السلام عليكم ورحمة الله وبركاته
صلوا على الحبيب المصطفى عليه افضل الصلاة والسلام
دى طريقتى فى الاومليت الايطالى ألى شبه البيتزا بالظبط
المقادير
بيضتين أحمر
طماطماية متوسطه متقطعه صغير
بصلاية صغننه فى حجم الليمونه كده(أختيارى)عشان ألى مش بيحب نكهة البصل متخرطه
شوية زيتون مخلى سواء أخضر أو أسود أنا حطيت أسود
جبنة تركى مبشور
جبنة موتزاريلا
فلفل مقطع
ملح وفلفل أسمر
الطريقة
هنجيب طبق غويط نكسر فيه البيضتين وبالشوكه نضربهم زى الاومليت ونحط الجبنه التركى والطماطم والفلفل والزيتون والبصل ورشة ملح وفلفل أسمر
ونحضر طاسة وياريت تكون تيفال ونحط معلقتين زيت ونحطها عالنار ونحط المقدار فى الطاسة ونوطى النار ونغطى الطاسة بغطا ولما نلاقيها أستوت بتستوى تقريبا فى 5 او 7 دقايق نرش على وشها رشة جبنة تركى مبشور ورشة موتزاريلا ونغطى تانى دقيقة بالظبط ونطفى ونقدمها كده مع طبق بطاطس محمرة
أكلة موفرة تنفع فطار غداء عشاء
وبألف هنا وأدى الصور
ودى صورة كمان عشان تشوفوا الموتزاريلا سايحه وبتشد أزلى شكلها يهبل وطعمها يجنن 
والله وممكن كمان تعمليها لأولادك ألى مش بياكلوا البيض
بصوا
وبصى كمان
يلا بقى عايزة الردود والتقييمات تنزل زى المطرة عليا ويا سلام بقى لو دعوة حلوة كده بالذرية الصالحه عاجلا ليس أجلا يبقى عملتوا معايا أحلى واجب
فى أمان الله
مواضيع هذا القسم برعاية
مسلمه حبيبه الرحمن مسلمه حبيبه الرحمن فتكات غالية قوي Fatakat 647422 الأسكندريه – مصر