ازيكم يافتاتيك ياقمرات
انا لسه كنت بمر بازمة صحية وحكيت لكم عنها والحمد لله عدت بس فى فكرة طقت فى دماغى هو احنا ليه مانكتبش رأينا فى المستشفيات اللى اتعاملنا معاها وكذلك عيادات الدكاتره من الناحية الانسانية
يعنى مثلا انا اتعاملت مع مستشفى (مستشفى الزهور بمدينة 6 اكتوبر)وانا باولد مش هاقول ارقى حاجة ولا هى برضوا واقعة اوى بس انت بتتعاملى فيها كانسانة ناس بتطبطب عليك وبيخدوك بالراحة قبل الولادة وفعلا المعاملة فيها ممتازة والدكاترة بيهدوك وبجد ربنا يزيدهم علم دكاترة ممتازين بجد وبعد العملية بتطلعى ممرضات رايحين جايين يقيسوا ضغط ويقيسوا حرارة ويغيروا السوائل والاسترة وبعدين ياخدوك يحموك حماية لذيذة بمياه دافية وصابون طبى ويلبسوك ويمشوك شوية المستشفى كانت مكيفة وكان فيها دش مركزى ومش بيطلعلوك البيبى غير تانى يوم اول يوم تشوفيه وينزل تانى علشان تنااااامى وترتاحى تانى يوم يطلع يرضع ولو انت لسه ماستعادتيش نشاطك تقعدى يوم كمان وبرضوا بالليل يسيبوكى تنامى
وفى الازمة الصحية الاخيرة اتعاملت مع مستشفى تانية (المركز الطبى العالمى طريق مصر اسماعلية)ناااااااااااااس محترمين محترمين محترمين بجد اول مالعربية وقفت قدام باب الطوارئ 2 ممرضين جم جرى وفتحوا الباب ودخلت وممرضة استلمتنى من الباب وسالتنى اول حاجة تحبى نجيب كرسى او ترولى قولت لها لا انا كويسة انا بس محتاجة دكتور نساء ضرورى وفعلا خدت منى القصة كاملة وسألت اسئلة وراحت مكلمه الدكتور قالها اعملى كذا كذا كذا كام تحليل على اتنين سونار وبعد اللفة اللى والله حسيت فيها بمعنى ملائكة الرحمة ناس بتساعدك وتاخد بايديك وحنييين جدا جدا وصبورررين معاك والله انا كنت خايفة لانى مش فاهمة ايه اللى حصل ممرضة عسولة خدتنى فى حضنها والدكاترة اول كلمة يقولها الف سلامة عليك ويسمعوك ولو هتحكى الف ليلة وليلة يسيبوكى تتكلمى وتعيطى وكل حاجة والله تحسى انهم اصحاب رسالة واللى هتقول خدوا منك كام هاقولها كشف بتحاليل بدواء بكله اتكلفت 240 جنية والمكان نضيف ومكيف برضوا
نيجى بقى للسلبيات مرة خالتى قالت لى تعالى نروح لدكتور(مش هاقول اسمه علشان الارزاق ) فى الزقازيق محافظة الشرقية والله العظيم ده يعالج فراخ اكرم للبنى ادم تخيلوا ميعاد العيادة الساعة 5 عصرا تلاقى ستات قاعدة من الساعة 3 قدام الباب علشان البيه بتاع الاستقبال حط قانون ان اللى يجى الاول يكتب اسمه ويدخل الاول والله العظيم ياجماعة بيبقى منظر الحوامل وخصوصا اللى جاية تحدد ميعاد ولادة يقطع القلب وهما واقفين على السلم انا روحت له وكان عندى نزيف وفضلت واقفة على الباب
وكنت تعبانة جدا مش قادرة والبيه جه فتح الساعة 5 ونص وماحدش يفتح بقه كمان المهم انا كنت روحت اول واحدة بس كان عندى اعادة كشف
راح قايل كل اللى اعادة كشف هيدخل فى الاخر روحت وقولت له بصوت واطى لو سمحت انا بنزف وضعى حرج وانا جاية اول واحدة راح بكل بجاحة وبعلو صوته انت النهاردة خامس يوم الدورة؟ وكان واقف جنبى 5 رجالة قولت له ليه خليهم يكشفوا عليا احسن بدل مالدكتور يتعب نفسه .المهم قولت له انا تعبانة ومش هاقدر استنى للأخر وبعدين انت اللى قولت اللى يجى الاول يدخل الاول وانا هنا من الساعة 3 عصرا حرام عليك تلطعنى للساعة 1 او 2 بالليل لغاية لما الكشوفات تخلص قالى انا سايب لك العيادة كلها وماشى المهم دخلت للدكتور مع خالتى والله لأنها كانت حاجزة جديد مش اعادة زى راح داخل اودة الكشف علينا وخالتى نايمة مستعدة للسونار وقعد يقول هى بلطجة يعنى وقعد يشخط انا بصراحة قولت للدكتور انت ممتاز وبجد علمك نور من ربنا بس الاتنين اللى انت حاططهم بره وفى الغالب اخوات وخارجين من السجن تقريبا اخ واخته دول واجهة غير مشرفة لعيادتك وانا خارجة راح باصص لى من فوق لتحت وقالى ها ميعادك اللى جاى امتى قولت له انا عمرى ماادخل العيادة ابدا لو اخر دكتور فى مصر وفعلا عمرى مافكرت اروح له تانى بس وانا خارجة قولت له انت بتععامل مع ستات حوامل او نفسهم يحملوا متعلقين بقشة او تعبانين المفروض تكون ارحم خلق الله مش تعاملهم بالاسلوب الفج ده وياااريت مراة الدكتور ولا بنته تقرأ الموضوع ده وتنبهه ليه او حتى مريضة عنده
kokokail kokokail فتكات هايلة Fatakat 239469 العاشر من رمضان – مصر