اللهم صلى وسلم على سيدنا محمد
كل سنه وانتوا طيبين يا قممير انتوا
انا قولت ايه بقى ان الحاجه كلها بقين نار وكلنا بنحب الكاتشب والمسترده والمايونز فى السلطه وتتبيل الفراخ واللحمه
لازم اتعلم التوفير زيكم وانا لسه فى بيت ماما قولت اعملهم واقلل السكر عشان انا عامله دايت وكمان فى طريقه مايونز صيامى لخوتنا المسحين كل سنه وهما طيبين
معلش انا مصورتش لان كارت الميمورى اتحرق بس هحاول اوصلكم المعلومه كويس ايه الرغى ده يلا ندخل ف المفيد
اولا : الكاتشب :
المفادير : نص كيلو طماطم او كيلو زى ما تحبى
4 فصوص ثوم
4 حبهان
4 قرنفل
فنجان قهوه خل
ربع كوب سكر
زره ملح
معلقه نشا صغيره
كوب ماء
بابريكا ( حسب الرغبه ) او ممكن معلقه صلصه
الطريقه : تقطعى الطماطم وتضربيها فى الخلاط وبدين تصفيها كويس وتحطيها على النار تاخد غلوتين وتتشرب مايتها شويه وبعدين تحطى الثوم والحبهان والقرنفل وتسبيهم يغلوا مع بعض شويه
وبعدين ضيفى فنجان الخل وربع الكوب السكر وتقلبى كويس وممكن تحطى بابريكا لو عاوزه او صلصه انا عملته من غير وكان طعمها حلو جدا ونفس طعم الكاتشب اللى من بره . وبعدين تدوبى معلقه النشا الصغيره فى كوب الماء وقلبى كويس لحد ما الخليط يتمسك وطفى عليه وصفى الخليط وسيبى يبرد وحطى فى برطمان وع التلاجه بيقعد اسبوع معاكى
المسترده : المقادير : 2 كوب خل _ معلقه صغيره خردل ( مسترده ) تنقع ليله كامله ثم تطحن
نص معلقه صغيره ملح وسكر
نص معلقه كركم و ثوم بودر
فلفل ابيض او اسود
معلقه دقيق
الطريقه : يو ضع الخل على النار يغلى ولما يتبخر شويه حطى الملح والسكر والثوم البودر والكركم وسبيهم يغلوا شويه ع النار وبعدين تدوبى معلقه الدقييق فى مايه على حسب الحاجه وضيفيها على الخليك وهو بيغلى وبعدين معلقه المسترده المطحونه وتقلبى وبعدين صفيها ولما تبرد حطيها فى برطمان وع التلاجه .
المايونز الصيامى : المقادير : معلقه كبيره نشا
كوب ماء
نص كوب بطاطس مسلوقه ومهروسه
زره سكر
نص كوب زيت او كوب على حسب الخليط
نص ليمونه _ معلقه خل
الطريقه : نخلط البطاطس مع السكر بايدك وتدوبى معلقه النشا فى المايه وتنزلى بيها على البطاطس وتقلبى كويس والاحسن انك تغلى المايه وتدوبى فيها النشا زى المهلبيه كده وتحطى منها . وبعدين تعصرى نص المونه ومعلقه الخل وتنزلى بنص كوب الزيت خيط رفيع جدا مع التقليب بايدك او المضرب الكهربا ودوقى احلى مايونز صيامى او لايت
مايونيز عادى : المقادير : بيضه
زره ملح وسكر
معلقه خل
نص لمونه
معلقه نشا
كوب زيت
ماء تدوبى فيها النشا
الطريقه : هتقلبى النشا الاول مع المايه ع النار لما يبقى مهلبيه . وتحطى البيضه فى الخلاط وتضربيها وبعدين حطى السكر والملح وبعدين معلقه الخل واضربيهم جامد فى الخلاط وعليهم كوب الزيت خيط رفيع والخلاط شغال وبعدين ضيفى النشا وهو سخن ع الخليط واضربى لو الخلاط وقف معاكى قلبى بايدك لما يبرد حطى فى التلاجه .
المايونز مينفعش للى بيعملوا دايت خالص لان فيهم زيت
وبالف هنا وشفا يا فتوكات لو عجبكم الموضوع متنسوش التقيم ودعوه حلوه منكم ليا مواضيع هذا القسم برعاية
Anog Anog 819170_13.gif فتكات متميزة Fatakat 819170 EL_Mansoura – Egypt