السلام عليكم ورحمة الله وبركاته
كل سنة وانتم طيبين ويارب متجمعين على خير
ويارب نكون من اللي هيعتقوا في رمضان باذن الله
بصوا ياقمرات انا عملت الاشعة بالصبغة وجيت قولت اطمنكوا للي ناوية تعملها ان شاء الله
اولا الاشعة اللي عايزة تعملها متشدش اعصابها وتحط في دماغها انها بتوجع ووجع رهيب زي ما بنسمع والكلام ده
انا سمعت كتير بس مشديتش نفسي خالص حتى وانا بعملها حاولت جدا اكون هادية
قولت لنفسي يعني معقول هيكون وجعها اكتر من وجع الولادة ما احنا ياما بنستحمل هتيجي على دي هعتبر نفسي داخلة اولد وخلاص
واقسم بالله انا ما اخدت لا تخدير ولا حتى حقنة مسكنة واحدة حتى
انا كنت فعلا ناوية اخد حقنة مسكنة واتفقت مع المركز على كده بس الدكتورة ربنا يباركلها طمنتني وقالتي اطمن خالص ولو تعبت او حسيت بوجع جامد هتديهاني على طول بعد الاشعة
هي الاشعة كلها اصلا 10 دقايق او اقل كمان
والوجع الدكتورة قالتلي ان كل ما الانابيب بتبقى مفتوحة بيبقى الوجع اشد
والحمد لله والشكر لله الانابيب كانت مفتوحة وشوفت الاشعة بعيني
اما الوجع بقى اللي بعض الناس بيهولوا فيه فهو
وجع زي مغص البيريود بالظبط
ايوة والله العظيم
واقسم بالله اقل كمان ده انا البيريود بتوجعني اكتر واشد من كده بكتير
لا والدكتور خلاني اروح صايمة وقاللي احتمال تحتاجي يخدروكي ولا حاجة
طب تخدير ليه اصلا هي مش عملية ولا جرح يابنات
مش هظلم حد وهقول انه محسش بوجع انا عارفة ان الاحساس بالوجع نسبي وفي واحدة ممكن تحس بالوجع اكتر من غيرها
بس ده مغص بيريود يعني متعودين عليه كل شهر مش جديد علينا
عارفين الوجع الشديد اصلا بيجي منين عشان انتي بتبقى شادة نفسك اوي من كتر الخوف الدكتورة قالتلي كده
فعشان كده جيت اطمنكوا
ربنا يعافينا كلنا ويكتبلنا الحمل السليم المعافى ويرزقناالذرية الصالحة عاجلا غير اجل
انا حبيت اطمن بس اي واحدة عايزة تعملها وخايفة لاني سمعت كتير وفعلا اترعبت في الاول بس سلمت امري لله وربنا الحمد لله كرمني
واي استفسار انا تحت امركوا
رغيت كتير انا صح
ommalak522 ommalak522 36196_1.gif فتكات هايلة Fatakat 36196 القاهرة – مصر
سبحان الله و بحمده