صباح الخير على الكل , دا اول موضوع اكتبه ويا رب تستفيدوا ,
الامساك والانتفاخ في الحمل مأساة بجد , ويمكن السبب من تغير الهرمونات لانها بتأثر على جميع العضلات اللا ارادية في الجسم ومنها الامعاء والقولون , انا عانيت كتير في اول شهور الحمل وجربت حاجات كتير مش حقول انها مجابتش نتيجة , بس برضه كانت المشكلة موجودة , لغاية ما افتكرت ان د. عادل عبد العال كان اتكلم عن التخاص من الامساك بان التوالت البلدي افضل او ممكن وضع كرسي حمام تحت الرجل خلال الجلوس على الافرنجي, وده لان القولون بياخد شكل معين في هذة الوضعيات تساعد على افراغه جيدا , وفعلا لما استخدمت كرسي الحمام ارتحت جدا وبقيت كل مرة ادخل التواليت استخدمه, يعني بانتظام ودا ساعد انه ميكنش عندي كمان انتفاخات, ومن حظي الحلو اني لما سافرت عند حماتي مرة في العيد_في قرية من قرى مصر المحروسة _ومعروفين بالاكل الدسم , وانا كنت في اول حملي , قلت خلاص حتكون ايام غامقة عليا , بس الحظ ان التواليت عندها بلدي , ومش عايزة اقولكم كنت قد ايه خفيفة خف الريشة لدرجة اني كنت بفتري في الاكل ومن غير مشاكل !
يارب اللي تجربه تستفيد وطبعا لازم السوائل الكثيرة والسلطة والبعد عن التسبيكة , واخيرا ادعولي ربنا ييسر لي الولادة ويرزقني طفلا سليما معافا ,
مع محبتي
safy288 safy288 206637_2.gif فتكات نشيطة Fatakat 206637 Alex – أم الدنيا
سبحان الله و بحمده