السلام عليكم ورحمه الله وبركاته
النهارده
قررت أبدأ ادخل المطبخ
رمضان داخل بئى ومش هينفع التيك اواى
والحمد لله نجحت
وعملت
فتة شاورما
اجدع من بتاعت المحلات
اسيبكم مع الطريقه بالتفصييييييل
اول حاجه جبت لحمه شاورما
بصراحه ماما كانت جيبهالى جاهزه زى ما هى كده ومتقطعه
بعدين
تبلتها بالاتى
زبادى و بصل مفروم لحد ما نزل ميته و ملح وفلفل وبهارات لحمه وخل
وسبتها بتاع 4 ساعات
اول حاجه جبت ووك (( اناء الطبخ الصينى )) طبعا ممكن نستبدله بطاسه بس هو ده اللى عندى
وحطيت فيه اللحمه من غير لا سمنه ولا زيت
شوحتها وقلبت كتير علشان مش تلزق ولا تتحرق
وبعدين غطيت عليها علشان تستوى فى ميتها شويه
فى اثناء ذلك كنت بحضر الارز
رز بسمتى كان منقوع قبلها بنص ساعه فى ماء وملح
وبعدين سويته عادى وضيفتله كركم زياده علشان اللون بس
بعد اللحمه ما استوت
حطيت الفلفل الرومى
وضيفت كمان حتت ((ليه)) بتدى طعم حلو اوى للشاورما ومش بحطها فى الاول علشان طعمها يظهر
قلبت اللحمه والفلفل تقلبتين وزودت شويه توابل وسماء ومعلقه صويا صوص وبعدين شيلت الغطا علشان ميه اللحمه تتبخر
وبعدين حطيت الطماطم والبقدونس
وقلبت تقليبه وطفيت عليها
نيجى لاهم حاجه فى فتة الشاورما
العيش
العيش اللبنانى اللى هو ده
قطعته حتت صغيره
وقليته فى طاسه فيها شويه زيت فاتح مع حته سمنه بلدى
يدوب يغير لونه وطلعته ع طوول
وبسرعه علشان بيتحرق ع طول
(( بصراحه اول طاسه اتحرقت بس خدت بالى الطاسه التانيه ))
وعملته الدقه اللى بتتحط ع العيش بتاع فتة اللحمه
شويه زيت وسمنه صفرت فيهم توم وبعدين يفتلهم شويه خل
بعد كده
حضرت التوميه
ودى احسن سلطه تتقدم مع فتة الشاورما
عباره عن
بطاطسيه مسلوقه لحد ماتتهرى + معلقتين مايونيز كبار + حوالى 4 معالق زبادى + معلقه توم مهروس
كلو فى الخلاط ولو تقيله خففيها بماء السلق بتاعت البطاطس
ودى شكلها
نيجى بئى للتقديم
جيت سلطانيه ع شكل قلب
مليتها رز وبعدين شويه عيش و سقيته ب الدقه
وبعدين حطيت عليه شويه رز صغيرين علشان اعمل طبقات
وقلبته فى طبق مسطح (( بحيث يكون العيش تحت والرز فوق
وبعدين ضيفت شاورما جنب الطبق وشويه عيش تانى
وادى الطبق بعد التقديم
هديه منى لكل اللى هيدخل موضوعى
وبالهنا والشفاااااااااااااا
مواضيع هذا القسم برعاية
nemo_1234 nemo_1234 88989_1.gif فتكات ست الكل Fatakat 88989 القاهره – بلاد الله الواسعه