انا مش عارفة ابتدى منين بس كان يوم ما يعلم بيه الا ربنا وفعلا المركز التخصصى للعيون أسوء مكان للعملية اللى هو 18 ش الخليفة المأمون فوق" مترو ماركت ".. المكان بيدى انطباع انه نضيف والناس لابسة بدل ومتشيكين بس حسبنا الله ونعم الوكيل فيهم كلهم…
انا عملت الليزك فى مركز تانى أحلى بكتير ومع دكتور محترم جدا بس للاسف سافر بعد العملية وساعتها انا عملتها انا واخويا والحمد لله كنا مبسوطين وماقعدناش اكتر من ساعة داخل المركز بالفحوصات انا واخويا .. ركزو معايا
اختى بقى قالتلى انا عايزة اعمل الليزك .. والدكتور اللى عملت معاه سافر بره ..
دورت كدة على النت لاقيت اسم (المركز التخصصى للعيون ) عن طريق د. احمد المعتصم وناس بتشكر فيه
المهم اتصلت بيه .. واتفقت معاه على المبلغ بالظبط عشان اختى تعملها وصحبتها كمان .. طبعا هو فرح بالزبونين وقالى دا احنا هاندلعكم خالص ..
اكدت عليه انى مش هادفع اكتر من المبلغ اللى اتفقنا عليه عشان المركز مايطلبش منى ادفع كشف وفحوصات وهكذا … قالى انا اللى بقول للمركز ياخدو ايه ومالكيش دعوة تعالى بس وهاندلعكم خالص ..وياريتنى ما رحت …
طبعا رحت الساعة 5 زى ما قالى ..
واختى عملت الفحوصات وصحبتها وخلصنا فى نص ساعة … ولسة الدكتور مجاش .. وبعد ساعة ونص جه
جينا بقى للدفع قبل العملية اكيد..
مزودين علي المبلغ اللى اتفقت مع الدكتور عليه 1000
قلتلهم ماتفقتش على كدة .. المهم بعد نقاش ارهقنا دفعت اللى انا اتفقت علية ..
ما خبرة فى المستشفيات وعارفة استهبال الموظفين ..
انتظرنا وانتظرنا وانا مع اختى وابنى عنده سنة وطبعا انتم عارفين يعنى ايه طفل بيرضع طول اليوم برة البيت .. خصوصا واحنا جايين من مسافة طويلة اوى ..
المهم حسيت ان كل العيانين مشيو من المركز واحنا خلاص اعصبنا منهارة ومتوترين احنا واللى فى البيت .. واختى صعبت عليا اوى الساعة 11 بليل واحنا لسة مادخلناش .. شكيت قلت فيه ايه اكيد اصتقصدونا عشان مادفعناش اللى هما عايزينه …
بس ماتخيلتش .. سألت واحدة مامت بنتين كانو لسة مخلصين قلتلها جيتى الساعة كام ؟ قالتلى 7:30 وكانت ماشية واحنا جايين من 5 ولسة قاعدين
سألت الموظفة اللى كان معاها اسامينا واللى كانت عايزانى ادفع زيادة اسمها تقريبا "نفين" منها لله بجد وحسبنا الله ونعم الوكيل فيها هيا وكل اللى اخرنا عن دورنا بسبب جشعة للفلوس طب لو ماخفتش ربنا فينا .. ماصعبش عليها الطفل اللى عنده سنة وهو عمال يعيط طول الوقت وعايز ياكل ولا ينام .. ولسة ورانا طريق سفر .. حسبنا الله ونعم الوكيل ..واعصابنا انهارت اكتر وسألتها الترتيب على اساس ايه قالتى "اصل الجهاز هو اللى بيرتب المقاسات" طبعا بتشتغلنى .. وقلتلها "سبحان الله والاختين اللى مشيو مقاساتهم واحدة و اختى وصحبتها دخلو ورا بعض سبحان الله ..
طبعا ماعبرتنيش ..
واخيرا دخلو وعملو العملية (وهما فى حالة يرثى لها" واختى كانت متعصبة اوى وبتعيط بعد العملية .. انا اهدى فيها .. والبنت زميلة الاولانية ماعرفش قالت ايه … فاختى قالتلها يعنى مأخرانا عن معادنا ودورنا وكمان بتتكلمى وانا قلت يعنى قاعدة انا وابنى كل دا وحسبنا الله فى اى حد اخرنا … راحت البنت ردت عليا وقالت "ايه اللى جابك كنت خليكى خليكى جنب ابنك" بمنتهى قلة الذوق
وطبعا رديت عليها قلتلها "اتكلمى كويس واعرفى ازاى تكلمى العيانين" .. راح الدكتور المحترم خرج وتخيلو عمل ايه ؟
تقريبا هزقنى قدام الناس والموظفين وقالى اسكتى خالص مش عايز نقاش خالص .. احنا هنا فى عيانين فى العمليات .. ودخل تانى .. انا اتصدمت انه حتى ماقلش للموظفين … دا قال للعيانين كان ناقص يضربنى …
مش عارفة هما عيانين .. ما احنا كمان عيانين واللى واقفين برة عيانين واللى بتقلو ادبكم عليهم عيانين دافعين اد كدة ..
وانا واقفة جنب اختى اللى كانت لسة خارجة من العمليات الساعة 11:30 بليل يعنى بعد اكتر من 5 ساعات انتظار..
وخدتها ومشيت وانا بقول حسبنا الله ونعم الوكيل فى اللى بهدلنى انا واختى وابنى ….
مروحين منهارين وضغطنا عالى ومتعصبين وتعبانين ومش قادرين نتكلم والله وماكنش لينا نفس ناكل لما روحنا ..والضغط النفسى اللى كنا فية اقوى من العملية نفسها … حسبنا الله ونعم الوكيل ..
ودى كانت تجربتى عشان تستفادو وتاخدم بالكم …
مورى شوب مورى شوب 551836_1.gif سوبر فتكات Fatakat 551836 القاهرة – مصر