زهقت بقى.. قرفت.. نفسى اخس .. اتخنقت .. يا رب عاوزه اخلص من الهم
اللى على جسمى داا ..
مش دا كلامنا كلنا ؟؟؟
كلنا زهقنا من نفسنا ومن جسمنا و من شكلنا ومن نظره المجتمع لينا واللى يقول انتى جميله بس لو تخسى شويه .. على فكره وشك جميل بس جسمك ظلمك .. او اسف مقاسك مش موجود ..
انا زهقت من كلام دا وناويت اغير الواقع
بس انا مقتنعه جدا ان التشجعيع والعمل الجماعى افضل ميه مره من العمل الفردى عشان كدا قررت اعمل رجيم معاكو مش لازم يبقى معايا 100 واحده بس انا هيشجعنى اوى اما الاقى ناس بتدعيلى وتساندنى وتشتغل معايا وتشجعنى ونخس سوا ..
ايـــــــــــــه المانع !!!!!
انا سميت الله الرحمن الرحيم اللى عالم بحالى و قد ايه انا محتاجه اخس وناويت انى ابدا..
فى الحقيقه كنت ناويه اشترك فى جروب من الموجودين بس حسيت ان دنيا زحمه كدا وان مش هلاقى التشجيع اللى محتاجه فقولت يبقى ليه منشجعش بعض سوا ..
انا ان شاء الله هبدا من يوم السبت و من النهارده ليوم السبت اى حد عاوز يشترك معايا اهلا وسهلا ويبقى نور الدنيا كلها و شجعنى وشجع نفسه لحد ما نوصل لاخر الطريق سوا ..
بسم الله نبدا .. مين هيغير الواقع معايا ؟؟؟
مغيش بنت فينا مش عاوزه تخس انا واثقه ان مفيش حتى لو بتقول قدام الناس انا حلوه كدا او انا كدا تمام بس انا واثقه انها من جواها عاوزه و حابه تخس
لان كلنا نفسنا يبقه شكلنا جميل و مهندم مهما كان طبيعه شكلنا او لبسنا مفيش حد يقدر ينكر ان البنت الرشيقه حتى لو مش جميله افضل من البنت التخينه حتى لو جميله ….
طيب يا مونتى حلو الكلام نعمل ايه بقى او هنعمل ايه كلنا انشاء الله ؟؟
اولا يا بنات لازم نفهم كويس ان احنا عندنا مشكله وندرك النقطه دى بس مفيش مشكله من غير حل والحل دا فى ايدينا ..
مفيش حاجه اسمها مستحيل ..
المستحيل دا موجود فى احلام العاجز بس ..
واحنا مش عاجزين ..
قولى ورايا مفيش حاجه اسمها مستحيل انا قويه وهقدر احقق اللى انا عاوزاه
انا قويه وارادتى قويه وهحقق كل احلامى
انا قويه و جميله وهبقى اجمل واقوى ..
وبعدين؟؟؟
وبعدين يا حبايبى كل واحده فينا عارفه هيا بتتخن او تخنت ليه
يا ما بتاكل كتير جدا
يا ما كل او معظم اكلها بالليل
يا اما بتاكل بين الوجبات
صح ؟؟
طيب من النهارده ليوم السبت عاوزه منكم تلات حاجات
اولا …. عاوزه تبطلوا اكل بين الوجبات وانا هعمل كدا معاكم
ثانيا… تبطلوا اكل من بعد الساعه 9 بالليل نهائى معادا الفاكها او الزبادى
ثالثا … عاوزاكم تحاولوا كل يوم تعملوا رياضه ربع ساعه بس اى نوع رياضه
( رقص تنطيط او تمارين رياضيه او مشى فى المكان )
انا عاوزه نعمل كدا علشان نجهز جسمنا للريجيم ونعوده على الرياضه والحركه وعلى تقليل الاكل
انا مبعترفش ابدا بالريجيم الحرمان لان معظم الناس بتزهق منه بسرعه جدا و بتمل و مبتكملش
مش هنستفيد حاجه لو خسينا 5 كيلو فى اول اسبوع و بعد كدا زهقنا وبطلنا
انما هنستفيد جدا لو خسينا 2 كيلو كل اسبوع بس مكملين للاخر ..
عاوزاكم تفتكروا ان كل مشكله وليها حل وان مفيش مستحيل .. المستحيل
احنا اللى بنصنعه باصرارنا على الضعف ..
من النهارده ليوم السبت عاوزاكم تفكروا احنا عاوزين ايه ؟؟ احنا نفسنا فى ايه بنحلم يا ايه ؟
عاوزاكم تقرروا انكم تعملوا وقفه مع نفسكم وتشوفوا انتم فعلا قادرين تعملوا دا او لا
من بعد يوم السبت اللى هيبدا معانا يعرف ان مفيش تراجع و مفيش استسلام و مفيش ضعف
واننا مكملين الطريق للاخر ان شاء الله
احنا هنغيـــــــــر الواقـــــــــــــع
MoUnTy MoUnTy فتكات نشيطة Fatakat 355029 المنصوره – مصر