السلام عليكم يا احلى فتوكات في الدنيا انا اول مرة اكتب في القسم ده بس جايبالكم طريقة البيتزا بعد عشرات التجارب اللي عملتها وطبعا كلها كانت فاشلة ما عدا الطريقة اللي هقولكو عليها دلوقت وهي ناجحة جداااااااااجدااااااااااااااا وخفيفة وطرية وبرده مش هعرف اوصفها ولازم تجربوها لانها فعلا عجبت كل اللي ذاقوها بالاجمااااااااع ونيجي بقى للمقادير:
اربع كوبايات دقيق منخول
ربع كوب زيت
ملعقة خميرة فورية
ملعقة صغيرة سكر
ملعقة صغيرة ملح
ثلاث ملاعق كبيرة لبن بودرة (نيدو)
علبة زبادي
ماء دافي للعجن
اما بالنسبة للحاجات اللي بتتحط فوق البيتزا فهيبقى معانا صلصة الطماطم والفلفل والزيتون والجبنة الرومي اساسي والباقي على ذوقك يعني ممكن تونة او سوسيس او فراخ او برجر وممكن تضيفي جبنة موتزاريلا او تشيدر بتبقى جميلة اوي برده وكل واحد وذوقه واهم حاجة في الصلصة انك تسيبيها تنشف على النار كويس وتتقل عشان تتفرد كويس على البيتزا ولو ع8ايزة طعمها يبقى زي الكاتشب ضيفي على الصلصة نص ملعقة صغيرة سكر وملعقة صغيرة خل ورشة قرفة وزنجبيل ولو مش عايزة يبقى كفاية التوابل العادية ومننساش نضيف عليها ملعقتين زيت وفيه حاجة برده عايزة اقلكم عليها وهي انه بلاش تحطي حلقات طماطم وكفاية الصلصة لانك لما تحطي حلقات طماطم بتعجن ومكانها في العجينة بيفضل ني وكده خلصنا الديكور
والطريقة كالاتي:
حطي يا فتوكة يا حلوة كل المقادير الجافة على بعض يعني الدقيق والخميرة والملح والسكر واللبن البودرة واخلطي كويس اوي وبعدين ضيفي الزيت واخلطي بايدك برده كويس لحد ما يبقى عامل زي الفتافيت وبعدين ضيفي الزبادي واعجني وابداي بعد كده ضيفي المية تدريجيا يعني تضيفي شوية مية وتعجني وبعدين شوية تانيين وهكذا لحد ماتبقى العجينة متجانسة يعني طرية وفي نفس الوقت مش بتلزق في الايد وتغطيها وتسيبيها تتخمر من ساعة لساعة ونص وبعد كده تقسميها تلات او اربع قطع حسب حجم الصواني اللي عندك وتفرديها بالنشابة وبعدين تحطيها وتظبطيها في الصينية وتحطي فوقها الصلصة والفلفل والزيتون وباقي الحاجات ما عدا الجبنة لاننا لو حطيناها دلوقت هتتحرق وتنشف وهقولك هنحطها ايمتى دلوقت وهنا بقى فيه نقطة مهمة اوييييييييييي وهي انك تغطي صواني البيتزا وتسيبيها تخمر تاني لمدة ربع او تلت ساعة قبل ما تسويها وبعد كده تدخليها الفرن وتبصي عليها كل عشر دقايق وقبل مالوش يحمر بشوية تطلعيها ترشي عليها الجبنو تدخليه تاني لحد الجبنة ما تدوب والوش يحمر وتطلعيها من الفرن وبالف هنا واتمنى اني مااكنش طولت عليكم واللي تجرب البيتزا وتعجبها تدعيلي دعوة حلوة وتحت امركو في اي سؤال مواضيع هذا القسم برعاية
جورا جورا جورا جورا فتكات رائعة Fatakat 428669 عيش حياتك – مصر الحياة
سبحان الله و بحمده