السلام عليكم ورحمة الله
اخيرا هنعمل موضوع يلم كل الاماكن الى بنشتري منها الجهاز وهنقول نجيبه منين وبكام وبالصور
لو انتى اسكندرانيه يبقي هتهيصي عشان هنقول الاماكن والفروع واسامي البياعين هههههههههههه
ولو من اى مكان تانى هتعرفي برضو الاماكن والاسعار عشان اغلب المحلات ليها فروع في كل المحافظات
مستنية مشاركتكم معايا باي معلومات ويلا نساعد بعض ونعمل موضوع جامد اوووووووووووى يجمع كل عرايس اسكندرية المتميزين
هبدأ انهاردة بالملابس
طبعا الهدوم دي بترجع لشخصية كل بنت وبتحب تلبس ايه
بس عموما لازم ننوع بين الالوان والخامات المختلفة
(بالله عليكو متنسوش تقيمو لو عجبكم الموضوع )
اولا : الكاشات او الفساتين القطنية القصيرة :
دول اهم حاجة من وجهه نظري عشان مريحين في اللبس ومع ذلك كلهم اغراااااااء هاتيلك منهم حوالي 8 قطن و2 كارينا و2 ساتان
وفي منهم ساتان
(بالله عليكو متنسوش تقيمو لو عجبكم الموضوع )
افضل اماكن الشراء من وجهة نظري :
1/ محلات جيل jil
خامتهم نضيفة جدااااا وسعر الكاس القطن هناك من 35 :65 جنيه
وحاجتهم بتعيش معاكي وياريت تراعي وانتى بتشتري انك تجيبيه مقاسك بالظبط او ضيق عليكي عشان بعد الغسيل بيريح سنه يعنى حلو اوى لما تجيبيه هياخد شكل جسمك بعد الجواز وعندهم كل المقاسات
2/ من المنشية او باكوس او الساعة
هتلاقي هناك كل الانواع سواء قطن او ساتان او على كارينا
القطن بحوالي 30
الساتان من 30:45
الكارينا ب 15 او 20
ثانيا : البيجامات :
في طبعا منها صيفي وشتوى ونكتر الصيفي عشان بنغير اكتر في الصيف
الصيفي : 2 نص كم وبنطلون الواحده تبدأ من 100 مثلا
3 كت وبنتاكور بتبدأمن 60
3 حمالات وبرمودا بتبدأ من 60
4 هوت شورت ودى مفيش ارخص منها من 15 وانتى طالعه (في باكوس والساعة والمنشية)
واحدة ساتان ببنطلون ودي بتبدأ من 120
واحده ساتان برمودا وبتبدأ من 25 (في باكوس والساعة والمنشية)
ودول شوية صور(بالله عليكو متنسوش تقيمو لو عجبكم الموضوع )
كده يبقي 14 بيجامة صيفي
الشتوى : معلش الشتوي بقي اغلي من الصيفي
ومتخافوش عدده بيبقي اقل من الصيفي عشان في الشتا الواحد بيبقى مش هاين عليه يقلع اى حاجه وبيتبت في هدومه ههههههه
(بالله عليكو متنسوش تقيمو لو عجبكم الموضوع )
اول نوع الاقطان والميلتون : انا عن نفسي بفضلهم عن القطيفة
نجيب منهم مثلا 2 بيجامة ممكن سعرها يكون من 70
و2 تريننج سعرها بيبدأ من 110
و2 من البيجامات ال3 قطع سعرها بيبدأ من 120
النوع الثانى الساتان:
هنجيب واحده بسسسسس وممكن اصلا الصيفي دي نجيبها بجزء تالت زى روب قصير او جاكيت زى دي مثلا
او دى
(بالله عليكو متنسوش تقيمو لو عجبكم الموضوع )
النوع الثالث : القطيفة
وده منتشر اوووووووى
انا بحب الى نقشته على تايجر
هنجيب منهم 2 بيجامة بتبدأ من 100
و2 من اللى 3 قطع ودي بتبدأ من 120
كده يبقي الشتوى حوالى 11 بيجامة
بقولكو ايه يا فتوكه انتى وهي الاسعار الىانا كتباها دى متغيره حسب المكان الى بتشترو منه وحسب شطارة كل واحده في الفصال ولو هى خايبه زيي تستعين بصديق او ماما او خالتو اى حد يقدر يشل الراجل ويزهقه لحد ما ناخد الى عايزينه بسعر يناسبنا
وعايزاكو تطولو بالكو وتحطو في عقلكو انكو تبقو open-minded
وتروحو اماكن عمركو ما روحتوها عشان تجيبو حاجاتكو
الهدوم لسه مخلصتش هكملها ان شاء الله الحلقه الجاية
الاعداد الى بقولها مش لازم نلتزم بيها هاتى اكتر او هاتى اقل دى مسأله حرية شخصيه وقدرات انا بس بقول الى انا شايفاه مناسب وباذن الله هعمله
كده خلصت الحلقة الاولى من تقريرنا الشامل لجهاز العروسة وهستنى منكو اى اسئلة وانا تحت امركو يا حبايبي ومستنيه تشجيعكو وتقييمكو ليا عشان اكمل ويارب اقدر افيدكو ومش عايزة منكو الا انكو تدعولي وتقيمولي
شفتو انا غلبانه ازاى ؟؟ انا تعبت بجد في الصور ورفعها وعصرررررررررررررررت مخي عالاماكن والاسعار اما اشوف بقي تقديركو ايه
وياريت كل واحده تعرفني عليها وتقول رأيها او تسأل على تحبه و
بحبكم كلكم في الله سلالالالام
مشاركات هامه
افضل مكان لشراء الستائر وقماش الانتريهات والصالون
لو انا مش عروسه هشتري ايه لجهازى اشيله؟
الملابس الجزء الثاني
تخفيضات كارفور الملابس
تخفيضات كارفور للملابس 2
مستلزمات النيش والمطبخ – مهم جدااا
مكان القلعة الاسلامية
اماكن بيع التابلوهات و الساعات المودرن
عدد البرا والاندر والاطقم الكاملة
اماكن بيع مستلزمات النيش ورفايع المطبخ وطقم الصيني
لينكات موضوعات مهمة بعد اذن الفتوكات صحابهم
عروض كارفور على المستلزمات المنزلية لحد 5-2
https://fatakat.univanet.com/#3920672
عروض الاهرام للاوانى (اشتروا منه الحلل الاستانلس والصواني الالومنيوم)
https://fatakat.univanet.com/#3904916
عروض شركة العامريه (افضل شركه للمنسوجات والمفروشات)
https://fatakat.univanet.com/#2990342
نموذج لقائمة المنقولات الزوجية
https://fatakat.univanet.com/#508133
ميما بنت اليكس ميما بنت اليكس 614580_1.gif فتكات هايلة Fatakat 614580 اسكندرية – مصر