بسم الله الرحمن الرحيم
ازيكم يا عرايس عاملين ايه بصو انا مش هقول انى خبيره انا هقول تجربتى فى الخزين اللى بابا جابهولى وهقولكوا كفانى اد ايه و ايه اللى تجيبيه وايه اللى مش مهم اوى ممكن تجيبيه انتى لما تحتاجيه
اولا قبل ما نبدا ادعولى ربنا يثبت حملى ويرزقنى بطفلين معافين بدون زياده او نقصان وايه بقى يا سلام لو دعيتو كمان يطلعوا بنتين زى القمر
يلا بقى نبتدى
1- الرز
معروف طبعا انه اكتر حاجه بتستهلك ومبنستغناش عنه
انا جبت الضحى الكيس اللى هو 5 كيلو جبت منه 2 طبعا انتى فى اول الجواز مش هتستخدمى كتير لانك يا اما معزمه بره يا اما هتتغدوا بره وهكذا يعنى اول شهر تقريبا معملتش منه غير 4 كوبايات وانا بقالى 5 شهور متجوزه وخلصته وجبت كمان كيس 5 كيلو الشهر ده يعنى ممكن ال 10 كيلو يكفى 4 شهور لان زى ما قولنا ان اول شهر بيبقى ضايع بين عزومات واكل بره وكمان انتى مش هتعملى رز كل يوم كل يوم
2- المكرونه
مش هطول عليكو فى موضوع المكرونه ده كفايه من كل نوع 4 اكياس يعنى الاسباجتى 4 والملويه دى 4 والاقلام4 ولسان العصفور كفايه 2 والشعريه بتاعه الرز حاولى تكترى منها شويه انا بابا جابلى 6 والمكرونه القصيره دى بابا جابلى 8 يعنى 4 من كل حجم و الصدف 4 يبقى كده
انا لسه عندى منها لحد دلوقتى تقريبا كيس او اتنين من كل نوع بعنى مكمله معايا بعد ال 5شهور
3- السكر
بصى يا ستى هتجيبى مثلا 5 كيلو سكر الاسره للشاى ده لو انتى وجوزك بتحبوا الشاى زىى انا وجوزى كده و5 كيلو عادى بس يكون حلو
ده اللى بابا جابهولى والصراحه انا اللى قولتله عليه قالى هجيبلك 10 كيلو انا قولتله هات 5 كده و5 كده
4-الشاى
بصى كفايه باكيت كيلو هيكفى شهرين ولو عزتو تانى هاتو مش مشكله يعنى الشاى
5-الزيت
كفايه الازازه ال3 لتر للطبخ وهاتى كمان4 للقلى اللى هى الواحده لتر او بتاع التموين انا مجبتش الصراحه للقلى لانى عندى قلايه فيليبس اللى هى من غير نقطه زيت بابا كان هيجيب بس انا قولتله مش ضرورى لانى مش هستخدمه ال 3 لتر هيكفوكى شهرين
6- السمنه والزبده
بصى انا مش بحب السمنه الصناعى اللى بنشتريها دى اللى هى كريستال و روابى وكده جبت 3 كيلو زبده نيوزلاندى وماما سيحتلى منهم كيلو والاتنين التانيين بستخدم الزبده على طول مبقتش اسيح المهم ان ال3 كيلو كفونى حوالى ال5 شهور لانى مش بستخدمه على طول يعنى ممكن فى الحلويات فى الرز بحط مكعب على وش الرز بيديله ريحه وطعم خرافى خدتها من هنا على فتكات المعلومه دى على فكره
7- البقوليات والدقيق والبقسماط
بصى انا هقولك بابا جابلى اد ايه وكفونى اد ايه
3 كيلو فول كفونى 3 شهور
2كيلو عدس اصفر دول عملنا بيهم مرتين شوربه عدس
2 كيلو فاصوليا لسه عندى لحد النهارده فى التلاجه مجرالهاش حاجه
2 كيلو لوبيا دى خلصت لانى انا وجوزى بنسلقها وبنخللها فى ملح ولمون و ميه بصل وخل وبنعمل منها سلطه
انما لو هتطبخى منها ممكن تكفيكوا شويه زى الفاصوليا
2كيلو حمص بحطه عالفول او الكشرى ده خلص
2 كيلو عدس بجبه ده برده خلص
كيلو فول اللى هو بتاع البصاره عملت منه مرتين بصاره
و الدقيق بقى حطه هنا لانى مش عارفه هحطه فين المهم بابا جابلى 3 باكيت دقيق اللى هو لجميع الاستخدامات عملت منه بيتزا وحوواشى وفطاير وبشاميل وقليت سمك وبانيه وكريب وكفانى شهرين
