انا داخله لاول مره على القسم ده عشان انا حاسه انى ممكن افيدكم فى تجربه انا عشتها لحظه بلحظه مع ابنى واغلى الناس عندى انا ابنى الكبير هو طبعا اول فرحتى كنت صغيره لما خلفته ويا دوب مخلصه دراسه ما كنتش عارفه ازاى اربيه او اعلمه السلوكيات الصحيحه وكنت كمان مستئليه بنفسى وحاسه انى لسه صغيره على انى اكون ام وممكن اكون شخصية انسان لسه طالع للحياه وبدات تجربتى لما رجعت من بيت ماما ورحت بيتى وكنا انا وجوزى وحشين بعض وفجأه بكى ابنى وكنا نسينا اننا مخلفين وبدء جوزى فى الضيق تجاه الولد خصوصا ان جوزى هو كمان كان صغير فى السن وحسيت انى معايا طفلين المفرو ض اراضيهم وبدء جوزى مع الوقت يتعصب وكمان يضرب يعنى كان بيئلى لما يبكى وديه الاوضه التانيه وسيبيه لحد ما يسكت وحده ما كنتش طبعا بوافق على كده وكنت مخنوقه جدا انى حاسه جوزى مش متعلق بولده وانى فى ضغط شديد عليا وبين نارين نار جوزى اللى عايزه احتويه واراضيه ونار ابنى اللى حته منى اللى مش عايزه اقصر فى حقه خصوصا انى اتربيت يتيمة الاب وكان نفسى اشوف احساس الابن تجاه ابوه فى ابنى ومرة الايام وانا فى الصراع ده لحد ما الولد كبر واصبح يخاف من ابوه خوف شديد وما بيسمعش كلام حد فى الدنيا الا ابوه وبس ومعايا انا مش بيعملى اى اعتبار خصوصا انى كنت مدلعاه عشان اعوضه الحنان اللى مفتقده مع ابوه لحد ما الولد بدء يحطنى فى مواقف محرجه مع الناس والناس بئت تئول انه مش متربى لانه مش بيكون كويس وبيسمع الكلام الا لما ابوه بيكون موجود وبس لكن بمجرد ان ابوه بيطلع يروح الشغل الولد بيتبدل ويكون انسان تانى رافض للنصح وعايز يعمل كل حاجه غلط وكمان لما بروح عند ماما بيطلع عينى ده لدرجة انه فى يوم من الايام فضل يبكى فى الشارع وانا ومعديه السكه الحديد بتاعت القطار رمى نفسه فى الارض عند شريط السكه الحديد والقطار كان جاى ومرضاش يتحرك لحد ما انا جسمى ساب وما كنتش عارفه اشيله من كتر الخوف وبعدين فى واحد راجل كان معدى وزعئله عشان يقوم والحمد لله ان الموضوع ده وغيره من المواضيع الكتيره اللى انا مريت بيها مع ابنى او مع ابنى وابوه واخذت القرار انى لازم يكونلى شخصيه مع الولد وما ينفعش حد يكون شديد والتانى يكون بيدلع لازم انا وابوه نعمل سياسه واحده اننا نكون ايد واحده فى تربيتنا للولد عشان ما يضيعش منناوالحمد لله اتفئنا انا وجوزى اننا ما نختلفش مع بعض امام ابنى مع انه 5 سنوات لكن هو زكى وحساس جدا وبيفهم كل حاجه ودخلته مدرسه كويسه عشان يساعدونى فى التربيه وكمان بئيت اشد فى الحاجات اللى ما ينفعش اتهاون فيها واشجع لما احس انه سلوكه بيتحسن واعاقب بالحرمان وليس بالضرب عشان اكتشفت ان الضرب بيزيده عناد وجنان وخليته يقرب من ابوه اكتر بئيت اقوله بابا الللى بيحبنا وهو اللى بيجبلبا كل اللى احنا بنعوزه وبئيت انصح جوزى طول الوقت انه يتكلم معاه ويطلعو مع بعض وغيره لحد ما وصلت انى خليت ابنى ونور عينى انه يحب ابوه واخته وما يغيرش منها وانه يسمع كلامى ويعملى خاطر طبعا مش معنى كلامى انه ما بئاش يغلط لكن هو اتغير للاحسن بفضل الله وانا بتمنى من كل اللى هتدخل تدعيله وتدعيلى ان ربنا يكرمنى فى اولادى عشان انا مليش غرهم وهما كل حياتى وارجو ان بموضوعى المتواضع ده انى اكون افدتكم والسلام عليكم ورحمة الله وبركاته
الملكة ندى الملكة ندى فتكات حبوبة Fatakat 549950 الصعيد – مصر
سبحان الله و بحمده