني تحاليل AHI هو مخزون التبويض وE2 كفاءة التبويض عملته مرتين ورى بعض وكانت نسبتهم مقبولة وبعدها روحت عملت سحب بويضات كانت عندي 20 بويضة سحبهم يوم 20 3 بعملي وبنج كلي والحمد لله محستش باي حاجة وفقت بعدها بساعة لقيت نفسي في الاوضة وبعدها قمت غيرت دومي وروحت البيت وباليل كانت نقطتين دم في الهوم دم خفيف خالص الحمد لله المهم البويضات ال 20 اتلقحوا 17 والي كملوا لليوم الخماس في الحضانة 7 اجنه 4 درجة اولى و3 درجة تانية .. حسن حاجة في د. هشام انه بيدي تنشيط على القد مش بيدي تنشيط جرعة عالية لان طبعا ليه اضرار صعبة اوي وممكن وحده تخش عناية مركزة ف هو الي مصبرني عليه انه فاهم شغله …
المهم روحت يوم 25 3 لمستشفى اجيال ورجعلي 2 اجنه درجة اولى فطلبت يرجعلي 3 بس هو رفض وقالي اتنين احسن من 3 الي ممكن مايكملوش او نضطر نسحب واحد لو كلهم كلموا .. وحطلي خمس اجنه في انبوبة في التجميد ..
وعملت تحليل الحمل يوم 5 4 والنتيجة كانت 640 الحمد لله زوجي مكنش مصدق نفسه . انا كنت بحمل حمل ضعيف يعني مرة 72 مرة 20 مرة 10 وكلهم ماكملوش .. اول مرة النسبة الكبيرة دي انا كنت متوقعة اكتر من 1600 عشان التوأم فقلت يمكن الحمل هيبقة واحد بس .ز عملت سونار يوم 20 4 والحمد لله الف مد وشكر شفت كيسين وسمعني النبض وعيطت من الفرحة كانت معايا ماما وزوجي ربنا يرزق كل البنات اللحظات الحلوة دي مصدقتش ان فيه نبض وحياة في رحمي .. ربنا كريم اوي وبيعوض اضعاف الحمد لله .ز انا عديت اسبوعين في السابع دعواتكم وان شاء الله موضوعي يبقى مفيد
العلاج اتكلف تقريبا 7 الاف جنيه وهو خد 6500 شغل ايده وميكروسكوب فائق التكبير ب 1500 وتمن انبوبة التجميد ب 1500
د.هبة مينا د.هبة مينا فتكات حبوبة Fatakat 1187511 الاسكندرية – مصر
جزاكي الله خير