النشا جابلى نص كيلو بعمل منها المهلبيه ولسه عندى منها لحد دلوقتى ممكن تجيبى ربع كيلو لانها مش ليها استخدامات كتير
2 باكيت بقسماط اللى هى ريتش باك
8-البقاله
دى بقى انتى واللى عايزاه يعنى جيبى اللى انتى عايزاهو بس يعنى يكفيكى شهر وكفايه اوى متكتريش اووووى لان معظمها بيبوظ ويترمى فى الزباله
9-اللحوم
بصى جيبى اللى هتعرفى تطبخيه
يعنى الحمام انا بابا جابلى 4 اجواز
والفراخ جابلى فرختين من الفراخ البيضا كنت بعمل نص واحده كل مره لانى انا وجوزى مكناش بناكل اكتر من كده وساعات كانت بتفيض مننا
و جابلى 4 فراخ بلدى اللى هما بيتحشوا اللى هما فراخ بيضا بس زى البلدى كده بيتجابوا من المزرعه
وجابلى بطتين ووزه لاننا ملناش تقل عالوز وجابلى ديك رومى بس ده بعد ما اتجوزت
وحابلى كيلو فراخ بانيه
اللحمه بقى جابلى 2 كيلو من كل حاجه يعنى السلق2 الشوى 2 والبفتيك 2 والكباب2 و المفرومه 2 والجزار يومها اخد منه مبلغ محترم عالتقطيع والفرم والحاجات دى
و جابلى 2 كيلو ممبار و2 كيلو كرشه وخلى الراجل نضفهملى و هو كمان بابا عادلى عليهم نضافه تانى و ماما حشتلى الممبار وسوته و عملتلى الكرشه برده بقى على اد التسخين وعملو 5 اكلات
والاسماك جابلى 2 كيلو جمبرى و جابلى سمك فيليه و عادى بس مش فاكره اد ايه علشان اللى انا فاكراه الجمبرى والسبيط جابلى برده 2 كيلو لانهم كانوا مجمدين ف بيبقى مكتوب عالكيس
و كفونى لحد النهارده
10- البصل والتوم
بابا جابلى 5 بصل و2 توم وطبعا انا جبت بصل تانى بس علشان السبت بتاع البصل مخادش غير 3 كيلو بس والتوم ماما قشرتهولى وشيلته فى التلاجه لحد النهارده بستخدمه
11-التوابل
بصى بقى الملح هتجيبى 10 اكياس ملح ناعم نوع نضيف علشان تستخدميه عالسفره وفى المطبخ انا بابا جابلى 10 اكياس كفونى 3 شهور
الفلفل الاسود هاتى ربع كيلو حلو اوى ونقيه ووديه للعطار يطحنهولك بلاش تشتريه مطحون اوقات بيحطو عليه حاجات وحشه وخشب واسمنت ورمل والله انا بابا كان جايبلى ربه حب وربع مطحون لقيت فى المطحون كوره كده بتخبط فى الملاحه بفتح الملاحه لقيتها كوره اسمنت رميته كله ونقيت الربع التانى ووديته للعطار يطحنه
الكمون بقى هاتى ربع كفايه
الفلفل الاحمر هاتى نص كيلو لانه بيستهلك فى الصلصه و المحاشى بقى
و 5 جنيه حبهان و5 جنيه ورق لورا و5 جنيه مستكه و هاتى 5 وحدات جوزه الطيب
وبافى التوابل شوفى اللى هتستخدميه وهاتيه مش تجيبى حاجه وتقولى اشوفلها استخدام لا هاتى اللى هتستخدميه
12-الخضار
والخضار هاتى الاساسى زى الطماطم و الخيار والفلفل وخسايه ولمون
لانك تقريبا اول شهر زى ما قولنا مش هتطبخى ف ممكن لو جبتى خضار كتير يبوظ فى التلاجه
انا كده خلصت لو افتكرت حاجه تانى هقولكوا عليها
التقيييييم بقى قبل ما تمشى
لانى هلكت فى الكتابه والنور قطع مرتين واللاب فصل واضطريت اعيده من الاول تانى قيموا بقى وفى النهايه انا كاتبه تجربتى مش حاجات اجبارى تجيبيها انتى ومقدرتك شايفه انى جايبه حاجات كتير ولهاش لازمه ممكن مش تجيبيها وشايفه انى فى حاجات مجبتهاش قولى عليها هنا فى الموضوع علشان كلنا نستفيد
ربنا يسعد كل بنوته ويرزقها بالزوج الصالح والحياه السعيده
ارجو التثبيييت
والسلام عليكم ورحمه الله وبركاته
anabosy111 anabosy111 1134427_1.gif فتكات متميزة Fatakat 1134427 مكان بحبه اوى – مصر