السلام عليكم ورحمه الله وبركاته
ــــــــــــــــــــــــــــــــــــــــــــــــــ ــــــــ
بصي بقا يا فتوكه منك ليها
الاكله دي اختراعي
ومخدتش مني وقت في التحضير وسهله جدا
وخفيفه جدا كمان
عدد 3 بتنجانات كبار بس مش اوي
عدد 3 حبات طماطم
عدد اتنين بصله متوسطين
عدد اتنين فلفل اخضر رومي
و لو عندك فلفله حمرا وفللفه صفرا اوكي
ملح وفلفل و توابل زي ما تحبي
شبت وبقدونس
تعالو نبتدي نعمل الصنيه بقا وبعدين اقولك علي طريقه سهله لشوربه الكريمه
تكوني مقطعه البتنجان حلقات ومقشره القشر بتاعه عشان مش يبقي مره
وترشي عليه ملح وتسيبيه شويه
بعدين تجيبي الصنيه اللي هتدخليها الفرن
تدهنيها زيت زيون خفيف مش تكتري
وتقطعي البصل حلقات وشرايح وتوزعيه في الصنيه
وتقطعي طماطم حلقات وتوزعيه في الصنيه بردو
وتقطعي فلفل حلقات وتوزعيه في الصنيه
غطي الصنيه كويس بالبصل والطماطم والفلفل
وبعدين ترشي عليهم رشه ملح و حبه فلفل اسود و زعتر
وبعدين تجيبي حلقات البتنجان وتوزعيها فوقهم
و بعدين تجيبي زيت الزيون وترشي فوق كل البتنجان بس خففي ايديك ورشي علي كل البتنجان كويس
و بعدين قطعي فوقيها شويه بصل حلقات وشرايح
وشويه فلفل حلقات بردو
وتجيبي طماطميه وتقطعيها بس مش حلقات لا قطعيها قطع صغيره وتوزعيها فوق البتنجان بردو
وترجعي ترشي عليهم شويه ملح وشويه زعتر و لو عندك روز ماري اوكي حسب الرغبه
وتجيبي حبه شبت مش كتير تقطعي الاجزاء الاماميه ليها اللي هي الشجره
وتفرميهم تقطعيهم بالسكينه كويس
وترشيهم علي الصنيه كلها بس مش كتير بردو عشان مش تغطي علي منظر الصنيه
احنا عايزنها تدي ريحه بس
نيجي بقا نعمل شوربه الكريمه
ــــــــــــــــــــــــــــــــــــــــــــــــــ ــ
لو عندك شوربه كريمه الجاهزه اوكي اعمليها لو مش عندك اعملي الطريقه دي
تجيبي حله صغيره وتحطي فيها 3 معالق زيت ومعلقه دقيق
وتفضلي تقلبيهم كويس وتحطي عليهم مكعب ماجي
وتقلبيهم كويس مع حبه ملح بسيط وحبه فلفل بسيط
وبعدين تحطي كوبايه مايه تقريبا مع التقليب المستمر وزودي المايه وقلبي كويس لحد ما تدوبي الدقيق
و اوعي تسيبيها تتقل لحد ما تبقي باشيمل لاااااااااا
احنا عايزنها شوربه مش تكون خفيفه اوي ولا تقيله زي الباشميل
وهي مش بتاخد علي النار اكتر من دقيقتين تلاته بالكتير
تاخدي الشوربه وتكسري عليها بيضه وحبه ملح وفلفل تحيقي البيضه وتقلبيهم علي الشوربه كويس اوي
وبعدين تحطي الشوربه علي صنيه البتنجان بس اوعي تعوميها فيه يعني تحطي كميه مناسبه وتوزعيها كويس علي الصنيه كلها
وتكوني مولعه الفرن واول ما يسخن تدخليها الفرن
وتسيبيها في الفرن حوالي تلت ساعه مش تفتحي عليها بس تابعيها وسيبيها براحتها في الفرن لحد ما تحسي انها استوت
وتابعيها بردو
احسن يكون الفرن بتاعك حامي
وبعدين شوفيها لو استوت طلعيها
انا خدت معايا في الفرن حوالي نص ساعه وكنت متبعاها
وبعدين بقا تقدميها في اطباق وتزينها بشويه شبت علي الجنب كده
وتحطي في نص الطبق بقدونسيايه هههههههههه يعني حته بقدونس واحده للتزين
وبجد طعمها تحفها ومختلف جدا وجدييييييييييد ويا رب تعجبكم
ومش بتاخد وقت في تحضيرها طراخ طراخ طراخ وتقطعي الحاجه وترميهم في الصنيه وتحطيها في الفرن
وبالهنا والشفا 
وادعوووولي امانه عليكو ربنا يخليلي خطيبي ويبعد عننا اي حقد و يجمعنا في الحلال اجلا وليس عاجلا
ودي صوره الاكله
مواضيع هذا القسم برعاية
بندقه 2024 بندقه 2024 968422_1.gif فتكات رائعة Fatakat 968422 القاهره – مصر _ ام الدنيا