السلام عليكم ورحمة الله وبركاته
ازيكو يا فتاتيك يا صغيرين
انا الحمد لله كويسة جدا بفضل من الله
طيب نبتدي فلاش باك ولا اية
بصو يا جماعة
انا حكايتي اني تخينة من زمان اوي
سنة 2024 قررت اعمل ريجيم اخد مني تقريبا سنة كنت ساعتها برضة صغيرة (ولسة برضة صغيرة طبعا )
ومكنتش اعرف ان الخسسان اسهل في السن الصغير المهم عملت ريجيم ومشي منتظم وخسيت فعلا 20 كيلو
كنت 100 بقيت 80 وكنت كويسة جدا
طبعا مع استمرار الشغل وحياة الدكاترة والنبطشيات برة البيت وبما ان الاكل عندي كان هواية برضة خصوصا مع اصدقاء السوء اللي بيحبو الاكل برضة (معلش ياللي في بالي) رجعت ريمة لعادتها القديمة وخصوصا بقي بعد امتحان الماجستير لاني قعدت قبلها في البيت 3 شهور مذاكرة حتي الطقم اللي كنت هلبسة للامتحان جيت يومها الصبح البسه ومش حاطة في بالي لقيته مش بيدخل !!!!!
طبعا يعدها رحت للدكتورة ومش هقولكو الهابي سربريز
120
الكلام دة اول 2024
المهم سنيت سناني بقي وقلت مبدهاش ابتديت الاول ريجيم اكل بقيت اخس واطلع وهكذا لحد ما بقيت 108 ووقفت شوية في النص المهم ابتديت تاني ريجيم جدا بس بقيت اروح جيم بانتظام واقعد هناك 3 ساعات في اليوم وفرغت نفسي تماما للريجيم بمعني الكلمة كان هو كل حاجه ولة الاولوية في كل شئ لحد ما وصلت في النهاية ل 85 كيلو بس الحاجه الغريبة بقي ان رغم الرياضة والكلام دة لكن بعد ما خسيت توزيعة جسمي اختلفت المشكلة كانت في البطن بقيت متضايقة جدا بطني بارزة بطريقة غير طبيعية
بس كون اني خسيت كان مخليني مودي مرتفع جدا وكنت بحاول اداري الحكاية دي او مدقش اوي عليها
وطبعا كالعادة حصل اية؟
بوزن نفسي لقيتني 115
المهم رحت لدكتورة ريجيم وبقيت اخس معاها بس بطئ جدا جدا جدا ومش عارفة المرة دي اعمل كنترول وكل العادات الغذائية الخاطئة عندي خصوصا الاكل بليل وقلت اروح جيم بقي
المفاجاة الجامدة
رحت الجيم
ابتديت بالمشاية بس عشان مبتديش جامد علي مفاصلي وكدة
لقيت شوية بعد اسبوع ابتدي يجي لي ضربات غير منتظمة !!!!!
طب دة انا لسة صغيرة ؟
(برضة هتقولي لسة صغيرة !!)
والاقي ضغطي بيعلي
وركبتي بقت تطقطق
= مينفعش تلعبي جيم
يا نهار ابيض طب وبعدين ريجيم اكل وبس ؟
حاولي طيب
حاولت بصراحة مش هكذب
لقيت نفسي بفكر في شفط الدهون
رحت لعيادة دكتور كشف علية وقالي مينفعش جلدك هيبقي مرهرط احسن حل ليكي جراحات السمنة حاجه اسمها تصغير المعدة او gastric sleeve
كانت زي صدمة بالنسبة لي
المهم فضلت اصلي استخارة وحصلت ظروف انقطعت شوية عن صلاة الاستخارة
وسبحان الله
يوم السبت اللي فات افتكرت واستخرت
بقول لصاحبتي اديني رقم زميلتنا دكتورة الجراحة
بكلمها ازيك واحشاني عاملة اية فينك انا بفكر اعمل تصغير معدة
لقيتها بتقولي خلاص تعالي بكرة قابلي الدكتور عشان هو بيعملها يوم الاربعاء قلت حلو
وحضري نفسك للعمليات بالمرة ( دة علي اساس انها الاربعاء اللي بعديه مش اللي في نفس الاسبوع )
وطبعا لان انا كنت شغالة في المستشفي دي فانا عارفة عادة اية المطلوب قبل العملية وفعلا رغم اني سبتها من 4 او 5 سنين لكن كل حاجه مشيت وبيسر وخلصت كل حاجه في نفس اليوم وقابلت الدكتور
هنا بقي تبدا الحكاية
د.هبه77 د.هبه77 فتكات حبوبة Fatakat 472884 القاهرة – مصر